໓. ຫສຘມ຺ມສິກ຺ຂາປທໍ

໓໓໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສຕ຺ຕຣສວຄ຺ຄິຍາ ຠິກ຺ຂູ ອຈິຣວຕິຍາ ນທິຍາ ອຸທເກ ກີຬນ຺ຕິ. ເຕນ ໂຂ ປນ ສມເຍນ ຣາຊາ ປເສນທິ ໂກສໂລ ມລ຺ລິກາຍ ເທວິຍາ ສທ຺ຘິໍ ອຸປຣິປາສາທວຣຄໂຕ ໂຫຕິ. ອທ຺ທສາ ໂຂ ຣາຊາ ປເສນທິ ໂກສໂລ ສຕ຺ຕຣສວຄ຺ຄິເຍ ຠິກ຺ຂູ ອຈິຣວຕິຍາ ນທິຍາ ອຸທເກ ກີຬນ຺ເຕ. ທິສ຺ວານ ມລ຺ລິກໍ ເທວິໍ ເອຕທໂວຈ – ‘‘ເອເຕ ເຕ, ມລ຺ລິເກ, ອຣຫນ຺ໂຕ ອຸທເກ ກີຬນ຺ຕີ’’ຕິ. ‘‘ນິສ຺ສໍສຍໍ ໂຂ, ມຫາຣາຊ, ຠຄວຕາ ສິກ຺ຂາປທໍ ອປຎ຺ຎຕ຺ຕໍ. ເຕ ວາ ຠິກ຺ຂູ ອປ຺ປກຕຎ຺ຎຸໂນ’’ຕິ. ອຖ ໂຂ ຣຎ຺ໂຎ ປເສນທິສ຺ສ ໂກສລສ຺ສ ເອຕທໂຫສິ – ‘‘ເກນ ນຸ ໂຂ ອຫໍ ອຸປາເຍນ ຠຄວໂຕ ຈ ນ ອາໂຣເຈຍ຺ຍໍ, ຠຄວາ ຈ ຊາເນຍ຺ຍ ອິເມ ຠິກ຺ຂູ ອຸທເກ ກີຬິຕາ’’ຕິ? ອຖ ໂຂ ຣາຊາ ປເສນທິ ໂກສໂລ ສຕ຺ຕຣສວຄ຺ຄິເຍ ຠິກ຺ຂູ ປກ຺ໂກສາເປຕ຺ວາ ມຫນ຺ຕໍ ຄຸຬປິຓ຺ຑໍ ອທາສິ – ‘‘ອິມໍ, ຠນ຺ເຕ, ຄຸຬປິຓ຺ຑໍ ຠຄວໂຕ ເທຖາ’’ຕິ. ສຕ຺ຕຣສວຄ຺ຄິຍາ ຠິກ຺ຂູ ຕໍ ຄຸຬປິຓ຺ຑໍ ອາທາຍ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ເອຕທໂວຈຸໍ – ‘‘ອິມໍ, ຠນ຺ເຕ, ຄຸຬປິຓ຺ຑໍ ຣາຊາ ປເສນທິ ໂກສໂລ ຠຄວໂຕ ເທຕີ’’ຕິ. ‘‘ກຫໍ ປນ ຕຸມ຺ເຫ, ຠິກ຺ຂເວ, ຣາຊາ ອທ຺ທສາ’’ຕິ. ‘‘ອຈິຣວຕິຍາ ນທິຍາ, ຠຄວາ, ອຸທເກ ກີຬນ຺ເຕ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ອຸທເກ ກີຬິສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໓໓໖. ‘‘ອຸທເກ ຫສຘມ຺ເມ [ຫສ຺ສຘມ຺ເມ (ສີ. ສ຺ຍາ.)] ປາຈິຕ຺ຕິຍ’’ນ຺ຕິ.

໓໓໗. ອຸທເກ ຫສຘມ຺ໂມ ນາມ ອຸປຣິໂຄປ຺ຜເກ ອຸທເກ ຫສາຘິປ຺ປາໂຍ ນິມຸຊ຺ຊຕິ ວາ ອຸມ຺ມຸຊ຺ຊຕິ ວາ ປລວຕິ ວາ, ອາປຕ຺ຕິ ປາຈິຕ຺ຕິຍສ຺ສ.

໓໓໘. ອຸທເກ ຫສຘມ຺ເມ ຫສຘມ຺ມສຎ຺ຎີ, ອາປຕ຺ຕິ ປາຈິຕ຺ຕິຍສ຺ສ. ອຸທເກ ຫສຘມ຺ເມ ເວມຕິໂກ, ອາປຕ຺ຕິ ປາຈິຕ຺ຕິຍສ຺ສ. ອຸທເກ ຫສຘມ຺ເມ ອຫສຘມ຺ມສຎ຺ຎີ, ອາປຕ຺ຕິ ປາຈິຕ຺ຕິຍສ຺ສ.

ເຫຏ຺ຐາໂຄປ຺ຜເກ ອຸທເກ ກີຬຕິ, ອາປຕ຺ຕິ ທຸກ຺ກຏສ຺ສ. ອຸທເກ ນາວາຍ ກີຬຕິ, ອາປຕ຺ຕິ ທຸກ຺ກຏສ຺ສ. ຫຕ຺ເຖນ ວາ ປາເທນ ວາ ກຏ຺ເຐນ ວາ ກຐລາຍ ວາ ອຸທກໍ ປຫຣຕິ, ອາປຕ຺ຕິ ທຸກ຺ກຏສ຺ສ. ຠາຊນຄຕໍ ອຸທກໍ ວາ ກຎ຺ຊິກໍ ວາ ຂີຣໍ ວາ ຕກ຺ກໍ ວາ ຣຊນໍ ວາ ປສ຺ສາວໍ ວາ ຈິກ຺ຂລ຺ລໍ ວາ ກີຬຕິ, ອາປຕ຺ຕິ ທຸກ຺ກຏສ຺ສ.

ອຸທເກ ອຫສຘມ຺ເມ ຫສຘມ຺ມສຎ຺ຎີ, ອາປຕ຺ຕິ ທຸກ຺ກຏສ຺ສ. ອຸທເກ ອຫສຘມ຺ເມ ເວມຕິໂກ, ອາປຕ຺ຕິ ທຸກ຺ກຏສ຺ສ. ອຸທເກ ອຫສຘມ຺ເມ ອຫສຘມ຺ມສຎ຺ຎີ, ອນາປຕ຺ຕິ.

໓໓໙. ອນາປຕ຺ຕິ ນ ຫສາຘິປ຺ປາໂຍ, ສຕິ ກຣຓີເຍ ອຸທກໍ ໂອຕຣິຕ຺ວາ ນິມຸຊ຺ຊຕິ ວາ ອຸມ຺ມຸຊ຺ຊຕິ ວາ ປລວຕິ ວາ, ປາຣໍ ຄຈ຺ຉນ຺ໂຕ ນິມຸຊ຺ຊຕິ ວາ ອຸມ຺ມຸຊ຺ຊຕິ ວາ ປລວຕິ ວາ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຫສຘມ຺ມສິກ຺ຂາປທໍ ນິຏ຺ຐິຕໍ ຕຕິຍໍ.