໙. ອຸກ຺ຂິຕ຺ຕສມ຺ໂຠຄສິກ຺ຂາປທໍ

໔໒໓. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຊານໍ ຕຖາວາທິນາ ອຣິຏ຺ເຐນ ຠິກ຺ຂຸນາ [ຠິກ຺ຂຸນາ ຄທ຺ຘພາຘິປຸພ຺ເພນ (?)] ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ຊນ຺ຕິປິ ສໍວສນ຺ຕິປິ ສຫາປິ ເສຍ຺ຍໍ ກປ຺ເປນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຊານໍ ຕຖາວາທິນາ ອຣິຏ຺ເຐນ ຠິກ຺ຂຸນາ [ຠິກ຺ຂຸນາ ຄທ຺ຘພາຘິປຸພ຺ເພນ (?)] ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ຊິສ຺ສນ຺ຕິປິ ສໍວສິສ຺ສນ຺ຕິປິ ສຫາປິ ເສຍ຺ຍໍ ກປ຺ເປສ຺ສນ຺ຕີຕິ…ເປ… ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຊານໍ ຕຖາວາທິນາ ອຣິຏ຺ເຐນ ຠິກ຺ຂຸນາ [ຠິກ຺ຂຸນາ ຄທ຺ຘພາຘິປຸພ຺ເພນ (?)] ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ຊຖາປິ ສໍວສຖາປິ ສຫາປິ ເສຍ຺ຍໍ ກປ຺ເປຖາຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຊານໍ ຕຖາວາທິນາ ອຣິຏ຺ເຐນ ຠິກ຺ຂຸນາ [ຠິກ຺ຂຸນາ ຄທ຺ຘພາຘິປຸພ຺ພເນ (?)] ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ຊິສ຺ສຖາປິ ສໍວສິສ຺ສຖາປິ ສຫາປິ ເສຍ຺ຍໍ ກປ຺ເປສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໔໒໔. ‘‘ໂຍ ປນ ຠິກ຺ຂຸ ຊານໍ ຕຖາວາທິນາ ຠິກ຺ຂຸນາ ອກຏານຸຘມ຺ເມນ ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ ສມ຺ຠຸຎ຺ເຊຍ຺ຍ ວາ ສໍວເສຍ຺ຍ ວາ ສຫ ວາ ເສຍ຺ຍໍ ກປ຺ເປຍ຺ຍ, ປາຈິຕ຺ຕິຍ’’ນ຺ຕິ.

໔໒໕. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຊານາຕິ ນາມ ສາມໍ ວາ ຊານາຕິ, ອຎ຺ເຎ ວາ ຕສ຺ສ ອາໂຣເຈນ຺ຕິ, ໂສ ວາ ອາໂຣເຈຕິ.

ຕຖາວາທິນາຕິ – ‘‘ຕຖາຫໍ ຠຄວຕາ ຘມ຺ມໍ ເທສິຕໍ ອາຊານາມິ, ຍຖາ ເຍເມ ອນ຺ຕຣາຍິກາ ຘມ຺ມາ ວຸຕ຺ຕາ ຠຄວຕາ, ເຕ ປຏິເສວໂຕ ນາລໍ ອນ຺ຕຣາຍາຍາ’’ຕິ ເອວໍ ວາທິນາ.

ອກຏານຸຘມ຺ໂມ ນາມ ອຸກ຺ຂິຕ຺ໂຕ ອໂນສາຣິໂຕ.

ຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິນ຺ຕິ ເອຕໍ ທິຏ຺ຐິໍ ອປ຺ປຏິນິສ຺ສຏ຺ເຐນ ສທ຺ຘິໍ.

ສມ຺ຠຸຎ຺ເຊຍ຺ຍ ວາຕິ ສມ຺ໂຠໂຄ ນາມ ທ຺ເວ ສມ຺ໂຠຄາ – ອາມິສສມ຺ໂຠໂຄ ຈ ຘມ຺ມສມ຺ໂຠໂຄ ຈ. ອາມິສສມ຺ໂຠໂຄ ນາມ ອາມິສໍ ເທຕິ ວາ ປຏິຄ຺ຄຓ຺ຫາຕິ ວາ, ອາປຕ຺ຕິ ປາຈິຕ຺ຕິຍສ຺ສ. ຘມ຺ມສມ຺ໂຠໂຄ ນາມ ອຸທ຺ທິສຕິ ວາ ອຸທ຺ທິສາເປຕິ ວາ, ປເທນ ອຸທ຺ທິສຕິ ວາ ອຸທ຺ທິສາເປຕິ ວາ, ປເທ ປເທ ອາປຕ຺ຕິ ປາຈິຕ຺ຕິຍສ຺ສ. ອກ຺ຂຣາຍ ອຸທ຺ທິສຕິ ວາ ອຸທ຺ທິສາເປຕິ ວາ, ອກ຺ຂຣກ຺ຂຣາຍ ອາປຕ຺ຕິ ປາຈິຕ຺ຕິຍສ຺ສ.

ສໍວເສຍ຺ຍ ວາຕິ ອຸກ຺ຂິຕ຺ຕເກນ ສທ຺ຘິໍ ອຸໂປສຖໍ ວາ ປວາຣຓໍ ວາ ສງ຺ຆກມ຺ມໍ ວາ ກໂຣຕິ, ອາປຕ຺ຕິ ປາຈິຕ຺ຕິຍສ຺ສ.

ສຫ ວາ ເສຍ຺ຍໍ ກປ຺ເປຍ຺ຍາຕິ ເອກຈ຺ຉນ຺ເນ ອຸກ຺ຂິຕ຺ຕເກ ນິປນ຺ເນ ຠິກ຺ຂຸ ນິປຊ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຠິກ຺ຂຸ ນິປນ຺ເນ ອຸກ຺ຂິຕ຺ຕໂກ ນິປຊ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ອຸໂຠ ວາ ນິປຊ຺ຊນ຺ຕິ, ອາປຕ຺ຕິ ປາຈິຕ຺ຕິຍສ຺ສ. ອຸຏ຺ຐຫິຕ຺ວາ ປຸນປ຺ປຸນໍ ນິປຊ຺ຊນ຺ຕິ, ອາປຕ຺ຕິ ປາຈິຕ຺ຕິຍສ຺ສ.

໔໒໖. ອຸກ຺ຂິຕ຺ຕເກ ອຸກ຺ຂິຕ຺ຕກສຎ຺ຎີ ສມ຺ຠຸຎ຺ຊຕິ ວາ ສໍວສຕິ ວາ ສຫ ວາ ເສຍ຺ຍໍ ກປ຺ເປຕິ, ອາປຕ຺ຕິ ປາຈິຕ຺ຕິຍສ຺ສ. ອຸກ຺ຂິຕ຺ຕເກ ເວມຕິໂກ ສມ຺ຠຸຎ຺ຊຕິ ວາ ສໍວສຕິ ວາ ສຫ ວາ ເສຍ຺ຍໍ ກປ຺ເປຕິ, ອາປຕ຺ຕິ ທຸກ຺ກຏສ຺ສ. ອຸກ຺ຂິຕ຺ຕເກ ອນຸກ຺ຂິຕ຺ຕກສຎ຺ຎີ ສມ຺ຠຸຎ຺ຊຕິ ວາ ສໍວສຕິ ວາ ສຫ ວາ ເສຍ຺ຍໍ ກປ຺ເປຕິ, ອນາປຕ຺ຕິ. ອນຸກ຺ຂິຕ຺ຕເກ ອຸກ຺ຂິຕ຺ຕກສຎ຺ຎີ, ອາປຕ຺ຕິ ທຸກ຺ກຏສ຺ສ. ອນຸກ຺ຂິຕ຺ຕເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ອນຸກ຺ຂິຕ຺ຕເກ ອນຸກ຺ຂິຕ຺ຕກສຎ຺ຎີ, ອນາປຕ຺ຕິ.

໔໒໗. ອນາປຕ຺ຕິ ອນຸກ຺ຂິຕ຺ໂຕຕິ ຊານາຕິ, ອຸກ຺ຂິຕ຺ໂຕ ໂອສາຣິໂຕຕິ ຊານາຕິ, ອຸກ຺ຂິຕ຺ໂຕ ຕໍ ທິຏ຺ຐິໍ ປຏິນິສ຺ສຏ຺ໂຐຕິ ຊານາຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອຸກ຺ຂິຕ຺ຕສມ຺ໂຠຄສິກ຺ຂາປທໍ ນິຏ຺ຐິຕໍ ນວມໍ.