໑. ປຐມປາຏິເທສນີຍສິກ຺ຂາປທໍ

ອິເມ ໂຂ ປນາຍສ຺ມນ຺ໂຕ ຈຕ຺ຕາໂຣ ປາຏິເທສນີຍາ

ຘມ຺ມາ ອຸທ຺ເທສໍ ອາຄຈ຺ຉນ຺ຕິ.

໕໕໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕຣາ ຠິກ຺ຂຸນີ ສາວຕ຺ຖິຍໍ ປິຓ຺ຑາຍ ຈຣິຕ຺ວາ ປຏິກ຺ກມນກາເລ ອຎ຺ຎຕຣໍ ຠິກ຺ຂຸໍ ປສ຺ສິຕ຺ວາ ເອຕທໂວຈ – ‘‘ຫນ຺ທາຍ຺ຍ, ຠິກ຺ຂໍ ປຏິຄ຺ຄຓ຺ຫາ’’ຕິ. ‘‘ສຸຏ຺ຐຸ, ຠຄິນີ’’ຕິ ສພ຺ເພວ ອຄ຺ຄເຫສິ. ສາ ອຸປກຏ຺ເຐ ກາເລ ນາສກ຺ຂິ ປິຓ຺ຑາຍ ຈຣິຕຸໍ, ຉິນ຺ນຠຕ຺ຕາ ອໂຫສິ. ອຖ ໂຂ ສາ ຠິກ຺ຂຸນີ ທຸຕິຍມ຺ປິ ທິວສໍ…ເປ… ຕຕິຍມ຺ປິ ທິວສໍ ສາວຕ຺ຖິຍໍ ປິຓ຺ຑາຍ ຈຣິຕ຺ວາ ປຏິກ຺ກມນກາເລ ຕໍ ຠິກ຺ຂຸໍ ປສ຺ສິຕ຺ວາ ເອຕທໂວຈ – ‘‘ຫນ຺ທາຍ຺ຍ, ຠິກ຺ຂໍ ປຏິຄ຺ຄຓ຺ຫາ’’ຕິ. ‘‘ສຸຏ຺ຐຸ, ຠຄິນີ’’ຕິ ສພ຺ເພວ ອຄ຺ຄເຫສິ. ສາ ອຸປກຏ຺ເຐ ກາເລ ນາສກ຺ຂິ ປິຓ຺ຑາຍ ຈຣິຕຸໍ, ຉິນ຺ນຠຕ຺ຕາ ອໂຫສິ. ອຖ ໂຂ ສາ ຠິກ຺ຂຸນີ ຈຕຸຕ຺ເຖ ທິວເສ ຣຖິກາຍ ປເວເຘນ຺ຕີ ຄຈ຺ຉຕິ. ເສຏ຺ຐິ ຄຫປຕິ ຣເຖນ ປຏິປຖໍ ອາຄຈ຺ຉນ຺ໂຕ ຕໍ ຠິກ຺ຂຸນິໍ ເອຕທໂວຈ – ‘‘ອເປຫາຍ຺ເຍ’’ຕິ. ສາ ໂວກ຺ກມນ຺ຕີ ຕຕ຺ເຖວ ປຣິປຕິ. ເສຏ຺ຐິ ຄຫປຕິ ຕໍ ຠິກ຺ຂຸນິໍ ຂມາເປສິ – ‘‘ຂມາຫາຍ຺ເຍ, ມຍາສິ ປາຕິຕາ’’ຕິ. ‘‘ນາຫໍ, ຄຫປຕິ, ຕຍາ ປາຕິຕາ. ອປິຈ, ອຫເມວ ທຸພ຺ພລາ’’ຕິ. ‘‘ກິສ຺ສ ປນ ຕ຺ວໍ, ອຍ຺ເຍ, ທຸພ຺ພລາ’’ຕິ? ອຖ ໂຂ ສາ ຠິກ຺ຂຸນີ ເສຏ຺ຐິສ຺ສ ຄຫປຕິສ຺ສ ເອຕມຕ຺ຖໍ ອາໂຣເຈສິ. ເສຏ຺ຐິ ຄຫປຕິ ຕໍ ຠິກ຺ຂຸນິໍ ຆຣໍ ເນຕ຺ວາ ໂຠເຊຕ຺ວາ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠທນ຺ຕາ ຠິກ຺ຂຸນິຍາ ຫຕ຺ຖໂຕ ອາມິສໍ ປຏິຄ຺ຄເຫສ຺ສນ຺ຕິ! ກິຈ຺ຉລາໂຠ ມາຕຸຄາໂມ’’ຕິ!

ອສ຺ໂສສຸໍ ໂຂ ຠິກ຺ຂູ ຕສ຺ສ ເສຏ຺ຐິສ຺ສ ຄຫປຕິສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸ ຠິກ຺ຂຸນິຍາ ຫຕ຺ຖໂຕ ອາມິສໍ ປຏິຄ຺ຄເຫສ຺ສຕີ’’ຕິ …ເປ… ສຈ຺ຈໍ ກິຣ ຕ຺ວໍ, ຠິກ຺ຂຸ, ຠິກ຺ຂຸນິຍາ ຫຕ຺ຖໂຕ ອາມິສໍ ປຏິຄ຺ຄເຫສີຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕິກາ ເຕ, ຠິກ຺ຂຸ, ອຎ຺ຎາຕິກາ’’ຕິ? ‘‘ອຎ຺ຎາຕິກາ, ຠຄວາ’’ຕິ. ‘‘ອຎ຺ຎາຕໂກ, ໂມຆປຸຣິສ, ອຎ຺ຎາຕິກາຍ ນ ຊານາຕິ ປຕິຣູປໍ ວາ ອປ຺ປຕິຣູປໍ ວາ ສນ຺ຕໍ ວາ ອສນ຺ຕໍ ວາ. ກຖຎ຺ຫິ ນາມ ຕ຺ວໍ, ໂມຆປຸຣິສ, ອຎ຺ຎາຕິກາຍ ຠິກ຺ຂຸນິຍາ ຫຕ຺ຖໂຕ ອາມິສໍ ປຏິຄ຺ຄເຫສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໕໕໓. ‘‘ໂຍ ປນ ຠິກ຺ຂຸ ອຎ຺ຎາຕິກາຍ ຠິກ຺ຂຸນິຍາ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປຏິເທເສຕພ຺ພໍ ເຕນ ຠິກ຺ຂຸນາ – ‘ຄາຣຍ຺ຫໍ, ອາວຸໂສ, ຘມ຺ມໍ ອາປຊ຺ຊິໍ ອສປ຺ປາຍໍ ປາຏິເທສນີຍໍ, ຕໍ ປຏິເທເສມີ’’’ຕິ.

໕໕໔. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອຎ຺ຎາຕິກາ ນາມ ມາຕິໂຕ ວາ. ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ຘາ.

ຠິກ຺ຂຸນີ ນາມ ອຸຠໂຕສງ຺ເຆ ອຸປສມ຺ປນ຺ນາ.

ອນ຺ຕຣຆຣໍ ນາມ ຣຖິກາ ພ຺ຍູຫໍ ສິງ຺ຆາຏກໍ ຆຣໍ.

ຂາທນີຍໍ ນາມ ປຎ຺ຈ ໂຠຊນານິ – ຍາມກາລິກໍ ສຕ຺ຕາຫກາລິກໍ ຍາວຊີວິກໍ ຐເປຕ຺ວາ ອວເສສໍ ຂາທນີຍໍ ນາມ.

ໂຠຊນີຍໍ ນາມ ປຎ຺ຈ ໂຠຊນານິ – ໂອທໂນ, ກຸມ຺ມາໂສ, ສຕ຺ຕຸ, ມຈ຺ໂຉ, ມໍສໍ. ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຏິເທສນີຍສ຺ສ.

໕໕໕. ອຎ຺ຎາຕິກາຍ ອຎ຺ຎາຕິກສຎ຺ຎີ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຏິເທສນີຍສ຺ສ. ອຎ຺ຎາຕິກາຍ ເວມຕິໂກ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຏິເທສນີຍສ຺ສ. ອຎ຺ຎາຕິກາຍ ຎາຕິກສຎ຺ຎີ ອນ຺ຕຣຆຣໍ ປວິຏ຺ຐາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ ສຫຕ຺ຖາ ປຏິຄ຺ຄເຫຕ຺ວາ ຂາທຕິ ວາ ຠຸຎ຺ຊຕິ ວາ, ອາປຕ຺ຕິ ປາຏິເທສນີຍສ຺ສ.

ຍາມກາລິກໍ ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ເອກໂຕອຸປສມ຺ປນ຺ນາຍ ຫຕ຺ຖໂຕ ຂາທນີຍໍ ວາ ໂຠຊນີຍໍ ວາ – ‘‘ຂາທິສ຺ສາມິ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ. ຎາຕິກາຍ ອຎ຺ຎາຕິກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕິກາຍ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕິກາຍ ຎາຕິກສຎ຺ຎີ, ອນາປຕ຺ຕິ.

໕໕໖. ອນາປຕ຺ຕິ ຎາຕິກາຍ, ທາເປຕິ ນ ເທຕິ, ອຸປນິກ຺ຂິປິຕ຺ວາ ເທຕິ ອນ຺ຕຣາຣາເມ, ຠິກ຺ຂຸນຸປສ຺ສເຍ, ຕິຕ຺ຖິຍເສຍ຺ຍາຍ, ປຏິກ຺ກມເນ, ຄາມໂຕ ນີຫຣິຕ຺ວາ ເທຕິ, ຍາມກາລິກໍ ສຕ຺ຕາຫກາລິກໍ ຍາວຊີວິກໍ ‘‘ສຕິ ປຈ຺ຈເຍ ປຣິຠຸຎ຺ຊາ’’ຕິ ເທຕິ, ສິກ຺ຂມານາຍ, ສາມເຓຣິຍາ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຐມປາຏິເທສນີຍສິກ຺ຂາປທໍ ນິຏ຺ຐິຕໍ.