໗. ເສຂິຍກຓ຺ຑໍ

໑. ປຣິມຓ຺ຑລວຄ຺ໂຄ

ອິເມ ໂຂ ປນາຍສ຺ມນ຺ໂຕ ເສຂິຍາ

ຘມ຺ມາ ອຸທ຺ເທສໍ ອາຄຈ຺ຉນ຺ຕິ.

໕໗໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ນິວາເສນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ນິວາເສສ຺ສນ຺ຕິ, ເສຍ຺ຍຖາປິ ຄິຫີ ກາມໂຠຄິໂນ’’ຕິ. ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ນິວາເສສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຉພ຺ພຄ຺ຄິເຍ ຠິກ຺ຂູ ປຏິປຸຈ຺ຉິ – ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ນິວາເສຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ນິວາເສສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ປຣິມຓ຺ຑລໍ ນິວາເສສ຺ສາມີຕິ ສິກ຺ຂາ ກຣຓີຍາ’’ຕິ.

ປຣິມຓ຺ຑລໍ ນິວາເສຕພ຺ພໍ ນາຠິມຓ຺ຑລໍ ຊາຓຸມຓ຺ຑລໍ ປຏິຈ຺ຉາເທນ຺ເຕນ. ໂຍ ອນາທຣິຍໍ ປຏິຈ຺ຈ ປຸຣໂຕ ວາ ປຈ຺ຉໂຕ ວາ ໂອລມ຺ເພນ຺ໂຕ ນິວາເສຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ປຐມສິກ຺ຂາປທໍ ນິຏ຺ຐິຕໍ.

໕໗໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປຸຣໂຕປິ ປຈ຺ຉໂຕປິ ໂອລມ຺ເພນ຺ຕາ ປາຣຸປນ຺ຕິ…ເປ….

‘‘ປຣິມຓ຺ຑລໍ ປາຣຸປິສ຺ສາມີຕິ ສິກ຺ຂາ ກຣຓີຍາ’’ຕິ.

ປຣິມຓ຺ຑລໍ ປາຣຸປິຕພ຺ພໍ ອຸໂຠ ກຓ຺ເຓ ສມໍ ກຕ຺ວາ. ໂຍ ອນາທຣິຍໍ ປຏິຈ຺ຈ ປຸຣໂຕ ວາ ປຈ຺ຉໂຕ ວາ ໂອລມ຺ເພນ຺ໂຕ ປາຣຸປຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ທຸຕິຍສິກ຺ຂາປທໍ ນິຏ຺ຐິຕໍ.

໕໗໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ກາຍໍ ວິວຣິຕ຺ວາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ສຸປ຺ປຏິຈ຺ຉນ຺ໂນ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ສຸປ຺ປຏິຈ຺ຉນ຺ເນນ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ກາຍໍ ວິວຣິຕ຺ວາ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໕໗໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ກາຍໍ ວິວຣິຕ຺ວາ ອນ຺ຕຣຆເຣ ນິສີທນ຺ຕິ…ເປ….

‘‘ສຸປ຺ປຏິຈ຺ຉນ຺ໂນ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ສຸປ຺ປຏິຈ຺ຉນ຺ເນນ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ກາຍໍ ວິວຣິຕ຺ວາ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ວາສູປຄຕສ຺ສ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໕໘໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຫຕ຺ຖມ຺ປິ ປາທມ຺ປິ ກີຬາເປນ຺ຕາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ສຸສໍວຸໂຕ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ສຸສໍວຸເຕນ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ຫຕ຺ຖໍ ວາ ປາທໍ ວາ ກີຬາເປນ຺ໂຕ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໕໘໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຫຕ຺ຖມ຺ປິ ປາທມ຺ປິ ກີຬາເປນ຺ຕາ ອນ຺ຕຣຆເຣ ນິສີທນ຺ຕິ…ເປ….

‘‘ສຸສໍວຸໂຕ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ສຸສໍວຸເຕນ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ຫຕ຺ຖໍ ວາ ປາທໍ ວາ ກີຬາເປນ຺ໂຕ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ຉຏ຺ຐສິກ຺ຂາປທໍ ນິຏ຺ຐິຕໍ.

໕໘໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຕຫໍ ຕຫໍ ໂອໂລເກນ຺ຕາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ໂອກ຺ຂິຕ຺ຕຈກ຺ຂຸ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ໂອກ຺ຂິຕ຺ຕຈກ຺ຂຸນາ ອນ຺ຕຣຆເຣ ຄນ຺ຕພ຺ພໍ ຍຸຄມຕ຺ຕໍ ເປກ຺ຂນ຺ເຕນ. ໂຍ ອນາທຣິຍໍ ປຏິຈ຺ຈ ຕຫໍ ຕຫໍ ໂອໂລເກນ຺ໂຕ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.

໕໘໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຕຫໍ ຕຫໍ ໂອໂລເກນ຺ຕາ ອນ຺ຕຣຆເຣ ນິສີທນ຺ຕິ…ເປ….

‘‘ໂອກ຺ຂິຕ຺ຕຈກ຺ຂຸ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ໂອກ຺ຂິຕ຺ຕຈກ຺ຂຸນາ ອນ຺ຕຣຆເຣ ນິສີທິຕພ຺ພໍ ຍຸຄມຕ຺ຕໍ ເປກ຺ຂນ຺ເຕນ. ໂຍ ອນາທຣິຍໍ ປຏິຈ຺ຈ ຕຫໍ ຕຫໍ ໂອໂລເກນ຺ໂຕ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ອຏ຺ຐມສິກ຺ຂາປທໍ ນິຏ຺ຐິຕໍ.

໕໘໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸກ຺ຂິຕ຺ຕກາຍ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ນ ອຸກ຺ຂິຕ຺ຕກາຍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸກ຺ຂິຕ຺ຕກາຍ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ເອກໂຕ ວາ ອຸຠໂຕ ວາ ອຸກ຺ຂິປິຕ຺ວາ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ນວມສິກ຺ຂາປທໍ ນິຏ຺ຐິຕໍ.

໕໘໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸກ຺ຂິຕ຺ຕກາຍ ອນ຺ຕຣຆເຣ ນິສີທນ຺ຕິ…ເປ….

‘‘ນ ອຸກ຺ຂິຕ຺ຕກາຍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸກ຺ຂິຕ຺ຕກາຍ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ເອກໂຕ ວາ ອຸຠໂຕ ວາ ອຸກ຺ຂິປິຕ຺ວາ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ທສມສິກ຺ຂາປທໍ ນິຏ຺ຐິຕໍ.

ປຣິມຓ຺ຑລວຄ຺ໂຄ ປຐໂມ.

໒. ອຸຊ຺ຊຄ຺ຆິກວຄ຺ໂຄ

໕໘໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ມຫາຫສິຕໍ ຫສນ຺ຕາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ນ ອຸຊ຺ຊຄ຺ຆິກາຍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸຊ຺ຊຄ຺ຆິກາຍ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ມຫາຫສິຕໍ ຫສນ຺ໂຕ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ຫສນີຍສ຺ມິໍ ວຕ຺ຖຸສ຺ມິໍ ມິຫິຕມຕ຺ຕໍ ກໂຣຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຐມສິກ຺ຂາປທໍ ນິຏ຺ຐິຕໍ.

໕໘໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ມຫາຫສິຕໍ ຫສນ຺ຕາ ອນ຺ຕຣຆເຣ ນິສີທນ຺ຕິ…ເປ….

‘‘ນ ອຸຊ຺ຊຄ຺ຆິກາຍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸຊ຺ຊຄ຺ຆິກາຍ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ມຫາຫສິຕໍ ຫສນ຺ໂຕ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ທຸຕິຍສິກ຺ຂາປທໍ ນິຏ຺ຐິຕໍ.

໕໘໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ຕາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ອປ຺ປສທ຺ໂທ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ອປ຺ປສທ຺ເທນ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ໂຕ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໕໘໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ຕາ ອນ຺ຕຣຆເຣ ນິສີທນ຺ຕິ…ເປ….

‘‘ອປ຺ປສທ຺ໂທ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ອປ຺ປສທ຺ເທນ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ໂຕ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໕໙໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ກາຍປ຺ປຈາລກໍ ອນ຺ຕຣຆເຣ ຄຈ຺ຉນ຺ຕິ ກາຍໍ ໂອລມ຺ເພນ຺ຕາ…ເປ….

‘‘ນ ກາຍປ຺ປຈາລກໍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ກາຍປ຺ປຈາລກໍ ອນ຺ຕຣຆເຣ ຄນ຺ຕພ຺ພໍ. ກາຍໍ ປຄ຺ຄເຫຕ຺ວາ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ກາຍປ຺ປຈາລກໍ ອນ຺ຕຣຆເຣ ຄຈ຺ຉຕິ ກາຍໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໕໙໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ກາຍປ຺ປຈາລກໍ ອນ຺ຕຣຆເຣ ນິສີທນ຺ຕິ, ກາຍໍ ໂອລມ຺ເພນ຺ຕາ…ເປ….

‘‘ນ ກາຍປ຺ປຈາລກໍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ກາຍປ຺ປຈາລກໍ ອນ຺ຕຣຆເຣ ນິສີທິຕພ຺ພໍ. ກາຍໍ ປຄ຺ຄເຫຕ຺ວາ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ກາຍປ຺ປຈາລກໍ ອນ຺ຕຣຆເຣ ນິສີທຕິ ກາຍໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ຉຏ຺ຐສິກ຺ຂາປທໍ ນິຏ຺ຐິຕໍ.

໕໙໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ພາຫຸປ຺ປຈາລກໍ ອນ຺ຕຣຆເຣ ຄຈ຺ຉນ຺ຕິ ພາຫຸໍ ໂອລມ຺ເພນ຺ຕາ…ເປ….

‘‘ນ ພາຫຸປ຺ປຈາລກໍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ພາຫຸປ຺ປຈາລກໍ ອນ຺ຕຣຆເຣ ຄນ຺ຕພ຺ພໍ. ພາຫຸໍ ປຄ຺ຄເຫຕ຺ວາ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ພາຫຸປ຺ປຈາລກໍ ອນ຺ຕຣຆເຣ ຄຈ຺ຉຕິ ພາຫຸໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.

໕໙໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ພາຫຸປ຺ປຈາລກໍ ອນ຺ຕຣຆເຣ ນິສີທນ຺ຕິ ພາຫຸໍ ໂອລມ຺ເພນ຺ຕາ…ເປ….

‘‘ນ ພາຫຸປ຺ປຈາລກໍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ພາຫຸປ຺ປຈາລກໍ ອນ຺ຕຣຆເຣ ນິສີທິຕພ຺ພໍ. ພາຫຸໍ ປຄ຺ຄເຫຕ຺ວາ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ພາຫຸປ຺ປຈາລກໍ ອນ຺ຕຣຆເຣ ນິສີທຕິ ພາຫຸໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ອຏ຺ຐມສິກ຺ຂາປທໍ ນິຏ຺ຐິຕໍ.

໕໙໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສີສປ຺ປຈາລກໍ ອນ຺ຕຣຆເຣ ຄຈ຺ຉນ຺ຕິ ສີສໍ ໂອລມ຺ເພນ຺ຕາ…ເປ….

‘‘ນ ສີສປ຺ປຈາລກໍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ສີສປ຺ປຈາລກໍ ອນ຺ຕຣຆເຣ ຄນ຺ຕພ຺ພໍ. ສີສໍ ປຄ຺ຄເຫຕ຺ວາ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ສີສປ຺ປຈາລກໍ ອນ຺ຕຣຆເຣ ຄຈ຺ຉຕິ ສີສໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ນວມສິກ຺ຂາປທໍ ນິຏ຺ຐິຕໍ.

໕໙໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສີສປ຺ປຈາລກໍ ອນ຺ຕຣຆເຣ ນິສີທນ຺ຕິ ສີສໍ ໂອລມ຺ເພນ຺ຕາ…ເປ….

‘‘ນ ສີສປ຺ປຈາລກໍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ສີສປ຺ປຈາລກໍ ອນ຺ຕຣຆເຣ ນິສີທິຕພ຺ພໍ. ສີສໍ ປຄ຺ຄເຫຕ຺ວາ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ສີສປ຺ປຈາລກໍ ອນ຺ຕຣຆເຣ ນິສີທຕິ ສີສໍ ໂອລມ຺ເພນ຺ໂຕ, ອາປຕ຺ຕິ ທຸກ຺ກຏສ຺ສ.

ທສມສິກ຺ຂາປທໍ ນິຏ຺ຐິຕໍ.

ອຸຊ຺ຊຄ຺ຆິກວຄ຺ໂຄ ທຸຕິໂຍ.

໓. ຂມ຺ຠກຕວຄ຺ໂຄ

໕໙໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຂມ຺ຠກຕາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ນ ຂມ຺ຠກໂຕ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຂມ຺ຠກເຕນ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ເອກໂຕ ວາ ອຸຠໂຕ ວາ ຂມ຺ຠໍ ກຕ຺ວາ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ປຐມສິກ຺ຂາປທໍ ນິຏ຺ຐິຕໍ.

໕໙໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຂມ຺ຠກຕາ ອນ຺ຕຣຆເຣ ນິສີທນ຺ຕິ…ເປ….

‘‘ນ ຂມ຺ຠກໂຕ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຂມ຺ຠກເຕນ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ເອກໂຕ ວາ ອຸຠໂຕ ວາ ຂມ຺ຠໍ ກຕ຺ວາ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ທຸຕິຍສິກ຺ຂາປທໍ ນິຏ຺ຐິຕໍ.

໕໙໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສສີສໍ ປາຣຸປິຕ຺ວາ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ນ ໂອຄຸຓ຺ຐິໂຕ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ໂອຄຸຓ຺ຐິເຕນ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ສສີສໍ ປາຣຸປິຕ຺ວາ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໕໙໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສສີສໍ ປາຣຸປິຕ຺ວາ ອນ຺ຕຣຆເຣ ນິສີທນ຺ຕິ…ເປ….

‘‘ນ ໂອຄຸຓ຺ຐິໂຕ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ໂອຄຸຓ຺ຐິເຕນ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ສສີສໍ ປາຣຸປິຕ຺ວາ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໖໐໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸກ຺ກຸຏິກາຍ ອນ຺ຕຣຆເຣ ຄຈ຺ຉນ຺ຕິ…ເປ….

‘‘ນ ອຸກ຺ກຸຏິກາຍ ອນ຺ຕຣຆເຣ ຄມິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸກ຺ກຸຏິກາຍ ອນ຺ຕຣຆເຣ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ອຸກ຺ກຸຏິກາຍ ອນ຺ຕຣຆເຣ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໖໐໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປລ຺ລຕ຺ຖິກາຍ [ປລ຺ລຕ຺ຕິກາຍ (ກ.)] ອນ຺ຕຣຆເຣ ນິສີທນ຺ຕິ…ເປ….

‘‘ນ ປລ຺ລຕ຺ຖິກາຍ ອນ຺ຕຣຆເຣ ນິສີທິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ປລ຺ລຕ຺ຖິກາຍ ອນ຺ຕຣຆເຣ ນິສີທິຕພ຺ພໍ. ໂຍ ອນາທຣິຍໍ ປຏິຈ຺ຈ ຫຕ຺ຖປລ຺ລຕ຺ຖິກາຍ ວາ ທຸສ຺ສປລ຺ລຕ຺ຖິກາຍ ວາ ອນ຺ຕຣຆເຣ ນິສີທຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ວາສູປຄຕສ຺ສ, ອາປທາສຸ,

ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຉຏ຺ຐສິກ຺ຂາປທໍ ນິຏ຺ຐິຕໍ.

໖໐໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອສກ຺ກຈ຺ຈໍ ປິຓ຺ຑປາຕໍ ປຏິຄ຺ຄຓ຺ຫນ຺ຕິ ຉຑ຺ເຑຕຸກາມາ ວິຍ…ເປ….

‘‘ສກ຺ກຈ຺ຈໍ ປິຓ຺ຑປາຕໍ ປຏິຄ຺ຄເຫສ຺ສາມີຕິ ສິກ຺ຂາ ກຣຓີຍາ’’ຕິ.

ສກ຺ກຈ຺ຈໍ ປິຓ຺ຑປາໂຕ ປຏິຄ຺ຄເຫຕພ຺ໂພ. ໂຍ ອນາທຣິຍໍ ປຏິຈ຺ຈ ອສກ຺ກຈ຺ຈໍ ປິຓ຺ຑປາຕໍ ປຏິຄ຺ຄຓ຺ຫາຕິ ຉຑ຺ເຑຕຸກາໂມ ວິຍ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.