໔. ສກ຺ກຈ຺ຈວຄ຺ໂຄ

໖໐໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອສກ຺ກຈ຺ຈໍ ປິຓ຺ຑປາຕໍ ຠຸຎ຺ຊນ຺ຕິ ອຠຸຎ຺ຊິຕຸກາມາ ວິຍ…ເປ….

‘‘ສກ຺ກຈ຺ຈໍ ປິຓ຺ຑປາຕໍ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ສກ຺ກຈ຺ຈໍ ປິຓ຺ຑປາໂຕ ຠຸຎ຺ຊິຕພ຺ໂພ. ໂຍ ອນາທຣິຍໍ ປຏິຈ຺ຈ ອສກ຺ກຈ຺ຈໍ ປິຓ຺ຑປາຕໍ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອາປທາສຸ, ອຸມ຺ມຕ຺ຕກສ຺ສ,

ອາທິກມ຺ມິກສ຺ສາຕິ.

ປຐມສິກ຺ຂາປທໍ ນິຏ຺ຐິຕໍ.

໖໐໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຕຫໍ ຕຫໍ ໂອໂລເກນ຺ຕາ ປິຓ຺ຑປາຕໍ ຠຸຎ຺ຊນ຺ຕິ, ອາກິຣນ຺ເຕປິ ອຕິກ຺ກນ຺ເຕປິ ນ ຊານນ຺ຕິ…ເປ….

‘‘ປຕ຺ຕສຎ຺ຎີ ປິຓ຺ຑປາຕໍ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ປຕ຺ຕສຎ຺ຎິນາ ປິຓ຺ຑປາໂຕ ຠຸຎ຺ຊິຕພ຺ໂພ. ໂຍ ອນາທຣິຍໍ ປຏິຈ຺ຈ ຕຫໍ ຕຫໍ ໂອໂລເກນ຺ໂຕ ປິຓ຺ຑປາຕໍ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ…ເປ… ອາທິກມ຺ມິກສ຺ສາຕິ.

ທຸຕິຍສິກ຺ຂາປທໍ ນິຏ຺ຐິຕໍ.

໖໐໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຕຫໍ ຕຫໍ ໂອມສິຕ຺ວາ [ໂອມທ຺ທິຕ຺ວາ (ກ.)] ປິຓ຺ຑປາຕໍ ຠຸຎ຺ຊນ຺ຕິ…ເປ….

‘‘ສປທານໍ ປິຓ຺ຑປາຕໍ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ສປທານໍ ປິຓ຺ຑປາໂຕ ຠຸຎ຺ຊິຕພ຺ໂພ. ໂຍ ອນາທຣິຍໍ ປຏິຈ຺ຈ ຕຫໍ ຕຫໍ ໂອມສິຕ຺ວາ [ໂອມທ຺ທິຕ຺ວາ (ກ.)] ປິຓ຺ຑປາຕໍ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ອຎ຺ເຎສໍ ເທນ຺ໂຕ ໂອມສຕິ, ອຎ຺ຎສ຺ສ ຠາຊເນ ອາກິຣນ຺ໂຕ ໂອມສຕິ, ອຸຕ຺ຕຣິຠງ຺ເຄ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຕຕິຍສິກ຺ຂາປທໍ ນິຏ຺ຐິຕໍ.

໖໐໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ປິຓ຺ຑປາຕໍ ຠຸຎ຺ຊນ຺ຕາ ສູປຎ຺ເຎວ ພຫຸໍ ຠຸຎ຺ຊນ຺ຕິ…ເປ….

‘‘ສມສູປກໍ ປິຓ຺ຑປາຕໍ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ສູໂປ ນາມ ທ຺ເວ ສູປາ – ມຸຄ຺ຄສູໂປ, ມາສສູໂປ ຫຕ຺ຖຫາຣິໂຍ. ສມສູປໂກ ປິຓ຺ຑປາໂຕ ຠຸຎ຺ຊິຕພ຺ໂພ. ໂຍ ອນາທຣິຍໍ ປຏິຈ຺ຈ ສູປຎ຺ເຎວ ພຫຸໍ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ຣສຣເສ, ຎາຕການໍ ປວາຣິຕານໍ, ອຕ຺ຕໂນ ຘເນນ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຈຕຸຕ຺ຖສິກ຺ຂາປທໍ ນິຏ຺ຐິຕໍ.

໖໑໐. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຖູປກໂຕ ໂອມທ຺ທິຕ຺ວາ ປິຓ຺ຑປາຕໍ ຠຸຎ຺ຊນ຺ຕິ…ເປ….

‘‘ນ ຖູປກໂຕ ໂອມທ຺ທິຕ຺ວາ ປິຓ຺ຑປາຕໍ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ຖູປກໂຕ ໂອມທ຺ທິຕ຺ວາ ປິຓ຺ຑປາໂຕ ຠຸຎ຺ຊິຕພ຺ໂພ. ໂຍ ອນາທຣິຍໍ ປຏິຈ຺ຈ ຖູປກໂຕ ໂອມທ຺ທິຕ຺ວາ ປິຓ຺ຑປາຕໍ ຠຸຎ຺ຊຕິ ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ປຣິຕ຺ຕເກ ເສເສ ເອກໂຕ ສໍກຑ຺ຒິຕ຺ວາ ໂອມທ຺ທິຕ຺ວາ ຠຸຎ຺ຊຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຎ຺ຈມສິກ຺ຂາປທໍ ນິຏ຺ຐິຕໍ.

໖໑໑. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສູປມ຺ປິ ພ຺ຍຎ຺ຊນມ຺ປິ ໂອທເນນ ປຏິຈ຺ຉາເທນ຺ຕິ ຠິຍ຺ໂຍກມ຺ຍຕໍ ອຸປາທາຍ…ເປ….

‘‘ນ ສູປໍ ວາ ພ຺ຍຎ຺ຊນໍ ວາ ໂອທເນນ ປຏິຈ຺ຉາເທສ຺ສາມິ ຠິຍ຺ໂຍກມ຺ຍຕໍ ອຸປາທາຍາຕິ ສິກ຺ຂາ ກຣຓີຍາ’’ຕິ.

ນ ສູປໍ ວາ ພ຺ຍຎ຺ຊນໍ ວາ ໂອທເນນ ປຏິຈ຺ຉາເທຕພ຺ພໍ ຠິຍ຺ໂຍກມ຺ຍຕໍ ອຸປາທາຍ. ໂຍ ອນາທຣິຍໍ ປຏິຈ຺ຈ ສູປໍ ວາ ພ຺ຍຎ຺ຊນໍ ວາ ໂອທເນນ ປຏິຈ຺ຉາເທຕິ ຠິຍ຺ໂຍກມ຺ຍຕໍ ອຸປາທາຍ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ສາມິກາ ປຏິຈ຺ຉາເທຕ຺ວາ ເທນ຺ຕິ, ນ ຠິຍ຺ໂຍກມ຺ຍຕໍ ອຸປາທາຍ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຉຏ຺ຐສິກ຺ຂາປທໍ ນິຏ຺ຐິຕໍ.

໖໑໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສນ຺ຕິ! ກສ຺ສ ສມ຺ປນ຺ນໍ ນ ມນາປໍ! ກສ຺ສ ສາທຸໍ ນ ຣຸຈ຺ຈຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ນ ສູປໍ ວາ ໂອທນໍ ວາ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໖໑໓. ເຕນ ໂຂ ປນ ສມເຍນ ຠິກ຺ຂູ ຄິລານາ ໂຫນ຺ຕິ. ຄິລານປຸຈ຺ຉກາ ຠິກ຺ຂູ ຄິລາເນ ຠິກ຺ຂູ ເອຕທໂວຈຸໍ – ‘‘ກຈ຺ຈາວຸໂສ, ຂມນີຍໍ, ກຈ຺ຈິ ຍາປນີຍ’’ນ຺ຕິ? ‘‘ປຸພ຺ເພ ມຍໍ, ອາວຸໂສ, ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊາມ, ເຕນ ໂນ ຜາສຸ ໂຫຕິ. ອິທານິ ປນ – ‘‘ຠຄວຕາ ປຏິກ຺ຂິຕ຺ຕ’’ນ຺ຕິ ກຸກ຺ກຸຈ຺ຈາຍນ຺ຕາ ນ ວິຎ຺ຎາເປມ, ເຕນ ໂນ ນ ຜາສຸ ໂຫຕີ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ສູປມ຺ປິ ໂອທນມ຺ປິ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ນ ສູປໍ ວາ ໂອທນໍ ວາ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິສ຺ສາມີຕິ ສິກ຺ຂາ ກຣຓີຍາ’’ຕິ.

ນ ສູປໍ ວາ ໂອທນໍ ວາ ອຄິລາເນນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊິຕພ຺ພໍ. ໂຍ ອນາທຣິຍໍ ປຏິຈ຺ຈ ສູປໍ ວາ ໂອທນໍ ວາ ອຄິລາໂນ ອຕ຺ຕໂນ ອຕ຺ຖາຍ ວິຎ຺ຎາເປຕ຺ວາ ຠຸຎ຺ຊຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ຎາຕການໍ ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ສຕ຺ຕມສິກ຺ຂາປທໍ ນິຏ຺ຐິຕໍ.

໖໑໔. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸຊ຺ຌານສຎ຺ຎີ ປເຣສໍ ປຕ຺ຕໍ ໂອໂລເກນ຺ຕິ…ເປ….

‘‘ນ ອຸຊ຺ຌານສຎ຺ຎີ ປເຣສໍ ປຕ຺ຕໍ ໂອໂລເກສ຺ສາມີຕິ ສິກ຺ຂາ ກຣຓີຍາ’’ຕິ.

ນ ອຸຊ຺ຌານສຎ຺ຎິນາ ປເຣສໍ ປຕ຺ໂຕ ໂອໂລເກຕພ຺ໂພ. ໂຍ ອນາທຣິຍໍ ປຏິຈ຺ຈ ອຸຊ຺ຌານສຎ຺ຎີ ປເຣສໍ ປຕ຺ຕໍ ໂອໂລເກຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ‘‘ທສ຺ສາມີ’’ຕິ ວາ ‘‘ທາເປສ຺ສາມີ’’ຕິ ວາ ໂອໂລເກຕິ, ນ ອຸຊ຺ຌານສຎ຺ຎິສ຺ສ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອຏ຺ຐມສິກ຺ຂາປທໍ ນິຏ຺ຐິຕໍ.

໖໑໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ມຫນ຺ຕໍ ກພຬໍ ກໂຣນ຺ຕິ…ເປ….

‘‘ນາຕິມຫນ຺ຕໍ ກພຬໍ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ນາຕິມຫນ຺ໂຕ ກພໂຬ ກາຕພ຺ໂພ. ໂຍ ອນາທຣິຍໍ ປຏິຈ຺ຈ ມຫນ຺ຕໍ ກພຬໍ ກໂຣຕິ, ອາປຕ຺ຕິ ທຸກ຺ກຏສ຺ສ.

ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ຄິລານສ຺ສ, ຂຊ຺ຊເກ, ຜລາຜເລ, ອຸຕ຺ຕຣິຠງ຺ເຄ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ນວມສິກ຺ຂາປທໍ ນິຏ຺ຐິຕໍ.

໖໑໖. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ທີຆໍ ອາໂລປໍ ກໂຣນ຺ຕິ…ເປ….

‘‘ປຣິມຓ຺ຑລໍ ອາໂລປໍ ກຣິສ຺ສາມີຕິ ສິກ຺ຂາ ກຣຓີຍາ’’ຕິ.

ປຣິມຓ຺ຑໂລ ອາໂລໂປ ກາຕພ຺ໂພ. ໂຍ ອນາທຣິຍໍ ປຏິຈ຺ຈ ທີຆໍ ອາໂລປໍ ກໂຣຕິ, ອາປຕ຺ຕິ ທຸກ຺ກຏສ຺ສ.

ທສມສິກ຺ຂາປທໍ ນິຏ຺ຐິຕໍ.

ສກ຺ກຈ຺ຈວຄ຺ໂຄ ຈຕຸຕ຺ໂຖ.