໗. ສຕ຺ຕມສິກ຺ຂາປທໍ

໘໖໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂຸນິໂຍ ໂກສເລສຸ ຊນປເທ ສາວຕ຺ຖິໍ ຄຈ຺ຉນ຺ຕິໂຍ ສາຍໍ ອຎ຺ຎຕຣໍ ຄາມໍ ອຸປຄນ຺ຕ຺ວາ ອຎ຺ຎຕຣໍ ພ຺ຣາຫ຺ມຓກຸລໍ ອຸປສງ຺ກມິຕ຺ວາ ໂອກາສໍ ຍາຈິໍສຸ. ອຖ ໂຂ ສາ ພ຺ຣາຫ຺ມຓີ ຕາ ຠິກ຺ຂຸນິໂຍ ເອຕທໂວຈ – ‘‘ອາຄເມຖ, ອຍ຺ເຍ, ຍາວ ພ຺ຣາຫ຺ມໂຓ ອາຄຈ຺ຉຕີ’’ຕິ. ຠິກ຺ຂຸນິໂຍ – ‘‘ຍາວ ພ຺ຣາຫ຺ມໂຓ ອາຄຈ຺ຉຕີ’’ຕິ ເສຍ຺ຍໍ ສນ຺ຖຣິຕ຺ວາ ເອກຈ຺ຈາ ນິສີທິໍສຸ ເອກຈ຺ຈາ ນິປຊ຺ຊິໍສຸ. ອຖ ໂຂ ໂສ ພ຺ຣາຫ຺ມໂຓ ຣຕ຺ຕິໍ ອາຄນ຺ຕ຺ວາ ຕໍ ພ຺ຣາຫ຺ມຓິໍ ເອຕທໂວຈ – ‘‘ກາ ອິມາ’’ຕິ? ‘‘ຠິກ຺ຂຸນິໂຍ, ອຍ຺ຍາ’’ຕິ. ‘‘ນິກ຺ກຑ຺ຒຖ ອິມາ ມຸຓ຺ຑາ ພນ຺ຘກິນິໂຍ’’ຕິ, ຆຣໂຕ ນິກ຺ກຑ຺ຒາເປສິ. ອຖ ໂຂ ຕາ ຠິກ຺ຂຸນິໂຍ ສາວຕ຺ຖິໍ ຄນ຺ຕ຺ວາ ຠິກ຺ຂຸນີນໍ ເອຕມຕ຺ຖໍ ອາໂຣເຈສຸໍ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນິໂຍ ວິກາເລ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ອຠິນິສີທິສ຺ສນ຺ຕິປິ ອຠິນິປຊ຺ຊິສ຺ສນ຺ຕິປີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນິໂຍ ວິກາເລ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ອຠິນິສີທນ຺ຕິປິ ອຠິນິປຊ຺ຊນ຺ຕິປີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນິໂຍ ວິກາເລ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ອຠິນິສີທິສ຺ສນ຺ຕິປິ ອຠິນິປຊ຺ຊິສ຺ສນ຺ຕິປິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໖໕. ‘‘ຍາ ປນ ຠິກ຺ຂຸນີ ວິກາເລ ກຸລານິ ອຸປສງ຺ກມິຕ຺ວາ ສາມິເກ ອນາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີເທຍ຺ຍ ວາ ອຠິນິປຊ຺ເຊຍ຺ຍ ວາ, ປາຈິຕ຺ຕິຍ’’ນ຺ຕິ.

໘໖໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ວິກາໂລ ນາມ ອຕ຺ຖງ຺ຄເຕ ສູຣິເຍ ຍາວ ອຣຸຓຸຄ຺ຄມນາ.

ກຸລໍ ນາມ ຈຕ຺ຕາຣິ ກຸລານິ – ຂຕ຺ຕິຍກຸລໍ, ພ຺ຣາຫ຺ມຓກຸລໍ, ເວສ຺ສກຸລໍ ສຸທ຺ທກຸລໍ. ອຸປສງ຺ກມິຕ຺ວາຕິ ຕຕ຺ຖ ຄນ຺ຕ຺ວາ.

ສາມິເກ ອນາປຸຈ຺ຉາຕິ ໂຍ ຕສ຺ມິໍ ກຸເລ ມນຸສ຺ໂສ ສາມິໂກ ທາຕຸໍ, ຕໍ ອນາປຸຈ຺ຉາ.

ເສຍ຺ຍໍ ນາມ ອນ຺ຕມໂສ ປຓ຺ຓສນ຺ຖາໂຣປິ. ສນ຺ຖຣິຕ຺ວາຕິ ສຍໍ ສນ຺ຖຣິຕ຺ວາ. ສນ຺ຖຣາເປຕ຺ວາຕິ ອຎ຺ຎໍ ສນ຺ຖຣາເປຕ຺ວາ. ອຠິນິສີເທຍ຺ຍາຕິ ຕສ຺ມິໍ ອຠິນິສີທຕິ, ອາປຕ຺ຕິ ປາຈິຕ຺ຕິຍສ຺ສ. ອຠິນິປຊ຺ເຊຍ຺ຍາຕິ ຕສ຺ມິໍ ອຠິນິປຊ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

໘໖໗. ອນາປຸຈ຺ຉິເຕ ອນາປຸຈ຺ຉິຕສຎ຺ຎາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ເວມຕິກາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ອາປຸຈ຺ຉິຕສຎ຺ຎາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ອາປຸຈ຺ຉິເຕ ອນາປຸຈ຺ຉິຕສຎ຺ຎາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ເວມຕິກາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອາປຸຈ຺ຉິຕສຎ຺ຎາ, ອນາປຕ຺ຕິ.

໘໖໘. ອນາປຕ຺ຕິ ອາປຸຈ຺ຉາ ເສຍ຺ຍໍ ສນ຺ຖຣິຕ຺ວາ ວາ ສນ຺ຖຣາເປຕ຺ວາ ວາ ອຠິນິສີທຕິ ວາ ອຠິນິປຊ຺ຊຕິ ວາ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.