໘. ທຸພ຺ພຓ຺ຓກຣຓສິກ຺ຂາປທໍ

໓໖໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂູ ຈ ປຣິພ຺ພາຊກາ ຈ ສາເກຕາ ສາວຕ຺ຖິໍ ອທ຺ຘານມຄ຺ຄປ຺ປຏິປນ຺ນາ ໂຫນ຺ຕິ. ອນ຺ຕຣາມຄ຺ເຄ ໂຈຣາ ນິກ຺ຂມິຕ຺ວາ ເຕ ອຈ຺ຉິນ຺ທິໍສຸ. ສາວຕ຺ຖິຍາ ຣາຊຠຏາ ນິກ຺ຂມິຕ຺ວາ ເຕ ໂຈເຣ ສຠຓ຺ເຑ ຄເຫຕ຺ວາ ຠິກ຺ຂູນໍ ສນ຺ຕິເກ ທູຕໍ ປາເຫສຸໍ – ‘‘ອາຄຈ຺ຉນ຺ຕຸ, ຠທນ຺ຕາ, ສກໍ ສກໍ ຈີວຣໍ ສຎ຺ຊານິຕ຺ວາ ຄຓ຺ຫນ຺ຕູ’’ຕິ. ຠິກ຺ຂູ ນ ສຎ຺ຊານນ຺ຕິ. ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຠທນ຺ຕາ ອຕ຺ຕໂນ ອຕ຺ຕໂນ ຈີວຣໍ ນ ສຎ຺ຊານິສ຺ສນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຠິກ຺ຂູນໍ ຕທນຸຈ຺ຉວິກໍ ຕທນຸໂລມິກໍ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ເຕນ ຫິ, ຠິກ຺ຂເວ, ຠິກ຺ຂູນໍ ສິກ຺ຂາປທໍ ປຎ຺ຎເປສ຺ສາມິ ທສ ອຕ຺ຖວເສ ປຏິຈ຺ຈ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ…ເປ… ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໖໘. ‘‘ນວໍ ປນ ຠິກ຺ຂຸນາ ຈີວຣລາເຠນ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ອາທາຕພ຺ພໍ – ນີລໍ ວາ ກທ຺ທມໍ ວາ ກາຬສາມໍ ວາ. ອນາທາ ເຈ ຠິກ຺ຂຸ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ນວໍ ຈີວຣໍ ປຣິຠຸຎ຺ເຊຍ຺ຍ, ປາຈິຕ຺ຕິຍ’’ນ຺ຕິ.

໓໖໙. ນວໍ ນາມ ອກຕກປ຺ປໍ ວຸຈ຺ຈຕິ.

ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ.

ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ອາທາຕພ຺ພນ຺ຕິ ອນ຺ຕມໂສ ກຸສຄ຺ເຄນປິ ອາທາຕພ຺ພໍ.

ນີລໍ ນາມ ທ຺ເວ ນີລານິ – ກໍສນີລໍ, ປລາສນີລໍ.

ກທ຺ທໂມ ນາມ ໂອທໂກ ວຸຈ຺ຈຕິ.

ກາຬສາມໍ ນາມ ຍໍກິຎ຺ຈິ ກາຬສາມກໍ [ກາຬກໍ (ສີ. ສ຺ຍາ.)].

ອນາທາ ເຈ ຠິກ຺ຂຸ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓນ຺ຕິ ອນ຺ຕມໂສ ກຸສຄ຺ເຄນປິ ອນາທິຍິຕ຺ວາ ຕິຓ຺ຓໍ ທຸພ຺ພຓ຺ຓກຣຓານໍ ອຎ຺ຎຕຣໍ ທຸພ຺ພຓ຺ຓກຣຓໍ ນວໍ ຈີວຣໍ ປຣິຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

໓໗໐. ອນາທິນ຺ເນ ອນາທິນ຺ນສຎ຺ຎີ ປຣິຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ອນາທິນ຺ເນ ເວມຕິໂກ ປຣິຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ອນາທິນ຺ເນ ອາທິນ຺ນສຎ຺ຎີ ປຣິຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

ອາທິນ຺ເນ ອນາທິນ຺ນສຎ຺ຎີ, ອາປຕ຺ຕິ ທຸກ຺ກຏສ຺ສ. ອາທິນ຺ເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ອາທິນ຺ເນ ອາທິນ຺ນສຎ຺ຎີ, ອນາປຕ຺ຕິ.

໓໗໑. ອນາປຕ຺ຕິອາທິຍິຕ຺ວາ ປຣິຠຸຎ຺ຊຕິ, ກປ຺ໂປ ນຏ຺ໂຐ ໂຫຕິ, ກປ຺ປກໂຕກາໂສ ຊິຓ຺ໂຓ ໂຫຕິ, ກປ຺ປກເຕນ ອກປ຺ປກຕໍ ສໍສິພ຺ພິຕໍ ໂຫຕິ, ອຄ຺ຄເຬ ອນຸວາເຕ ປຣິຠຓ຺ເຑ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸພ຺ພຓ຺ຓກຣຓສິກ຺ຂາປທໍ ນິຏ຺ຐິຕໍ ອຏ຺ຐມໍ.