໔. ທຸຏ຺ຐຸລ຺ລສິກ຺ຂາປທໍ

໓໙໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ ຠາຕຸໂນ ສທ຺ຘິວິຫາຣິກສ຺ສ ຠິກ຺ຂຸໂນ ອາໂຣເຈສິ – ‘‘ອຫໍ, ອາວຸໂສ, ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປນ຺ໂນ. ມາ ກສ຺ສຈິ ອາໂຣເຈຫີ’’ຕິ. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ ສງ຺ຆໍ ຕສ຺ສາ ອາປຕ຺ຕິຍາ ປຣິວາສໍ ຍາຈິ. ຕສ຺ສ ສງ຺ໂຆ ຕສ຺ສາ ອາປຕ຺ຕິຍາ ປຣິວາສໍ ອທາສິ. ໂສ ປຣິວສນ຺ໂຕ ຕໍ ຠິກ຺ຂຸໍ ປສ຺ສິຕ຺ວາ ເອຕທໂວຈ – ‘‘ອຫໍ, ອາວຸໂສ, ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ ສງ຺ຆໍ ຕສ຺ສາ ອາປຕ຺ຕິຍາ ປຣິວາສໍ ຍາຈິໍ, ຕສ຺ສ ເມ ສງ຺ໂຆ ຕສ຺ສາ ອາປຕ຺ຕິຍາ ປຣິວາສໍ ອທາສິ, ໂສຫໍ ປຣິວສາມິ, ເວທິຍາມຫໍ [ເວທຍາມຫໍ (ສ຺ຍາ.)], ອາວຸໂສ, ເວທິຍຕີ’’ຕິ ມໍ ອາຍສ຺ມາ ຘາເຣຕູ’’ຕິ.

‘‘ກິໍ ນຸ ໂຂ, ອາວຸໂສ, ໂຍ ອຎ຺ໂຎປິ ອິມໍ ອາປຕ຺ຕິໍ ອາປຊ຺ຊຕິ ໂສປິ ເອວໍ ກໂຣຕີ’’ຕິ? ‘‘ເອວມາວຸໂສ’’ຕິ. ‘‘ອຍໍ, ອາວຸໂສ, ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ [ອາປຊ຺ຊິ (?)] ໂສ ເມ ອາໂຣເຈຕິ ມາ ກສ຺ສຈິ ອາໂຣເຈຫີ’’ຕິ. ‘‘ກິໍ ປນ ຕ຺ວໍ, ອາວຸໂສ, ປຏິຈ຺ຉາເທສີ’’ຕິ? ‘‘ເອວມາວຸໂສ’’ຕິ. ອຖ ໂຂ ໂສ ຠິກ຺ຂຸ ຠິກ຺ຂູນໍ ເອຕມຕ຺ຖໍ ອາໂຣເຈສິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠິກ຺ຂຸ ຠິກ຺ຂຸສ຺ສ ຊານໍ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທສ຺ສຕີ’’ຕິ…ເປ… ສຈ຺ຈໍ ກິຣ ຕ຺ວໍ, ຠິກ຺ຂຸ, ຠິກ຺ຂຸສ຺ສ ຊານໍ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທສີຕິ. ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ຠິກ຺ຂຸສ຺ສ ຊານໍ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໙໘. ‘‘ໂຍ ປນ ຠິກ຺ຂຸ ຠິກ຺ຂຸສ຺ສ ຊານໍ ທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທຍ຺ຍ, ປາຈິຕ຺ຕິຍ’’ນ຺ຕິ.

໓໙໙. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸສ຺ສາຕິ ອຎ຺ຎສ຺ສ ຠິກ຺ຂຸສ຺ສ.

ຊານາຕິ ນາມ ສາມໍ ວາ ຊານາຕິ ອຎ຺ເຎ ວາ ຕສ຺ສ ອາໂຣເຈນ຺ຕິ, ໂສ ວາ ອາໂຣເຈຕິ.

ທຸຏ຺ຐຸລ຺ລາ ນາມ ອາປຕ຺ຕິ ຈຕ຺ຕາຣິ ຈ ປາຣາຊິການິ ເຕຣສ ຈ ສງ຺ຆາທິເສສາ.

ປຏິຈ຺ຉາເທຍ຺ຍາຕິ ‘‘ອິມໍ ຊານິຕ຺ວາ ໂຈເທສ຺ສນ຺ຕິ, ສາເຣສ຺ສນ຺ຕິ ຂຸໍເສສ຺ສນ຺ຕິ, ວມ຺ເຠສ຺ສນ຺ຕິ, ມງ຺ກຸໍ ກຣິສ຺ສນ຺ຕິ ນາໂຣເຈສ຺ສາມີ’’ຕິ ຘຸຣໍ ນິກ຺ຂິຕ຺ຕມຕ຺ເຕ, ອາປຕ຺ຕິ ປາຈິຕ຺ຕິຍສ຺ສ.

໔໐໐. ທຸຏ຺ຐຸລ຺ລາຍ ອາປຕ຺ຕິຍາ ທຸຏ຺ຐຸລ຺ລາປຕ຺ຕິສຎ຺ຎີ ປຏິຈ຺ຉາເທຕິ, ອາປຕ຺ຕິ ປາຈິຕ຺ຕິຍສ຺ສ. ທຸຏ຺ຐຸລ຺ລາຍ ອາປຕ຺ຕິຍາ ເວມຕິໂກ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ. ທຸຏ຺ຐຸລ຺ລາຍ ອາປຕ຺ຕິຍາ ອທຸຏ຺ຐຸລ຺ລາປຕ຺ຕິສຎ຺ຎີ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ. ອທຸຏ຺ຐຸລ຺ລໍ ອາປຕ຺ຕິໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ. ອນຸປສມ຺ປນ຺ນສ຺ສ ທຸຏ຺ຐຸລ຺ລໍ ວາ ອທຸຏ຺ຐຸລ຺ລໍ ວາ ອຊ຺ຌາຈາຣໍ ປຏິຈ຺ຉາເທຕິ, ອາປຕ຺ຕິ ທຸກ຺ກຏສ຺ສ. ອທຸຏ຺ຐຸລ຺ລາຍ ອາປຕ຺ຕິຍາ ທຸຏ຺ຐຸລ຺ລາປຕ຺ຕິສຎ຺ຎີ, ອາປຕ຺ຕິ ທຸກ຺ກຏສ຺ສ. ອທຸຏ຺ຐຸລ຺ລາຍ ອາປຕ຺ຕິຍາ ເວມຕິໂກ, ອາປຕ຺ຕິ ທຸກ຺ກຏສ຺ສ. ອທຸຏ຺ຐຸລ຺ລາຍ ອາປຕ຺ຕິຍາ ອທຸຏ຺ຐຸລ຺ລາປຕ຺ຕິສຎ຺ຎີ, ອາປຕ຺ຕິ ທຸກ຺ກຏສ຺ສ.

໔໐໑. ອນາປຕ຺ຕິ – ‘‘ສງ຺ຆສ຺ສ ຠຓ຺ຑນໍ ວາ ກລໂຫ ວາ ວິຄ຺ຄໂຫ ວາ ວິວາໂທ ວາ ຠວິສ຺ສຕີ’’ຕິ ນາໂຣເຈຕິ, ‘‘ສງ຺ຆເຠໂທ ວາ ສງ຺ຆຣາຊິ ວາ ຠວິສ຺ສຕີ’’ຕິ ນາໂຣເຈຕິ, ‘‘ອຍໍ ກກ຺ຂໂຬ ຜຣຸໂສ ຊີວິຕນ຺ຕຣາຍໍ ວາ ພ຺ຣຫ຺ມຈຣິຍນ຺ຕຣາຍໍ ວາ ກຣິສ຺ສຕີ’’ຕິ ນາໂຣເຈຕິ, ອຎ຺ເຎ ປຕິຣູເປ ຠິກ຺ຂູ ອປສ຺ສນ຺ໂຕ ນາໂຣເຈຕິ, ນຉາເທຕຸກາໂມ ນາໂຣເຈຕິ, ‘‘ປຎ຺ຎາຍິສ຺ສຕິ ສເກນ ກມ຺ເມນາ’’ຕິ ນາໂຣເຈຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸຏ຺ຐຸລ຺ລສິກ຺ຂາປທໍ ນິຏ຺ຐິຕໍ ຈຕຸຕ຺ຖໍ.