໒. ທຸຕິຍປາຣາຊິກໍ

໖໖໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສຸນ຺ທຣີນນ຺ທາ ຠິກ຺ຂຸນີ ສາຬ຺ເຫນ ມິຄາຣນຕ຺ຕຸນາ ຄພ຺ຠິນີ ໂຫຕິ. ຍາວ ຄພ຺ໂຠ ຕຣຸໂຓ ອໂຫສິ ຕາວ ຉາເທສິ. ປຣິປກ຺ເກ ຄພ຺ເຠ ວິພ຺ຠມິຕ຺ວາ ວິຊາຍິ. ຠິກ຺ຂຸນິໂຍ ຖຸລ຺ລນນ຺ທໍ ຠິກ຺ຂຸນິໍ ເອຕທໂວຈຸໍ – ‘‘ສຸນ຺ທຣີນນ຺ທາ ໂຂ, ອຍ຺ເຍ, ອຈິຣວິພ຺ຠນ຺ຕາ ວິຊາຕາ. ກຈ຺ຈິ ໂນ ສາ ຠິກ຺ຂຸນີເຍວ ສມານາ ຄພ຺ຠິນີ’’ຕິ? ‘‘ເອວໍ, ອຍ຺ເຍ’’ຕິ. ‘‘ກິສ຺ສ ປນ ຕ຺ວໍ, ອຍ຺ເຍ, ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທສິ ນ ຄຓສ຺ສ ອາໂຣເຈສີ’’ຕິ? ‘‘ໂຍ ເອຕິສ຺ສາ ອວຓ຺ໂຓ ມຍ຺ເຫໂສ ອວຓ຺ໂຓ, ຍາ ເອຕິສ຺ສາ ອກິຕ຺ຕິ ມຍ຺ເຫສາ ອກິຕ຺ຕິ, ໂຍ ເອຕິສ຺ສາ ອຍໂສ ມຍ຺ເຫໂສ ອຍໂສ, ໂຍ ເອຕິສ຺ສາ ອລາໂຠ ມຍ຺ເຫໂສ ອລາໂຠ. ກ຺ຍາຫໍ, ອຍ຺ເຍ, ອຕ຺ຕໂນ ອວຓ຺ຓໍ ອຕ຺ຕໂນ ອກິຕ຺ຕິໍ ອຕ຺ຕໂນ ອຍສໍ ອຕ຺ຕໂນ ອລາຠໍ ປເຣສໍ ອາໂຣເຈສ຺ສາມີ’’ຕິ? ຍາ ຕາ ຠິກ຺ຂຸນິໂຍ ອປ຺ປິຈ຺ຉາ…ເປ… ຕາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອຍ຺ຍາ ຖຸລ຺ລນນ຺ທາ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທສ຺ສຕິ ນ ຄຓສ຺ສ ອາໂຣເຈສ຺ສຕີ’’ຕິ! ອຖ ໂຂ ຕາ ຠິກ຺ຂຸນິໂຍ ຠິກ຺ຂູນໍ ເອຕມຕ຺ຖໍ ອາໂຣເຈສຸໍ. ຠິກ຺ຂູ [ເຍ ເຕ ຠິກ຺ຂູ…ເປ… (?)] ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຠິກ຺ຂູ ປຏິປຸຈ຺ຉິ – ‘‘ສຈ຺ຈໍ ກິຣ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທຕິ [ປຏິໂຈເທສິ… ອາໂຣເຈສີຕິ (ກ.)] ນ ຄຓສ຺ສ ອາໂຣເຈຕີ’’ຕິ [ປຏິໂຈເທສິ… ອາໂຣເຈສີຕິ (ກ.)]? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ, ຠິກ຺ຂເວ, ຖຸລ຺ລນນ຺ທາ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທສ຺ສຕິ ນ ຄຓສ຺ສ ອາໂຣເຈສ຺ສຕິ! ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ຠິກ຺ຂຸນິໂຍ ອິມໍ ສິກ຺ຂາປທໍ ອຸທ຺ທິສນ຺ຕຸ –

໖໖໕. ‘‘ຍາ ປນ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທຍ຺ຍ ນ ຄຓສ຺ສ ອາໂຣເຈຍ຺ຍ, ຍທາ ຈ ສາ ຐິຕາ ວາ ອສ຺ສ ຈຸຕາ ວາ ນາສິຕາ ວາ ອວສ຺ສຏາ ວາ, ສາ ປຈ຺ຉາ ເອວໍ ວເທຍ຺ຍ – ‘ປຸພ຺ເພວາຫໍ, ອຍ຺ເຍ, ອຎ຺ຎາສິໍ ເອຕໍ ຠິກ຺ຂຸນິໍ ເອວຣູປາ ຈ ເອວຣູປາ ຈ ສາ ຠຄິນີຕິ, ໂນ ຈ ໂຂ ອຕ຺ຕນາ ປຏິໂຈເທສ຺ສໍ ນ ຄຓສ຺ສ ອາໂຣເຈສ຺ສ’ນ຺ຕິ, ອຍມ຺ປິ ປາຣາຊິກາ ໂຫຕິ ອສໍວາສາ ວຊ຺ຊປ຺ປຏິຈ຺ຉາທິກາ’’ຕິ.

໖໖໖. ຍາ ປນາຕິ ຍາ ຍາທິສາ…ເປ… ຠິກ຺ຂຸນີຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປຕາ ຠິກ຺ຂຸນີຕິ.

ຊານາຕິ ນາມ ສາມໍ ວາ ຊານາຕິ, ອຎ຺ເຎ ວາ ຕສ຺ສາ ອາໂຣເຈນ຺ຕິ, ສາ ວາ ອາໂຣເຈຕິ.

ປາຣາຊິກໍ ຘມ຺ມໍ ອຊ຺ຌາປນ຺ນນ຺ຕິ ອຏ຺ຐນ຺ນໍ ປາຣາຊິການໍ ອຎ຺ຎຕຣໍ ປາຣາຊິກໍ ອຊ຺ຌາປນ຺ນໍ.

ເນວຕ຺ຕນາ ປຏິໂຈເທຍ຺ຍາຕິ ນ ສຍໍ ໂຈເທຍ຺ຍ.

ນ ຄຓສ຺ສ ອາໂຣເຈຍ຺ຍາຕິ ນ ອຎ຺ຎາສໍ ຠິກ຺ຂຸນີນໍ ອາໂຣເຈຍ຺ຍ.

ຍທາ ຈ ສາ ຐິຕາ ວາ ອສ຺ສ ຈຸຕາ ວາຕິ ຐິຕາ ນາມ ສລິງ຺ເຄ ຐິຕາ ວຸຈ຺ຈຕິ. ຈຸຕາ ນາມ ກາລງ຺ກຕາ ວຸຈ຺ຈຕິ. ນາສິຕາ ນາມ ສຍໍ ວາ ວິພ຺ຠນ຺ຕາ ໂຫຕິ ອຎ຺ເຎຫິ ວາ ນາສິຕາ. ອວສ຺ສຏາ ນາມ ຕິຕ຺ຖາຍຕນໍ ສງ຺ກນ຺ຕາ ວຸຈ຺ຈຕິ. ສາ ປຈ຺ຉາ ເອວໍ ວເທຍ຺ຍ – ‘‘ປຸພ຺ເພວາຫໍ, ອຍ຺ເຍ, ອຎ຺ຎາສິໍ ເອຕໍ ຠິກ຺ຂຸນິໍ ເອວຣູປາ ຈ ເອວຣູປາ ຈ ສາ ຠຄິນີ’’ຕິ.

ໂນ ຈ ໂຂ ອຕ຺ຕນາ ປຏິໂຈເທສ຺ສນ຺ຕິ ສຍໍ ວາ ນ ໂຈເທສ຺ສໍ.

ນ ຄຓສ຺ສ ອາໂຣເຈສ຺ສນ຺ຕິ ນ ອຎ຺ຎາສໍ ຠິກ຺ຂຸນີນໍ ອາໂຣເຈສ຺ສໍ.

ອຍມ຺ປີຕິ ປຸຣິມາໂຍ ອຸປາທາຍ ວຸຈ຺ຈຕິ.

ປາຣາຊິກາ ໂຫຕີຕິ ເສຍ຺ຍຖາປິ ນາມ ປຓ຺ຑຸປລາໂສ ພນ຺ຘນາ ປມຸຕ຺ໂຕ ອຠພ຺ໂພ ຫຣິຕຕ຺ຖາຍ, ເອວເມວ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ອຊ຺ຌາປນ຺ນໍ ຠິກ຺ຂຸນິໍ ເນວຕ຺ຕນາ ປຏິໂຈເທສ຺ສາມິ ນ ຄຓສ຺ສ ອາໂຣເຈສ຺ສາມີຕິ ຘຸຣໍ ນິກ຺ຂິຕ຺ຕມຕ຺ເຕ ອສ຺ສມຓີ ໂຫຕິ ອສກ຺ຍຘີຕາ. ເຕນ ວຸຈ຺ຈຕິ ປາຣາຊິກາ ໂຫຕີຕິ.

ອສໍວາສາຕິ ສໍວາໂສ ນາມ ເອກກມ຺ມໍ ເອກຸທ຺ເທໂສ ສມສິກ຺ຂຕາ. ເອໂສ ສໍວາໂສ ນາມ. ໂສ ຕາຍ ສທ຺ຘິໍ ນຕ຺ຖິ. ເຕນ ວຸຈ຺ຈຕິ ອສໍວາສາຕິ.

໖໖໗. ອນາປຕ຺ຕິ ‘‘ສງ຺ຆສ຺ສ ຠຓ຺ຑນໍ ວາ ກລໂຫ ວາ ວິຄ຺ຄໂຫ ວາ ວິວາໂທ ວາ ຠວິສ຺ສຕີ’’ຕິ ນາໂຣເຈຕິ, ‘‘ສງ຺ຆເຠໂທ ວາ ສງ຺ຆຣາຊິ ວາ ຠວິສ຺ສຕີ’’ຕິ ນາໂຣເຈຕິ, ‘‘ອຍໍ ກກ຺ຂຬາ ຜຣຸສາ ຊີວິຕນ຺ຕຣາຍໍ ວາ ພ຺ຣຫ຺ມຈຣິຍນ຺ຕຣາຍໍ ວາ ກຣິສ຺ສຕີ’’ຕິ ນາໂຣເຈຕິ, ອຎ຺ຎາ ປຕິຣູປາ ຠິກ຺ຂຸນິໂຍ ອປສ຺ສນ຺ຕີ ນາໂຣເຈຕິ, ນຈ຺ຉາເທຕຸກາມາ ນາໂຣເຈຕິ, ປຎ຺ຎາຍິສ຺ສຕິ ສເກນ ກມ຺ເມນາຕິ ນາໂຣເຈຕິ, ອຸມ຺ມຕ຺ຕິກາຍ…ເປ… ອາທິກມ຺ມິກາຍາຕິ.

ທຸຕິຍປາຣາຊິກໍ ສມຕ຺ຕໍ.