໕. ປຎ຺ຈມສິກ຺ຂາປທໍ

໘໕໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣາ ຠິກ຺ຂຸນີ ອຎ຺ຎຕຣສ຺ສ ກຸລສ຺ສ ກຸລູປິກາ ໂຫຕິ ນິຈ຺ຈຠຕ຺ຕິກາ. ອຖ ໂຂ ສາ ຠິກ຺ຂຸນີ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກາມິ. ຕສ຺ສ ກຸລສ຺ສ ທາສີ ຆຣໍ ສມ຺ມຊ຺ຊນ຺ຕີ ຕໍ ອາສນໍ ຠາຊນນ຺ຕຣິກາຍ ປກ຺ຂິປິ. ມນຸສ຺ສາ ຕໍ ອາສນໍ ອປສ຺ສນ຺ຕາ ຕໍ ຠິກ຺ຂຸນິໍ ເອຕທໂວຈຸໍ – ‘‘ກຫໍ ຕໍ, ອຍ຺ເຍ, ອາສນ’’ນ຺ຕິ? ‘‘ນາຫໍ ຕໍ, ອາວຸໂສ, ອາສນໍ ປສ຺ສາມີ’’ຕິ. ‘‘ເທຖາຍ຺ເຍ, ຕໍ ອາສນ’’ນ຺ຕິ ປຣິຠາສິຕ຺ວາ ນິຈ຺ຈຠຕ຺ຕໍ ປຈ຺ຉິນ຺ທິໍສຸ. ອຖ ໂຂ ເຕ ມນຸສ຺ສາ ຆຣໍ ໂສເຘນ຺ຕາ ຕໍ ອາສນໍ ຠາຊນນ຺ຕຣິກາຍ ປສ຺ສິຕ຺ວາ ຕໍ ຠິກ຺ຂຸນິໍ ຂມາເປຕ຺ວາ ນິຈ຺ຈຠຕ຺ຕໍ ປຏ຺ຐເປສຸໍ. ອຖ ໂຂ ສາ ຠິກ຺ຂຸນີ ຠິກ຺ຂຸນີນໍ ເອຕມຕ຺ຖໍ ອາໂຣເຈສິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກມິສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກມຕີຕິ [ປກ຺ກມີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ ຠິກ຺ຂຸນີ ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກມິສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໕໕. ‘‘ຍາ ປນ ຠິກ຺ຂຸນີ ປຸເຣຠຕ຺ຕໍ ກຸລານິ ອຸປສງ຺ກມິຕ຺ວາ ອາສເນ ນິສີທິຕ຺ວາ ສາມິເກ ອນາປຸຈ຺ຉາ ປກ຺ກເມຍ຺ຍ, ປາຈິຕ຺ຕິຍ’’ນ຺ຕິ.

໘໕໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ປຸເຣຠຕ຺ຕໍ ນາມ ອຣຸຓຸຄ຺ຄມນໍ ອຸປາທາຍ ຍາວ ມຊ຺ຌນ຺ຫິກາ.

ກຸລໍ ນາມ ຈຕ຺ຕາຣິ ກຸລານິ – ຂຕ຺ຕິຍກຸລໍ, ພ຺ຣາຫ຺ມຓກຸລໍ, ເວສ຺ສກຸລໍ, ສຸທ຺ທກຸລໍ. ອຸປສງ຺ກມິຕ຺ວາຕິ ຕຕ຺ຖ ຄນ຺ຕ຺ວາ.

ອາສນໍ ນາມ ປລ຺ລງ຺ກສ຺ສ ໂອກາໂສ ວຸຈ຺ຈຕິ. ນິສີທິຕ຺ວາຕິ ຕສ຺ມິໍ ນິສີທິຕ຺ວາ.

ສາມິເກ ອນາປຸຈ຺ຉາ ປກ຺ກເມຍ຺ຍາຕິ ໂຍ ຕສ຺ມິໍ ກຸເລ ມນຸສ຺ໂສ ວິຎ຺ຎູ ຕໍ ອນາປຸຈ຺ຉາ ອໂນວສ຺ສກໍ ອຕິກ຺ກາເມນ຺ຕິຍາ ອາປຕ຺ຕິ ປາຈິຕ຺ຕິຍສ຺ສ. ອຊ຺ໂຌກາເສ ອຸປຈາຣໍ ອຕິກ຺ກາເມນ຺ຕິຍາ ອາປຕ຺ຕິ ປາຈິຕ຺ຕິຍສ຺ສ.

໘໕໗. ອນາປຸຈ຺ຉິເຕ ອນາປຸຈ຺ຉິຕສຎ຺ຎາ ປກ຺ກມຕິ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ເວມຕິກາ ປກ຺ກມຕິ, ອາປຕ຺ຕິ ປາຈິຕ຺ຕິຍສ຺ສ. ອນາປຸຈ຺ຉິເຕ ອາປຸຈ຺ຉິຕສຎ຺ຎາ ປກ຺ກມຕິ, ອາປຕ຺ຕິ ປາຈິຕ຺ຕິຍສ຺ສ.

ປລ຺ລງ຺ກສ຺ສ ອໂນກາເສ ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອນາປຸຈ຺ຉິຕສຎ຺ຎາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ເວມຕິກາ, ອາປຕ຺ຕິ ທຸກ຺ກຏສ຺ສ. ອາປຸຈ຺ຉິເຕ ອາປຸຈ຺ຉິຕສຎ຺ຎາ, ອນາປຕ຺ຕິ.

໘໕໘. ອນາປຕ຺ຕິ ອາປຸຈ຺ຉາ ຄຈ຺ຉຕິ, ອສໍຫາຣິເມ, ຄິລານາຍ, ອາປທາສຸ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.