໑. ສຎ຺ຈິຈ຺ຈສິກ຺ຂາປທໍ

໓໘໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ ອິສ຺ສາໂສ ໂຫຕິ, ກາກາ ຈສ຺ສ ອມນາປາ ໂຫນ຺ຕິ. ໂສ ກາເກ ວິຊ຺ຌິຕ຺ວາ ວິຊ຺ຌິຕ຺ວາ ສີສໍ ຉິນ຺ທິຕ຺ວາ ສູເລ ປຏິປາຏິຍາ ຐເປສິ. ຠິກ຺ຂູ ເອວມາຫໍສຸ – ‘‘ເກນິເມ, ອາວຸໂສ, ກາກາ ຊີວິຕາ ໂວໂຣປິຕາ’’ຕິ? ‘‘ມຍາ, ອາວຸໂສ. ອມນາປາ ເມ ກາກາ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ສຎ຺ຈິຈ຺ຈ ປາຓໍ ຊີວິຕາ ໂວໂຣເປສ຺ສຕີ’’ຕິ…ເປ… ສຈ຺ຈໍ ກິຣ ຕ຺ວໍ, ອຸທາຍິ, ສຎ຺ຈິຈ຺ຈ ປາຓໍ ຊີວິຕາ ໂວໂຣເປສີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ສຎ຺ຈິຈ຺ຈ ປາຓໍ ຊີວິຕາ ໂວໂຣເປສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໘໓. ‘‘ໂຍ ປນ ຠິກ຺ຂຸ ສຎ຺ຈິຈ຺ຈ ປາຓໍ ຊີວິຕາ ໂວໂຣເປຍ຺ຍ, ປາຈິຕ຺ຕິຍ’’ນ຺ຕິ.

໓໘໔. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ສຎ຺ຈິຈ຺ຈາຕິ ຊານນ຺ໂຕ ສຎ຺ຊານນ຺ໂຕ ເຈຈ຺ຈ ອຠິວິຕຣິຕ຺ວາ ວີຕິກ຺ກໂມ.

ປາໂຓ ນາມ ຕິຣຈ຺ຉານຄຕປາໂຓ ວຸຈ຺ຈຕິ.

ຊີວິຕາ ໂວໂຣເປຍ຺ຍາຕິ ຊີວິຕິນ຺ທ຺ຣິຍໍ ອຸປຈ຺ຉິນ຺ທຕິ ອຸປໂຣເຘຕິ ສນ຺ຕຕິໍ ວິໂກເປຕິ, ອາປຕ຺ຕິ ປາຈິຕ຺ຕິຍສ຺ສ.

໓໘໕. ປາເຓ ປາຓສຎ຺ຎີ ຊີວິຕາ ໂວໂຣເປຕິ, ອາປຕ຺ຕິ ປາຈິຕ຺ຕິຍສ຺ສ. ປາເຓ ເວມຕິໂກ ຊີວິຕາ ໂວໂຣເປຕິ, ອາປຕ຺ຕິ ທຸກ຺ກຏສ຺ສ. ປາເຓ ອປ຺ປາຓສຎ຺ຎີ ຊີວິຕາ ໂວໂຣເປຕິ, ອນາປຕ຺ຕິ. ອປ຺ປາເຓ ປາຓສຎ຺ຎີ, ອາປຕ຺ຕິ ທຸກ຺ກຏສ຺ສ. ອປ຺ປາເຓ ເວມິຕໂກ, ອາປຕ຺ຕິ ທຸກ຺ກຏສ຺ສ. ອປ຺ປາເຓ ອປ຺ປາຓສຎ຺ຎີ, ອນາປຕ຺ຕິ.

໓໘໖. ອນາປຕ຺ຕິ ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ນມຣຓາຘິປ຺ປາຍສ຺ສ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ສຎ຺ຈິຈ຺ຈສິກ຺ຂາປທໍ ນິຏ຺ຐິຕໍ ປຐມໍ.