໑. ສຫຘມ຺ມິກສິກ຺ຂາປທໍ

໔໓໓. ເຕນ ສມເຍນ ພຸທ຺ໂຘ ຠຄວາ ໂກສມ຺ພິຍໍ ວິຫຣຕິ ໂຆສິຕາຣາເມ. ເຕນ ໂຂ ປນ ສມເຍນ ອາຍສ຺ມາ ຉນ຺ໂນ ອນາຈາຣໍ ອາຈຣຕິ. ຠິກ຺ຂູ ເອວມາຫໍສຸ – ‘‘ມາວຸໂສ ຉນ຺ນ, ເອວຣູປໍ ອກາສິ. ເນຕໍ ກປ຺ປຕີ’’ຕິ. ໂສ ເອວໍ ວເທຕິ – ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ຉນ຺ໂນ ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ ເອວໍ ວກ຺ຂຕິ – ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’’ຕິ…ເປ… ສຈ຺ຈໍ ກິຣ ຕ຺ວໍ, ຉນ຺ນ, ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ ເອວໍ ວເທສິ – ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ ເອວໍ ວກ຺ຂສິ – ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’’ຕິ. ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໓໔. ‘‘ໂຍ ປນ ຠິກ຺ຂຸ ຠິກ຺ຂູຫິ ສຫຘມ຺ມິກໍ ວຸຈ຺ຈມາໂນ ເອວໍ ວເທຍ຺ຍ – ‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’ຕິ, ປາຈິຕ຺ຕິຍໍ. ສິກ຺ຂມາເນນ, ຠິກ຺ຂເວ, ຠິກ຺ຂຸນາ ອຎ຺ຎາຕພ຺ພໍ ປຣິປຸຈ຺ຉິຕພ຺ພໍ ປຣິປຎ຺ຫິຕພ຺ພໍ. ອຍໍ ຕຕ຺ຖ ສາມີຈີ’’ຕິ.

໔໓໕. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂູຫີຕິ ອຎ຺ເຎຫິ ຠິກ຺ຂູຫິ.

ສຫຘມ຺ມິກໍ ນາມ ຍໍ ຠຄວຕາ ປຎ຺ຎຕ຺ຕໍ ສິກ຺ຂາປທໍ ເອຕໍ ສຫຘມ຺ມິກໍ ນາມ. ເຕນ ວຸຈ຺ຈມາໂນ ເອວໍ ວເທຕິ [ວເທຍ຺ຍ (ກ.)] – ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຣິປຸຈ຺ຉາມີ’’ຕິ [ອິມານິ ປທານິ ສ຺ຍາ. ໂປຕ຺ຖເກ ນ ທິສ຺ສນ຺ຕິ]. ປຓ຺ຑິຕໍ ພ຺ຍຕ຺ຕໍ [ອິມານິ ປທານິ ສ຺ຍາ. ໂປຕ຺ຖເກ ນ ທິສ຺ສນ຺ຕິ] ເມຘາວິໍ ພຫຸສ຺ສຸຕໍ ຘມ຺ມກຖິກໍ ປຣິປຸຈ຺ຉາມີຕິ ຠຓຕິ, ອາປຕ຺ຕິ ປາຈິຕ຺ຕິຍສ຺ສ.

໔໓໖. ອຸປສມ຺ປນ຺ເນ ອຸປສມ຺ປນ຺ນສຎ຺ຎີ ເອວໍ ວເທຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ເວມຕິໂກ ເອວໍ ວເທຕິ, ອາປຕ຺ຕິ ປາຈິຕ຺ຕິຍສ຺ສ. ອຸປສມ຺ປນ຺ເນ ອນຸປສມ຺ປນ຺ນສຎ຺ຎີ ເອວໍ ວເທຕິ, ອາປຕ຺ຕິ ປາຈິຕ຺ຕິຍສ຺ສ.

ອປຎ຺ຎຕ຺ເຕນ ວຸຈ຺ຈມາໂນ – ‘‘ອິທໍ ນ ສລ຺ເລຂາຍ ນ ຘຸຕຕ຺ຖາຍ ນ ປາສາທິກຕາຍ ນ ອປຈຍາຍ ນ ວີຣິຍາຣມ຺ຠາຍ ສໍວຕ຺ຕຕີ’’ຕິ ເອວໍ ວເທຕິ, ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຓ຺ຑິຕໍ ເມຘາວິໍ ພຫຸສ຺ສຸຕໍ ຘມ຺ມກຖິກໍ ປຣິປຸຈ຺ຉາມີ’’ຕິ ຠຓຕິ, ອາປຕ຺ຕິ ທຸກ຺ກຏສ຺ສ.

ອນຸປສມ຺ປນ຺ເນນ ປຎ຺ຎຕ຺ເຕນ ວາ ອປຎ຺ຎຕ຺ເຕນ ວາ ວຸຈ຺ຈມາໂນ – ‘‘ອິທໍ ນ ສລ຺ເລຂາຍ ນ ຘຸຕຕ຺ຖາຍ ນ ປາສາທິກຕາຍ ນ ອປຈຍາຍ ນ ວີຣິຍາຣມ຺ຠາຍ ສໍວຕ຺ຕຕີ’’ຕິ ເອວໍ ວເທຕິ, ‘‘ນ ຕາວາຫໍ, ອາວຸໂສ, ເອຕສ຺ມິໍ ສິກ຺ຂາປເທ ສິກ຺ຂິສ຺ສາມິ ຍາວ ນ ອຎ຺ຎໍ ຠິກ຺ຂຸໍ ພ຺ຍຕ຺ຕໍ ວິນຍຘຣໍ ປຓ຺ຑິຕໍ ເມຘາວິໍ ພຫຸສ຺ສຸຕໍ ຘມ຺ມກຖິກໍ ປຣິປຸຈ຺ຉາມີ’’ຕິ ຠຓຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ເນ ອນຸປສມ຺ປນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ.

ສິກ຺ຂມາເນນາຕິ ສິກ຺ຂິຕຸກາເມນ.

ອຎ຺ຎາຕພ຺ພນ຺ຕິ ຊານິຕພ຺ພໍ.

ປຣິປຸຈ຺ຉິຕພ຺ພນ຺ຕິ ‘‘ອິທໍ, ຠນ຺ເຕ, ກຖໍ; ອິມສ຺ສ ວາ ກ຺ວຕ຺ໂຖ’’ຕິ?

ປຣິປຎ຺ຫິຕພ຺ພນ຺ຕິ ຈິນ຺ເຕຕພ຺ພໍ ຕຸລຍິຕພ຺ພໍ.

ອຍໍ ຕຕ຺ຖ ສາມີຈີຕິ ອຍໍ ຕຕ຺ຖ ອນຸຘມ຺ມຕາ.

໔໓໗. ອນາປຕ຺ຕິ ‘‘ຊານິສ຺ສາມິ ສິກ຺ຂິສ຺ສາມີ’’ຕິ ຠຓຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ສຫຘມ຺ມິກສິກ຺ຂາປທໍ ນິຏ຺ຐິຕໍ ປຐມໍ.