໖. ຉຏ຺ຐສິກ຺ຂາປທໍ

໘໕໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີທຕິປິ ອຠິນິປຊ຺ຊຕິປິ. ມນຸສ຺ສາ ຖຸລ຺ລນນ຺ທໍ ຠິກ຺ຂຸນິໍ ຫິຣີຍມານາ ອາສເນ ເນວ ອຠິນິສີທນ຺ຕິ ນ ອຠິນິປຊ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີທິສ຺ສຕິປິ ອຠິນິປຊ຺ຊິສ຺ສຕິປີ’’ຕິ! ອສ຺ໂສສຸໍ ໂຂ ຠິກ຺ຂຸນິໂຍ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີທິສ຺ສຕິປິ ອຠິນິປຊ຺ຊິສ຺ສຕິປີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີທຕິປິ ອຠິນິປຊ຺ຊຕິປີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີທິສ຺ສຕິປິ ອຠິນິປຊ຺ຊິສ຺ສຕິປິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໖໐. ‘‘ຍາ ປນ ຠິກ຺ຂຸນີ ປຈ຺ຉາຠຕ຺ຕໍ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ອາສເນ ອຠິນິສີເທຍ຺ຍ ວາ ອຠິນິປຊ຺ເຊຍ຺ຍ ວາ, ປາຈິຕ຺ຕິຍ’’ນ຺ຕິ.

໘໖໑. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ປຈ຺ຉາຠຕ຺ຕໍ ນາມ ມຊ຺ຌນ຺ຫິເກ ວີຕິວຕ຺ເຕ ຍາວ ອຕ຺ຖງ຺ຄເຕ ສູຣິເຍ.

ກຸລໍ ນາມ ຈຕ຺ຕາຣິ ກຸລານິ – ຂຕ຺ຕິຍກຸລໍ, ພ຺ຣາຫ຺ມຓກຸລໍ, ເວສ຺ສກຸລໍ, ສຸທ຺ທກຸລໍ. ອຸປສງ຺ກມິຕ຺ວາຕິ ຕຕ຺ຖ ຄນ຺ຕ຺ວາ.

ສາມິເກ ອນາປຸຈ຺ຉາຕິ ໂຍ ຕສ຺ມິໍ ກຸເລ ມນຸສ຺ໂສ ສາມິໂກ ທາຕຸໍ, ຕໍ ອນາປຸຈ຺ຉາ.

ອາສນໍ ນາມ ປລ຺ລງ຺ກສ຺ສ ໂອກາໂສ ວຸຈ຺ຈຕິ.

ອຠິນິສີເທຍ຺ຍາຕິ ຕສ຺ມິໍ ອຠິນິສີທຕິ, ອາປຕ຺ຕິ ປາຈິຕ຺ຕິຍສ຺ສ.

ອຠິນິປຊ຺ເຊຍ຺ຍາຕິ ຕສ຺ມິໍ ອຠິນິປຊ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

໘໖໒. ອນາປຸຈ຺ຉິເຕ ອນາປຸຈ຺ຉິຕສຎ຺ຎາ ອາສເນ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ເວມຕິກາ ອາສເນ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ອາປຸຈ຺ຉິຕສຎ຺ຎາ ອາສເນ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ປລ຺ລງ຺ກສ຺ສ ອໂນກາເສ ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອນາປຸຈ຺ຉິຕສຎ຺ຎາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ເວມຕິກາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອາປຸຈ຺ຉິຕສຎ຺ຎາ, ອນາປຕ຺ຕິ.

໘໖໓. ອນາປຕ຺ຕິ ອາປຸຈ຺ຉາ ອາສເນ ອຠິນິສີທຕິ ວາ ອຠິນິປຊ຺ຊຕິ ວາ, ຘຸວປຎ຺ຎຕ຺ເຕ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຉຏ຺ຐສິກ຺ຂາປທໍ ນິຏ຺ຐິຕໍ.