໓. ຕຕິຍສິກ຺ຂາປທໍ

໘໙໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣິສ຺ສາ ຠິກ຺ຂຸນິຍາ ມຫຄ຺ເຆ ຈີວຣທຸສ຺ເສ ຈີວຣໍ ທຸກ຺ກຏໍ ໂຫຕິ ທຸສ຺ສິພ຺ພິຕໍ. ຖຸລ຺ລນນ຺ທາ ຠິກ຺ຂຸນີ ຕໍ ຠິກ຺ຂຸນິໍ ເອຕທໂວຈ – ‘‘ສຸນ຺ທຣໍ ໂຂ ອິທໍ ເຕ, ອຍ຺ເຍ, ຈີວຣທຸສ຺ສໍ; ຈີວຣຎ຺ຈ ໂຂ ທຸກ຺ກຏໍ ທຸສ຺ສິພ຺ພິຕ’’ນ຺ຕິ. ‘‘ວິສິພ຺ເພມິ, ອຍ຺ເຍ, ສິພ຺ພິສ຺ສສີ’’ຕິ? ‘‘ອາມາຍ຺ເຍ, ສິພ຺ພິສ຺ສາມີ’’ຕິ. ອຖ ໂຂ ສາ ຠິກ຺ຂຸນີ ຕໍ ຈີວຣໍ ວິສິພ຺ເພຕ຺ວາ ຖຸລ຺ລນນ຺ທາຍ ຠິກ຺ຂຸນິຍາ ອທາສິ. ຖຸລ຺ລນນ຺ທາ ຠິກ຺ຂຸນີ – ‘‘ສິພ຺ພິສ຺ສາມິ ສິພ຺ພິສ຺ສາມີ’’ຕິ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ. ອຖ ໂຂ ສາ ຠິກ຺ຂຸນີ ຠິກ຺ຂຸນີນໍ ເອຕມຕ຺ຖໍ ອາໂຣເຈສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຠິກ຺ຂຸນິຍາ ຈີວຣໍ ວິສິພ຺ພາເປຕ຺ວາ ເນວ ສິພ຺ພິສ຺ສຕິ ນ ສິພ຺ພາປນາຍ ອຸສ຺ສຸກ຺ກໍ ກຣິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠິກ຺ຂຸນິຍາ ຈີວຣໍ ວິສິພ຺ພາເປຕ຺ວາ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຠິກ຺ຂຸນິຍາ ຈີວຣໍ ວິສິພ຺ພາເປຕ຺ວາ ເນວ ສິພ຺ພິສ຺ສຕິ ນ ສິພ຺ພາປນາຍ ອຸສ຺ສຸກ຺ກໍ ກຣິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໙໓. ‘‘ຍາ ປນ ຠິກ຺ຂຸນີ ຠິກ຺ຂຸນິຍາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ເພຍ຺ຍ ນ ສິພ຺ພາປນາຍ ອຸສ຺ສຸກ຺ກໍ ກເຣຍ຺ຍ, ອຎ຺ຎຕ຺ຣ ຈຕູຫປຎ຺ຈາຫາ, ປາຈິຕ຺ຕິຍ’’ນ຺ຕິ.

໘໙໔. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຠິກ຺ຂຸນິຍາຕິ ອຎ຺ຎາຍ ຠິກ຺ຂຸນິຍາ.

ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ.

ວິສິພ຺ເພຕ຺ວາຕິ ສຍໍ ວິສິພ຺ເພຕ຺ວາ. ວິສິພ຺ພາເປຕ຺ວາຕິ ອຎ຺ຎໍ ວິສິພ຺ພາເປຕ຺ວາ.

ສາ ປຈ຺ຉາ ອນນ຺ຕຣາຍິກິນີຕິ ອສຕິ ອນ຺ຕຣາເຍ.

ເນວ ສິພ຺ເພຍ຺ຍາຕິ ນ ສຍໍ ສິພ຺ເພຍ຺ຍ. ນ ສິພ຺ພາປນາຍ ອຸສ຺ສຸກ຺ກໍ ກເຣຍ຺ຍາຕິ ນ ອຎ຺ຎໍ ອາຓາເປຍ຺ຍ.

ອຎ຺ຎຕ຺ຣ ຈຕູຫປຎ຺ຈາຫາຕິ ຐເປຕ຺ວາ ຈຕູຫປຎ຺ຈາຫໍ. ‘‘ເນວ ສິພ຺ພິສ຺ສາມິ ນ ສິພ຺ພາປນາຍ ອຸສ຺ສຸກ຺ກໍ ກຣິສ຺ສາມີ’’ຕິ ຘຸຣໍ ນິກ຺ຂິຕ຺ຕມຕ຺ເຕ ອາປຕ຺ຕິ ປາຈິຕ຺ຕິຍສ຺ສ.

໘໙໕. ອຸປສມ຺ປນ຺ນາຍ ອຸປສມ຺ປນ຺ນສຎ຺ຎາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ, ອຎ຺ຎຕ຺ຣ ຈຕູຫປຎ຺ຈາຫາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ເວມຕິກາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ, ອຎ຺ຎຕ຺ຣ ຈຕູຫປຎ຺ຈາຫາ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ ຈີວຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ, ອຎ຺ຎຕ຺ຣ ຈຕູຫປຎ຺ຈາຫາ, ອາປຕ຺ຕິ ປາຈິຕ຺ຕິຍສ຺ສ.

ອຎ຺ຎໍ ປຣິກ຺ຂາຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ, ອຎ຺ຎຕ຺ຣ ຈຕູຫປຎ຺ຈາຫາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ຈີວຣໍ ວາ ອຎ຺ຎໍ ວາ ປຣິກ຺ຂາຣໍ ວິສິພ຺ເພຕ຺ວາ ວາ ວິສິພ຺ພາເປຕ຺ວາ ວາ ສາ ປຈ຺ຉາ ອນນ຺ຕຣາຍິກິນີ ເນວ ສິພ຺ພຕິ ນ ສິພ຺ພາປນາຍ ອຸສ຺ສຸກ຺ກໍ ກໂຣຕິ, ອຎ຺ຎຕ຺ຣ ຈຕູຫປຎ຺ຈາຫາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ເວມຕິກາ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນາຍ ອນຸປສມ຺ປນ຺ນສຎ຺ຎາ, ອາປຕ຺ຕິ ທຸກ຺ກຏສ຺ສ.

໘໙໖. ອນາປຕ຺ຕິ ສຕິ ອນ຺ຕຣາເຍ, ປຣິເຍສິຕ຺ວາ ນ ລຠຕິ, ກໂຣນ຺ຕີ ຈຕູຫປຎ຺ຈາຫໍ ອຕິກ຺ກາເມຕິ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຕຕິຍສິກ຺ຂາປທໍ ນິຏ຺ຐິຕໍ.