໔. ຈຕຸຕ຺ຖສິກ຺ຂາປທໍ

໘໕໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ຣຖິກາຍປິ ພ຺ຍູເຫປິ ສິງ຺ຆາຏເກປິ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐຕິປິ ສລ຺ລປຕິປິ ນິກຓ຺ຓິກມ຺ປິ ຊປ຺ເປຕິ ທຸຕິຍິກມ຺ປິ ຠິກ຺ຂຸນິໍ ອຸຍ຺ໂຍເຊຕິ. ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຣຖິກາຍປິ ພ຺ຍູເຫປິ ສິງ຺ຆາຏເກປິ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐິສ຺ສຕິປິ ສລ຺ລປິສ຺ສຕິປິ ນິກຓ຺ຓິກມ຺ປິ ຊປ຺ປິສ຺ສຕິ ທຸຕິຍິກມ຺ປິ ຠິກ຺ຂຸນິໍ ອຸຍ຺ໂຍເຊສ຺ສຕີ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຣຖິກາຍປິ ພ຺ຍູເຫປິ ສິງ຺ຆາຏເກປິ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐຕິປິ ສລ຺ລປຕິປິ ນິກຓ຺ຓິກມ຺ປິ ຊປ຺ເປຕິ ທຸຕິຍິກມ຺ປິ ຠິກ຺ຂຸນິໍ ອຸຍ຺ໂຍເຊຕີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຣຖິກາຍປິ ພ຺ຍູເຫປິ ສິງ຺ຆາຏເກປິ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ຐິສ຺ສຕິປິ ສລ຺ລປິສ຺ສຕິປິ ນິກຓ຺ຓິກມ຺ປິ ຊປ຺ປິສ຺ສຕິ ທຸຕິຍິກມ຺ປິ ຠິກ຺ຂຸນິໍ ອຸຍ຺ໂຍເຊສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໘໕໑. ‘‘ຍາ ປນ ຠິກ຺ຂຸນີ ຣຖິກາຍ ວາ ພ຺ຍູເຫ ວາ ສິງ຺ຆາຏເກ ວາ ປຸຣິເສນ ສທ຺ຘິໍ ເອເກເນກາ ສນ຺ຕິຏ຺ເຐຍ຺ຍ ວາ ສລ຺ລເປຍ຺ຍ ວາ ນິກຓ຺ຓິກໍ ວາ ຊປ຺ເປຍ຺ຍ ທຸຕິຍິກໍ ວາ ຠິກ຺ຂຸນິໍ ອຸຍ຺ໂຍເຊຍ຺ຍ, ປາຈິຕ຺ຕິຍ’’ນ຺ຕິ.

໘໕໒. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຣຖິກາ ນາມ ຣຈ຺ຉາ ວຸຈ຺ຈຕິ. ພ຺ຍູຫໍ ນາມ ເຍເນວ ປວິສນ຺ຕິ ເຕເນວ ນິກ຺ຂມນ຺ຕິ. ສິງ຺ຆາຏໂກ ນາມ ຈຈ຺ຈຣໍ ວຸຈ຺ຈຕິ.

ປຸຣິໂສ ນາມ ມນຸສ຺ສປຸຣິໂສ ນ ຍກ຺ໂຂ ນ ເປໂຕ ນ ຕິຣຈ຺ຉານຄໂຕ ວິຎ຺ຎູ ປຏິພໂລ ສນ຺ຕິຏ຺ຐິຕຸໍ ສລ຺ລປິຕຸໍ.

ສທ຺ຘິນ຺ຕິ ເອກໂຕ. ເອເກເນກາຕິ ປຸຣິໂສ ເຈວ ໂຫຕິ ຠິກ຺ຂຸນີ ຈ.

ສນ຺ຕິຏ຺ເຐຍ຺ຍ ວາຕິ ປຸຣິສສ຺ສ ຫຕ຺ຖປາເສ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ.

ສລ຺ລເປຍ຺ຍ ວາຕິ ປຸຣິສສ຺ສ ຫຕ຺ຖປາເສ ຐິຕາ ສລ຺ລປຕິ, ອາປຕ຺ຕິ ປາຈິຕ຺ຕິຍສ຺ສ.

ນິກຓ຺ຓິກໍ ວາ ຊປ຺ເປຍ຺ຍາຕິ ປຸຣິສສ຺ສ ອຸປກຓ຺ຓເກ ອາໂຣເຈຕິ, ອາປຕ຺ຕິ ປາຈິຕ຺ຕິຍສ຺ສ.

ທຸຕິຍິກໍ ວາ ຠິກ຺ຂຸນິໍ ອຸຍ຺ໂຍເຊຍ຺ຍາຕິ ອນາຈາຣໍ ອາຈຣິຕຸກາມາ ທຸຕິຍິກມ຺ປິ ຠິກ຺ຂຸນິໍ ອຸຍ຺ໂຍເຊຕິ, ອາປຕ຺ຕິ ທຸກ຺ກຏສ຺ສ. ທສ຺ສນູປຈາຣໍ ວາ ສວນູປຈາຣໍ ວາ ວິຊຫນ຺ຕິຍາ ອາປຕ຺ຕິ ທຸກ຺ກຏສ຺ສ. ວິຊຫິເຕ ອາປຕ຺ຕິ ປາຈິຕ຺ຕິຍສ຺ສ.

ຫຕ຺ຖປາສໍ ວິຊຫິຕ຺ວາ ສນ຺ຕິຏ຺ຐຕິ ວາ ສລ຺ລປຕິ ວາ ອາປຕ຺ຕິ ທຸກ຺ກຏສ຺ສ. ຍກ຺ເຂນ ວາ ເປເຕນ ວາ ປຓ຺ຑເກນ ວາ ຕິຣຈ຺ຉານຄຕມນຸສ຺ສວິຄ຺ຄເຫນ ວາ ສທ຺ຘິໍ ສນ຺ຕິຏ຺ຐຕິ ວາ ສລ຺ລປຕິ ວາ, ອາປຕ຺ຕິ ທຸກ຺ກຏສ຺ສ.

໘໕໓. ອນາປຕ຺ຕິ ໂຍ ໂກຈິ ວິຎ຺ຎູ ທຸຕິໂຍ ໂຫຕິ, ອຣໂຫເປກ຺ຂາ, ອຎ຺ຎວິຫິຕາ ສນ຺ຕິຏ຺ຐຕິ ວາ ສລ຺ລປຕິ ວາ, ນ ອນາຈາຣໍ ອາຈຣິຕຸກາມາ, ສຕິ ກຣຓີເຍ ທຸຕິຍິກໍ ຠິກ຺ຂຸນິໍ ອຸຍ຺ໂຍເຊຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.