໘. ອຸປສ຺ສຸຕິສິກ຺ຂາປທໍ

໔໖໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ເປສເລຫິ ຠິກ຺ຂູຫິ ສທ຺ຘິໍ ຠຓ຺ຑນ຺ຕິ. ເປສລາ ຠິກ຺ຂູ ເອວໍ ວທນ຺ຕິ – ‘‘ອລຊ຺ຊິໂນ ອິເມ, ອາວຸໂສ, ຉພ຺ພຄ຺ຄິຍາ ຠິກ຺ຂູ. ນ ສກ຺ກາ ອິເມຫິ ສຫ ຠຓ຺ຑິຕຸ’’ນ຺ຕິ. ຉພ຺ພຄ຺ຄິຍາ ຠິກ຺ຂູ ເອວໍ ວທນ຺ຕິ – ‘‘ກິສ຺ສ ຕຸມ຺ເຫ, ອາວຸໂສ, ອມ຺ເຫ ອລຊ຺ຊິວາເທນ ປາເປຖາ’’ຕິ? ‘‘ກຫໍ ປນ ຕຸມ຺ເຫ, ອາວຸໂສ, ອສ຺ສຸຕ຺ຖາ’’ຕິ? ‘‘ມຍໍ ອາຍສ຺ມນ຺ຕານໍ ອຸປສ຺ສຸຕິໍ [ອຸປສ຺ສຸຕິ (?)] ຕິຏ຺ຐມ຺ຫາ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຠິກ຺ຂູນໍ ຠຓ຺ຑນຊາຕານໍ ກລຫຊາຕານໍ ວິວາທາປນ຺ນານໍ ອຸປສ຺ສຸຕິໍ [ອຸປສ຺ສຸຕິ (?)] ຕິຏ຺ຐິສ຺ສນ຺ຕີ’’ຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຠິກ຺ຂູນໍ ຠຓ຺ຑນຊາຕານໍ ກລຫຊາຕານໍ ວິວາທາປນ຺ນານໍ ອຸປສ຺ສຸຕິໍ [ອຸປສ຺ສຸຕິ (?)] ຕິຏ຺ຐຖາຕິ? ‘‘ສຈ຺ຈ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຠິກ຺ຂູນໍ ຠຓ຺ຑນຊາຕານໍ ກລຫຊາຕານໍ ວິວາທາປນ຺ນານໍ ອຸປສ຺ສຸຕິໍ [ອຸປສ຺ສຸຕິ (?)] ຕິຏ຺ຐິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໗໐. ‘‘ໂຍ ປນ ຠິກ຺ຂຸ ຠິກ຺ຂູນໍ ຠຓ຺ຑນຊາຕານໍ ກລຫຊາຕານໍ ວິວາທາປນ຺ນານໍ ອຸປສ຺ສຸຕິໍ ຕິຏ຺ເຐຍ຺ຍ – ‘ຍໍ ອິເມ ຠຓິສ຺ສນ຺ຕິ ຕໍ ໂສສ຺ສາມີ’ຕິ ເອຕເທວ ປຈ຺ຈຍໍ ກຣິຕ຺ວາ ອນຎ຺ຎໍ, ປາຈິຕ຺ຕິຍ’’ນ຺ຕິ.

໔໗໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂູນນ຺ຕິ ອຎ຺ເຎສໍ ຠິກ຺ຂູນໍ.

ຠຓ຺ຑນຊາຕານໍ ກລຫຊາຕານໍ ວິວາທາປນ຺ນານນ຺ຕິ ອຘິກຣຓຊາຕານໍ.

ອຸປສ຺ສຸຕິໍ ຕິຏ຺ເຐຍ຺ຍາຕິ ‘‘ອິເມສໍ ສຸຕ຺ວາ ໂຈເທສ຺ສາມິ ສາເຣສ຺ສາມິ ປຏິໂຈເທສ຺ສາມິ ປຏິສາເຣສ຺ສາມິ ມງ຺ກູ ກຣິສ຺ສາມີ’’ຕິ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິໂຕ ສຸຓາຕິ, ອາປຕ຺ຕິ ປາຈິຕ຺ຕິຍສ຺ສ. ປຈ຺ຉໂຕ ຄຈ຺ຉນ຺ໂຕ ຕຸຣິໂຕ ຄຈ຺ຉຕິ ໂສສ຺ສາມີຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິໂຕ ສຸຓາຕິ, ອາປຕ຺ຕິ ປາຈິຕ຺ຕິຍສ຺ສ. ປຸຣໂຕ ຄຈ຺ຉນ຺ໂຕ ໂອຫິຍ຺ຍຕິ ໂສສ຺ສາມີຕິ, ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິໂຕ ສຸຓາຕິ, ອາປຕ຺ຕິ ປາຈິຕ຺ຕິຍສ຺ສ. ຠິກ຺ຂຸສ຺ສ ຐິໂຕກາສໍ ວາ ນິສິນ຺ໂນກາສໍ ວາ ນິປນ຺ໂນກາສໍ ວາ ອາຄນ຺ຕ຺ວາ ມນ຺ເຕນ຺ຕໍ ອຸກ຺ກາສິຕພ຺ພໍ, ວິຊານາເປຕພ຺ພໍ, ໂນ ເຈ ອຸກ຺ກາເສຍ຺ຍ ວາ ວິຊານາເປຍ຺ຍ ວາ, ອາປຕ຺ຕິ ປາຈິຕ຺ຕິຍສ຺ສ.

ເອຕເທວ ປຈ຺ຈຍໍ ກຣິຕ຺ວາ ອນຎ຺ຎນ຺ຕິ ນ ອຎ຺ໂຎ ໂກຈິ ປຈ຺ຈໂຍ ໂຫຕິ ອຸປສ຺ສຸຕິໍ ຕິຏ຺ຐິຕຸໍ.

໔໗໒. ອຸປສມ຺ປນ຺ເນ ອຸປສມ຺ປນ຺ນສຎ຺ຎີ ອຸປສ຺ສຸຕິໍ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິໂກ ອຸປສ຺ສຸຕິໍ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ອນຸປສມ຺ປນ຺ນສຎ຺ຎີ ອຸປສ຺ສຸຕິໍ ຕິຏ຺ຐຕິ, ອາປຕ຺ຕິ ປາຈິຕ຺ຕິຍສ຺ສ.

ອນຸປສມ຺ປນ຺ນສ຺ສ ອຸປສ຺ສຸຕິໍ ຕິຏ຺ຐຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ.

໔໗໓. ອນາປຕ຺ຕິ – ‘‘ອິເມສໍ ສຸຕ຺ວາ ໂອຣມິສ຺ສາມິ ວິຣມິສ຺ສາມິ ວູປສມິສ຺ສາມິ [ວູປສເມສ຺ສາມິ (ສີ.)] ອຕ຺ຕານໍ ປຣິໂມເຈສ຺ສາມີ’’ຕິ ຄຈ຺ຉຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອຸປສ຺ສຸຕິສິກ຺ຂາປທໍ ນິຏ຺ຐິຕໍ ອຏ຺ຐມໍ.