໗. ປາທຸກວຄ຺ໂຄ

໖໓໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປາທຸກາຣຸຬ຺ຫສ຺ສ ຘມ຺ມໍ ເທເສນ຺ຕິ…ເປ….

‘‘ນ ປາທຸກາຣຸຬ຺ຫສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ປາທຸກາຣຸຬ຺ຫສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ອກ຺ກນ຺ຕສ຺ສ ວາ ປຏິມຸກ຺ກສ຺ສ ວາ ໂອມຸກ຺ກສ຺ສ ວາ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ປຐມສິກ຺ຂາປທໍ ນິຏ຺ຐິຕໍ.

໖໓໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸປາຫນາຣຸຬ຺ຫສ຺ສ ຘມ຺ມໍ ເທເສນ຺ຕິ…ເປ….

‘‘ນ ອຸປາຫນາຣຸຬ຺ຫສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາກຣຓີຍາ’’ຕິ.

ນ ອຸປາຫນາຣຸຬ຺ຫສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ອກ຺ກນ຺ຕສ຺ສ ວາ ປຏິມຸກ຺ກສ຺ສ ວາ ໂອມຸກ຺ກສ຺ສ ວາ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ທຸຕິຍສິກ຺ຂາປທໍ ນິຏ຺ຐິຕໍ.

໖໔໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຍານຄຕສ຺ສ ຘມ຺ມໍ ເທເສນ຺ຕິ…ເປ….

‘‘ນ ຍານຄຕສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ຍານໍ ນາມ ວຍ຺ຫໍ ຣໂຖ ສກຏໍ ສນ຺ທມານິກາ ສິວິກາ ປາຏງ຺ກີ.

ນ ຍານຄຕສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ຍານຄຕສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໖໔໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສຍນຄຕສ຺ສ ຘມ຺ມໍ ເທເສນ຺ຕິ…ເປ….

‘‘ນ ສຍນຄຕສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ສຍນຄຕສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ອນ຺ຕມໂສ ຉມາຍມ຺ປິ ນິປນ຺ນສ຺ສ ສຍນຄຕສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໖໔໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປລ຺ລຕ຺ຖິກາຍ ນິສິນ຺ນສ຺ສ ຘມ຺ມໍ ເທເສນ຺ຕິ…ເປ….

‘‘ນ ປລ຺ລຕ຺ຖິກາຍ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ປລ຺ລຕ຺ຖິກາຍ ນິສິນ຺ນສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ຫຕ຺ຖປລ຺ລຕ຺ຖິກາຍ ວາ ທຸສ຺ສປລ຺ລຕ຺ຖິກາຍ ວາ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໖໔໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ເວຐິຕສີສສ຺ສ ຘມ຺ມໍ ເທເສນ຺ຕິ…ເປ….

‘‘ນ ເວຐິຕສີສສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ເວຐິຕສີໂສ ນາມ ເກສນ຺ຕໍ ນ ທສ຺ສາເປຕ຺ວາ ເວຐິໂຕ ໂຫຕິ.

ນ ເວຐິຕສີສສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ເວຐິຕສີສສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ເກສນ຺ຕໍ ວິວຣາເປຕ຺ວາ ເທເສຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຉຏ຺ຐສິກ຺ຂາປທໍ ນິຏ຺ຐິຕໍ.

໖໔໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ໂອຄຸຓ຺ຐິຕສີສສ຺ສ ຘມ຺ມໍ ເທເສນ຺ຕິ…ເປ….

‘‘ນ ໂອຄຸຓ຺ຐິຕສີສສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ໂອຄຸຓ຺ຐິຕສີໂສ ນາມ ສສີສໍ ປາຣຸໂຕ ວຸຈ຺ຈຕິ.

ນ ໂອຄຸຓ຺ຐິຕສີສສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ໂອຄຸຓ຺ຐິຕສີສສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ສີສໍ ວິວຣາເປຕ຺ວາ ເທເສຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.

໖໔໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຉມາຍ ນິສີທິຕ຺ວາ ອາສເນ ນິສິນ຺ນສ຺ສ ຘມ຺ມໍ ເທເສນ຺ຕິ…ເປ….

‘‘ນ ຉມາຍໍ ນິສີທິຕ຺ວາ ອາສເນ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຉມາຍໍ ນິສີທິຕ຺ວາ [ນິສິນ຺ເນນ (ອຏ຺ຐກຖາ)] ອາສເນ ນິສິນ຺ນສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ຉມາຍໍ ນິສີທິຕ຺ວາ ອາສເນ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ອຏ຺ຐມສິກ຺ຂາປທໍ ນິຏ຺ຐິຕໍ.

໖໔໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ຘມ຺ມໍ ເທເສນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ຘມ຺ມໍ ເທເສສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ຘມ຺ມໍ ເທເສຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ຘມ຺ມໍ ເທເສສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ວິຄຣຫິຕ຺ວາ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ –

໖໔໗. ‘‘ຠູຕປຸພ຺ພໍ, ຠິກ຺ຂເວ, ພາຣາຓສິຍໍ ອຎ຺ຎຕຣສ຺ສ ຉປກສ຺ສ [ຉວກສ຺ສ (ສ຺ຍາ.)] ປຊາປຕິ ຄພ຺ຠິນີ ອໂຫສິ. ອຖ ໂຂ, ຠິກ຺ຂເວ, ສາ ຉປກີ ຕໍ ຉປກໍ ເອຕທໂວຈ – ‘ຄພ຺ຠິນີມ຺ຫິ, ອຍ຺ຍປຸຕ຺ຕ! ອິຈ຺ຉາມິ ອມ຺ພໍ ຂາທິຕຸ’ນ຺ຕິ. ‘ນຕ຺ຖິ ອມ຺ພໍ [ອມ຺ໂພ (ສ຺ຍາ.)], ອກາໂລ ອມ຺ພສ຺ສາ’ຕິ. ‘ສເຈ ນ ລຠິສ຺ສາມິ ມຣິສ຺ສາມີ’ຕິ. ເຕນ ໂຂ ປນ ສມເຍນ, ຣຎ຺ໂຎ ອມ຺ໂພ ຘຸວຜໂລ ໂຫຕິ. ອຖ ໂຂ, ຠິກ຺ຂເວ, ໂສ ຉປໂກ ເຍນ ໂສ ອມ຺ໂພ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ອມ຺ພໍ ອຠິຣຸຫິຕ຺ວາ ນິລີໂນ ອຈ຺ຉິ. ອຖ ໂຂ, ຠິກ຺ຂເວ, ຣາຊາ ປຸໂຣຫິເຕນ ພ຺ຣາຫ຺ມເຓນ ສທ຺ຘິໍ ເຍນ ໂສ ອມ຺ໂພ ເຕນຸປສງ຺ກມິ; ອຸປສງ຺ກມິຕ຺ວາ ອຸຈ຺ເຈ ອາສເນ ນິສີທິຕ຺ວາ ມນ຺ຕໍ ປຣິຍາປຸຓາຕິ. ອຖ ໂຂ, ຠິກ຺ຂເວ, ຕສ຺ສ ຉປກສ຺ສ ເອຕທໂຫສິ – ‘ຍາວ ອຘມ຺ມິໂກ ອຍໍ ຣາຊາ, ຍຕ຺ຣ ຫິ ນາມ ອຸຈ຺ເຈ ອາສເນ ນິສີທິຕ຺ວາ ມນ຺ຕໍ ປຣິຍາປຸຓິສ຺ສຕິ. ອຍຎ຺ຈ ພ຺ຣາຫ຺ມໂຓ ອຘມ຺ມິໂກ, ຍຕ຺ຣ ຫິ ນາມ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ມນ຺ຕໍ ວາເຈສ຺ສຕິ. ອຫຎ຺ຈມ຺ຫິ ອຘມ຺ມິໂກ, ໂຍຫໍ ອິຕ຺ຖິຍາ ກາຣຓາ ຣຎ຺ໂຎ ອມ຺ພໍ ອວຫຣາມິ. ສພ຺ພມິທໍ ຈຣິມໍ ກຕ’ນ຺ຕິ ຕຕ຺ເຖວ ປຣິປຕິ.

[ອິມາ ຄາຖາໂຍ ຊາ. ໑.໔.໓໓-໓໕ ຊາຕເກ ອຎ຺ຎຖາ ທິສ຺ສນ຺ຕິ] ‘‘ອຸໂຠ ອຕ຺ຖໍ ນ ຊານນ຺ຕິ, ອຸໂຠ ຘມ຺ມໍ ນ ປສ຺ສເຣ;

ໂຍ ຈາຍໍ ມນ຺ຕໍ ວາເຈຕິ, ໂຍ ຈາຘມ຺ເມນຘີຍຕິ.

‘‘ສາລີນໍ ໂອທໂນ ຠຸຕ຺ໂຕ, ສຸຈິມໍສູປເສຈໂນ;

ຕສ຺ມາ ຘມ຺ເມ ນ ວຕ຺ຕາມິ, ຘມ຺ໂມ ອຣິເຍຠິ ວຓ຺ຓິໂຕ.

‘‘ຘິຣຕ຺ຖຸ ຕໍ ຘນລາຠໍ, ຍສລາຠຎ຺ຈ ພ຺ຣາຫ຺ມຓ;

ຍາ ວຸຕ຺ຕິ ວິນິປາເຕນ, ອຘມ຺ມຈຣເຓນ ວາ.

‘‘ປຣິພ຺ພຊ ມຫາພ຺ຣຫ຺ເມ, ປຈນ຺ຕຎ຺ເຎປິ ປາຓິໂນ;

ມາ ຕ຺ວໍ ອຘມ຺ໂມ ອາຈຣິໂຕ, ອສ຺ມາ ກຸມ຺ຠມິວາຠິທາ’’ຕິ.

‘‘ຕທາປິ ເມ, ຠິກ຺ຂເວ, ອມນາປາ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ມນ຺ຕໍ ວາເຈຕຸໍ, ກິມງ຺ຄ ປນ ເອຕຣຫິ ນ ອມນາປາ ຠວິສ຺ສຕິ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ຘມ຺ມໍ ເທເສຕຸໍ. ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ນ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ນີເຈ ອາສເນ ນິສີທິຕ຺ວາ ອຸຈ຺ເຈ ອາສເນ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ນວມສິກ຺ຂາປທໍ ນິຏ຺ຐິຕໍ.

໖໔໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຐິຕາ ນິສິນ຺ນສ຺ສ ຘມ຺ມໍ ເທເສນ຺ຕິ…ເປ….

‘‘ນ ຐິໂຕ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຐິເຕນ ນິສິນ຺ນສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ຐິໂຕ ນິສິນ຺ນສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ທສມສິກ຺ຂາປທໍ ນິຏ຺ຐິຕໍ.

໖໔໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປຈ຺ຉໂຕ ຄຈ຺ຉນ຺ຕາ ປຸຣໂຕ ຄຈ຺ຉນ຺ຕສ຺ສ ຘມ຺ມໍ ເທເສນ຺ຕິ…ເປ….

‘‘ນ ປຈ຺ຉໂຕ ຄຈ຺ຉນ຺ໂຕ ປຸຣໂຕ ຄຈ຺ຉນ຺ຕສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ປຈ຺ຉໂຕ ຄຈ຺ຉນ຺ເຕນ ປຸຣໂຕ ຄຈ຺ຉນ຺ຕສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ປຈ຺ຉໂຕ ຄຈ຺ຉນ຺ໂຕ ປຸຣໂຕ ຄຈ຺ຉນ຺ຕສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ເອກາທສມສິກ຺ຂາປທໍ ນິຏ຺ຐິຕໍ.

໖໕໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸປ຺ປເຖນ ຄຈ຺ຉນ຺ຕາ ປເຖນ ຄຈ຺ຉນ຺ຕສ຺ສ ຘມ຺ມໍ ເທເສນ຺ຕິ…ເປ….

‘‘ນ ອຸປ຺ປເຖນ ຄຈ຺ຉນ຺ໂຕ ປເຖນ ຄຈ຺ຉນ຺ຕສ຺ສ ອຄິລານສ຺ສ ຘມ຺ມໍ ເທເສສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸປ຺ປເຖນ ຄຈ຺ຉນ຺ເຕນ ປເຖນ ຄຈ຺ຉນ຺ຕສ຺ສ ອຄິລານສ຺ສ ຘມ຺ໂມ ເທເສຕພ຺ໂພ. ໂຍ ອນາທຣິຍໍ ປຏິຈ຺ຈ ອຸປ຺ປເຖນ ຄຈ຺ຉນ຺ໂຕ ປເຖນ ຄຈ຺ຉນ຺ຕສ຺ສ ອຄິລານສ຺ສ ຘມ຺ມໍ ເທເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ທ຺ວາທສມສິກ຺ຂາປທໍ ນິຏ຺ຐິຕໍ.

໖໕໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຐິຕາ ອຸຈ຺ຈາຣມ຺ປິ ປສ຺ສາວມ຺ປິ ກໂຣນ຺ຕິ…ເປ….

‘‘ນ ຐິໂຕ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຐິເຕນ ອຄິລາເນນ ອຸຈ຺ຈາໂຣ ວາ ປສ຺ສາໂວ ວາ ກາຕພ຺ໂພ. ໂຍ ອນາທຣິຍໍ ປຏິຈ຺ຈ ຐິໂຕ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ກໂຣຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ເຕຣສມສິກ຺ຂາປທໍ ນິຏ຺ຐິຕໍ.

໖໕໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຫຣິເຕ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກໂຣນ຺ຕິ…ເປ….

‘‘ນ ຫຣິເຕ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຫຣິເຕ ອຄິລາເນນ ອຸຈ຺ຈາໂຣ ວາ ປສ຺ສາໂວ ວາ ເຂໂຬ ວາ ກາຕພ຺ໂພ. ໂຍ ອນາທຣິຍໍ ປຏິຈ຺ຈ ຫຣິເຕ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກໂຣຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອປ຺ປຫຣິເຕ ກໂຕ ຫຣິຕໍ ໂອຕ຺ຖຣຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຈຸທ຺ທສມສິກ຺ຂາປທໍ ນິຏ຺ຐິຕໍ.

໖໕໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກໂຣນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກຣິສ຺ສນ຺ຕິ, ເສຍ຺ຍຖາປິ ຄິຫີ ກາມໂຠຄິໂນ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກຣິສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກໂຣຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກຣິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ນ ອຸທເກ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໕໔. ເຕນ ໂຂ ປນ ສມເຍນ ຄິລານາ ຠິກ຺ຂູ ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກາຕຸໍ ກຸກ຺ກຸຈ຺ຈາຍນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ອຸທເກ ອຸຈ຺ຈາຣມ຺ປິ ປສ຺ສາວມ຺ປິ ເຂຬມ຺ປິ ກາຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ນ ອຸທເກ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸທເກ ອຄິລາເນນ ອຸຈ຺ຈາໂຣ ວາ ປສ຺ສາໂວ ວາ ເຂໂຬ ວາ ກາຕພ຺ໂພ. ໂຍ ອນາທຣິຍໍ ປຏິຈ຺ຈ ອຸທເກ ອຄິລາໂນ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ກໂຣຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ຖເລ ກໂຕ ອຸທກໍ ໂອຕ຺ຖຣຕິ, ອາປທາສຸ, ອຸມ຺ມຕ຺ຕກສ຺ສ, ຂິຕ຺ຕຈິຕ຺ຕສ຺ສ, ເວທນາຏ຺ຏສ຺ສ, ອາທິກມ຺ມິກສ຺ສາຕິ.

ປນ຺ນຣສມສິກ຺ຂາປທໍ ນິຏ຺ຐິຕໍ.

ປາທຸກວຄ຺ໂຄ ສຕ຺ຕໂມ.

ອຸທ຺ທິຏ຺ຐາ ໂຂ, ອາຍສ຺ມນ຺ໂຕ, ເສຂິຍາ ຘມ຺ມາ. ຕຕ຺ຖາຍສ຺ມນ຺ເຕ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ທຸຕິຍມ຺ປິ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ຕຕິຍມ຺ປິ ປຸຈ຺ຉາມິ – ‘‘ກຈ຺ຈິຕ຺ຖ ປຣິສຸທ຺ຘາ’’? ປຣິສຸທ຺ເຘຕ຺ຖາຍສ຺ມນ຺ໂຕ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີຕິ.

ເສຂິຍາ ນິຏ຺ຐິຕາ.

ເສຂິຍກຓ຺ຑໍ ນິຏ຺ຐິຕໍ.