໖. ຉຏ຺ຐສງ຺ຆາທິເສສສິກ຺ຂາປທໍ

໗໐໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສຸນ຺ທຣີນນ຺ທາ ຠິກ຺ຂຸນີ ອຠິຣູປາ ໂຫຕິ ທສ຺ສນີຍາ ປາສາທິກາ. ມນຸສ຺ສາ ຠຕ຺ຕຄ຺ເຄ ສຸນ຺ທຣີນນ຺ທໍ ຠິກ຺ຂຸນິໍ ປສ຺ສິຕ຺ວາ ອວສ຺ສຸຕາ ສຸນ຺ທຣີນນ຺ທາຍ ຠິກ຺ຂຸນິຍາ ອຄ຺ຄມຄ຺ຄານິ ໂຠຊນານິ ເທນ຺ຕິ. ສຸນ຺ທຣີນນ຺ທາ ຠິກ຺ຂຸນີ ກຸກ຺ກຸຈ຺ຈາຍນ຺ຕີ ນ ປຏິຄ຺ຄຓ຺ຫາຕິ. ອນນ຺ຕຣິກາ ຠິກ຺ຂຸນີ ສຸນ຺ທຣີນນ຺ທໍ ຠິກ຺ຂຸນິໍ ເອຕທໂວຈ – ‘‘ກິສ຺ສ ຕ຺ວໍ, ອຍ຺ເຍ, ນ ປຏິຄ຺ຄຓ຺ຫາສີ’’ຕິ? ‘‘ອວສ຺ສຸຕາ, ອຍ຺ເຍ’’ຕິ. ‘‘ຕ຺ວໍ ປນ, ອຍ຺ເຍ, ອວສ຺ສຸຕາ’’ຕິ? ‘‘ນາຫໍ, ອຍ຺ເຍ, ອວສ຺ສຸຕາ’’ຕິ. ‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ, ຍໂຕ ຕ຺ວໍ ອນວສ຺ສຸຕາ. ອິງ຺ຆໍ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ, ຠຸຎ຺ຊ ວາ’’ຕິ.

ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸນີ ເອວໍ ວກ຺ຂຕິ – ‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ, ຍໂຕ ຕ຺ວໍ ອນວສ຺ສຸຕາ. ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’’ຕິ…ເປ… ສຈ຺ຈໍ ກິຣ, ຠິກ຺ຂເວ, ຠິກ຺ຂຸນີ ເອວໍ ວເທຕິ – ‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ ຍໂຕ ຕ຺ວໍ ອນວສ຺ສຸຕາ! ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຠິກ຺ຂຸນີ ເອວໍ ວກ຺ຂຕິ – ‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ ຍໂຕ ຕ຺ວໍ ອນວສ຺ສຸຕາ; ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’’. ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໗໐໕. ‘‘ຍາ ປນ ຠິກ຺ຂຸນີ ເອວໍ ວເທຍ຺ຍ – ‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ, ຍໂຕ ຕ຺ວໍ ອນວສ຺ສຸຕາ. ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’ຕິ, ອຍມ຺ປິ ຠິກ຺ຂຸນີ ປຐມາປຕ຺ຕິກໍ ຘມ຺ມໍ ອາປນ຺ນາ ນິສ຺ສາຣຓີຍໍ ສງ຺ຆາທິເສສ’’ນ຺ຕິ.

໗໐໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ເອວໍ ວເທຍ຺ຍາຕິ – ‘‘ກິໍ ເຕ, ອຍ຺ເຍ, ເອໂສ ປຸຣິສປຸຄ຺ຄໂລ ກຣິສ຺ສຕິ ອວສ຺ສຸໂຕ ວາ ອນວສ຺ສຸໂຕ ວາ, ຍໂຕ ຕ຺ວໍ ອນວສ຺ສຸຕາ. ອິງ຺ຆ, ອຍ຺ເຍ, ຍໍ ເຕ ເອໂສ ປຸຣິສປຸຄ຺ຄໂລ ເທຕິ ຂາທນີຍໍ ວາ ໂຠຊນີຍໍ ວາ ຕໍ ຕ຺ວໍ ສຫຕ຺ຖາ ປຏິຄ຺ຄເຫຕ຺ວາ ຂາທ ວາ ຠຸຎ຺ຊ ວາ’’ຕິ ອຸຍ຺ໂຍເຊຕິ, ອາປຕ຺ຕິ ທຸກ຺ກຏສ຺ສ. ຕສ຺ສາ ວຈເນນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ຖຸລ຺ລຈ຺ຈຍສ຺ສ. ໂຠຊນປຣິໂຍສາເນ ອາປຕ຺ຕິ ສງ຺ຆາທິເສສສ຺ສ.

ອຍມ຺ປີຕິ ປຸຣິມາໂຍ ອຸປາທາຍ ວຸຈ຺ຈຕິ.

ປຐມາປຕ຺ຕິກນ຺ຕິ ສຫ ວຕ຺ຖຸຊ຺ຌາຈາຣາ ອາປຊ຺ຊຕິ ອສມນຸຠາສນາຍ.

ນິສ຺ສາຣຓີຍນ຺ຕິ ສງ຺ຆມ຺ຫາ ນິສ຺ສາຣີຍຕິ.

ສງ຺ຆາທິເສໂສຕິ…ເປ… ເຕນປິ ວຸຈ຺ຈຕິ ສງ຺ຆາທິເສໂສຕິ.

ອຸທກທນ຺ຕໂປນໍ ‘‘ປຏິຄ຺ຄຓ຺ຫາ’’ຕິ ອຸຍ຺ໂຍເຊຕິ, ອາປຕ຺ຕິ ທຸກ຺ກຏສ຺ສ. ຕສ຺ສາ ວຈເນນ ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ.

໗໐໗. ເອກໂຕອວສ຺ສຸເຕ ຍກ຺ຂສ຺ສ ວາ ເປຕສ຺ສ ວາ ປຓ຺ຑກສ຺ສ ວາ ຕິຣຈ຺ຉານຄຕມນຸສ຺ສວິຄ຺ຄຫສ຺ສ ວາ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ‘‘ຂາທ ວາ ຠຸຎ຺ຊ ວາ’’ຕິ ອຸຍ຺ໂຍເຊຕິ, ອາປຕ຺ຕິ ທຸກ຺ກຏສ຺ສ. ຕສ຺ສາ ວຈເນນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ໂຠຊນປຣິໂຍສາເນ ອາປຕ຺ຕິ ຖຸລ຺ລຈ຺ຈຍສ຺ສ. ອຸທກທນ຺ຕໂປນໍ ປຏິຄ຺ຄຓ຺ຫາຕິ ອຸຍ຺ໂຍເຊຕິ, ອາປຕ຺ຕິ ທຸກ຺ກຏສ຺ສ. ຕສ຺ສາ ວຈເນນ ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ.

໗໐໘. ອນາປຕ຺ຕິ ‘‘ອນວສ຺ສຸໂຕ’’ຕິ ຊານນ຺ຕີ ອຸຍ຺ໂຍເຊຕິ, ‘‘ກຸປິຕາ ນ ປຏິຄ຺ຄຓ຺ຫາຕີ’’ຕິ ອຸຍ຺ໂຍເຊຕິ, ‘‘ກຸລານຸທ຺ທຍຕາຍ ນ ປຏິຄ຺ຄຓ຺ຫາຕີ’’ຕິ ອຸຍ຺ໂຍເຊຕິ, ອຸມ຺ມຕ຺ຕິກາຍ, ອາທິກມ຺ມິກາຍາຕິ.

ຉຏ຺ຐສງ຺ຆາທິເສສສິກ຺ຂາປທໍ ນິຏ຺ຐິຕໍ.