໒. ທຸຕິຍສິກ຺ຂາປທໍ

໘໘໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຠຄວຕາ ຠິກ຺ຂຸນີນໍ [ມຫາວ. ໓໕໑] ອຸທກສາຏິກາ ອນຸຎ຺ຎາຕາ ໂຫຕິ. ຉພ຺ພຄ຺ຄິຍາ ຠິກ຺ຂຸນິໂຍ – ‘‘ຠຄວຕາ ອຸທກສາຏິກາ ອນຸຎ຺ຎາຕາ’’ຕິ ອປ຺ປມາຓິກາໂຍ ອຸທກສາຏິກາໂຍ ຘາເຣສຸໍ [ຘາເຣນ຺ຕິ (ປາຈິ. ໕໓໑-໕໔໕)]. ປຸຣໂຕປິ ປຈ຺ຉໂຕປິ ອາກຑ຺ຒນ຺ຕາ ອາຫິຓ຺ຑນ຺ຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂຸນິໂຍ ອປ຺ປມາຓິກາໂຍ ອຸທກສາຏິກາໂຍ ຘາເຣສ຺ສນ຺ຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ອປ຺ປມາຓິກາໂຍ ອຸທກສາຏິກາໂຍ ຘາເຣນ຺ຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຉພ຺ພຄ຺ຄິຍາ ຠິກ຺ຂຸນິໂຍ ອປ຺ປມາຓິກາໂຍ ອຸທກສາຏິກາໂຍ ຘາເຣສ຺ສນ຺ຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໘໘. ‘‘ອຸທກສາຏິກໍ ປນ ຠິກ຺ຂຸນິຍາ ກາຣຍມານາຍ ປມາຓິກາ ກາເຣຕພ຺ພາ. ຕຕ຺ຣິທໍ ປມາຓໍ – ທີຆໂສ ຈຕສ຺ໂສ ວິທຕ຺ຖິໂຍ, ສຸຄຕວິທຕ຺ຖິຍາ; ຕິຣິຍໍ ທ຺ເວ ວິທຕ຺ຖິໂຍ. ຕໍ ອຕິກ຺ກາເມນ຺ຕິຍາ ເຉທນກໍ ປາຈິຕ຺ຕິຍ’’ນ຺ຕິ.

໘໘໙. ອຸທກສາຏິກາ ນາມ ຍາຍ ນິວຕ຺ຖາ [ນິວຕ຺ຖາຍ (ສ຺ຍາ.)] ນຫາຍຕິ.

ກາຣຍມານາຍາຕິ ກໂຣນ຺ຕິຍາ ວາ ກາຣາເປນ຺ຕິຍາ ວາ.

ປມາຓິກາ ກາເຣຕພ຺ພາ. ຕຕ຺ຣິທໍ ປມາຓໍ – ທີຆໂສ ຈຕສ຺ໂສ ວິທຕ຺ຖິໂຍ, ສຸຄຕວິທຕ຺ຖິຍາ; ຕິຣິຍໍ ທ຺ເວ ວິທຕ຺ຖິໂຍ. ຕໍ ອຕິກ຺ກາເມຕ຺ວາ ກໂຣຕິ ວາ ກາຣາເປຕິ ວາ, ປໂຍເຄ ທຸກ຺ກຏໍ. ປຏິລາເຠນ ຉິນ຺ທິຕ຺ວາ ປາຈິຕ຺ຕິຍໍ ເທເສຕພ຺ພໍ.

໘໙໐. ອຕ຺ຕນາ ວິປ຺ປກຕໍ ອຕ຺ຕນາ ປຣິໂຍສາເປຕິ, ອາປຕ຺ຕິ ປາຈິຕ຺ຕິຍສ຺ສ. ອຕ຺ຕນາ ວິປ຺ປກຕໍ ປເຣຫິ ປຣິໂຍສາເປຕິ, ອາປຕ຺ຕິ ປາຈິຕ຺ຕິຍສ຺ສ. ປເຣຫິ ວິປ຺ປກຕໍ ອຕ຺ຕນາ ປຣິໂຍສາເປຕິ, ອາປຕ຺ຕິ ປາຈິຕ຺ຕິຍສ຺ສ. ປເຣຫິ ວິປ຺ປກຕໍ ປເຣຫິ ປຣິໂຍສາເປຕິ, ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎສ຺ສຕ຺ຖາຍ ກໂຣຕິ ວາ ກາຣາເປຕິ ວາ, ອາປຕ຺ຕິ ທຸກ຺ກຏສ຺ສ. ອຎ຺ເຎນ ກຕໍ ປຏິລຠິຕ຺ວາ ປຣິຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

໘໙໑. ອນາປຕ຺ຕິ ປມາຓິກໍ ກໂຣຕິ, ອູນກໍ ກໂຣຕິ, ອຎ຺ເຎນ ກຕໍ ປມາຓາຕິກ຺ກນ຺ຕໍ ປຏິລຠິຕ຺ວາ ຉິນ຺ທິຕ຺ວາ ປຣິຠຸຎ຺ຊຕິ, ວິຕານໍ ວາ ຠູມຕ຺ຖຣຓໍ ວາ ສາຓິປາກາຣໍ ວາ ຠິສິໍ ວາ ພິພ຺ໂພຫນໍ ວາ ກໂຣຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ທຸຕິຍສິກ຺ຂາປທໍ ນິຏ຺ຐິຕໍ.