໑. ອເຈລກສິກ຺ຂາປທໍ

໒໖໙. ເຕນ ສມເຍນ ພຸທ຺ໂຘ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ເຕນ ໂຂ ປນ ສມເຍນ ສງ຺ຆສ຺ສ ຂາທນີຍໍ ອຸສ຺ສນ຺ນໍ ໂຫຕິ. ອຖ ໂຂ ອາຍສ຺ມາ ອານນ຺ໂທ ຠຄວໂຕ ເອຕມຕ຺ຖໍ ອາໂຣເຈສິ. ‘‘ເຕນຫານນ຺ທ, ວິຆາສາທານໍ ປູວໍ ເທຫີ’’ຕິ. ‘‘ເອວໍ ຠນ຺ເຕ’’ຕິ ໂຂ ອາຍສ຺ມາ ອານນ຺ໂທ ຠຄວໂຕ ປຏິສ຺ສຸຓິຕ຺ວາ ວິຆາສາເທ ປຏິປາຏິຍາ ນິສີທາເປຕ຺ວາ ເອເກກໍ ປູວໍ ເທນ຺ໂຕ ອຎ຺ຎຕຣິສ຺ສາ ປຣິພ຺ພາຊິກາຍ ເອກໍ ມຎ຺ຎມາໂນ ທ຺ເວ ປູເວ ອທາສິ. ສາມນ຺ຕາ ປຣິພ຺ພາຊິກາໂຍ ຕໍ ປຣິພ຺ພາຊິກໍ ເອຕທໂວຈຸໍ – ‘‘ຊາໂຣ ເຕ ເອໂສ ສມໂຓ’’ຕິ. ‘‘ນ ເມ ໂສ ສມໂຓ ຊາໂຣ, ເອກໍ ມຎ຺ຎມາໂນ ທ຺ເວ ປູເວ ອທາສີ’’ຕິ. ທຸຕິຍມ຺ປິ ໂຂ…ເປ… ຕຕິຍມ຺ປິ ໂຂ ອາຍສ຺ມາ ອານນ຺ໂທ ເອເກກໍ ປູວໍ ເທນ຺ໂຕ ຕສ຺ສາເຍວ ປຣິພ຺ພາຊິກາຍ ເອກໍ ມຎ຺ຎມາໂນ ທ຺ເວ ປູເວ ອທາສິ. ສາມນ຺ຕາ ປຣິພ຺ພາຊິກາໂຍ ຕໍ ປຣິພ຺ພາຊິກໍ ເອຕທໂວຈຸໍ – ‘‘ຊາໂຣ ເຕ ເອໂສ ສມໂຓ’’ຕິ. ‘‘ນ ເມ ໂສ ສມໂຓ ຊາໂຣ, ເອກໍ ມຎ຺ຎມາໂນ ທ຺ເວ ປູເວ ອທາສີ’’ຕິ. ‘‘ຊາໂຣ ນ ຊາໂຣ’’ຕິ ຠຓ຺ຑິໍສຸ. ອຎ຺ຎຕໂຣປິ ອາຊີວໂກ ປຣິເວສນໍ ອຄມາສິ. ອຎ຺ຎຕໂຣ ຠິກ຺ຂຸ ປຫູເຕນ ສປ຺ປິນາ ໂອທນໍ ມທ຺ທິຕ຺ວາ ຕສ຺ສ ອາຊີວກສ຺ສ ມຫນ຺ຕໍ ປິຓ຺ຑໍ ອທາສິ. ອຖ ໂຂ ໂສ ອາຊີວໂກ ຕໍ ປິຓ຺ຑໍ ອາທາຍ ອຄມາສິ. ອຎ຺ຎຕໂຣ ອາຊີວໂກ ຕໍ ອາຊີວກໍ ເອຕທໂວຈ – ‘‘ກຸໂຕ ຕຍາ, ອາວຸໂສ, ປິຓ຺ໂຑ ລທ຺ໂຘ’’ຕິ? ‘‘ຕສ຺ສາວຸໂສ, ສມຓສ຺ສ ໂຄຕມສ຺ສ ມຸຓ຺ຑຄຫປຕິກສ຺ສ ປຣິເວສນາຍ ລທ຺ໂຘ’’ຕິ.

ອສ຺ໂສສຸໍ ໂຂ ອຸປາສກາ ເຕສໍ ອາຊີວການໍ ອິມໍ ກຖາສລ຺ລາປໍ. ອຖ ໂຂ ເຕ ອຸປາສກາ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ອຸປາສກາ ຠຄວນ຺ຕໍ ເອຕທໂວຈຸໍ – ‘‘ອິເມ, ຠນ຺ເຕ, ຕິຕ຺ຖິຍາ ອວຓ຺ຓກາມາ ພຸທ຺ຘສ຺ສ ອວຓ຺ຓກາມາ ຘມ຺ມສ຺ສ ອວຓ຺ຓກາມາ ສງ຺ຆສ຺ສ. ສາຘຸ, ຠນ຺ເຕ, ອຍ຺ຍາ ຕິຕ຺ຖິຍານໍ ສຫຕ຺ຖາ ນ ທເທຍ຺ຍຸ’’ນ຺ຕິ. ອຖ ໂຂ ຠຄວາ ເຕ ອຸປາສເກ ຘມ຺ມິຍາ ກຖາຍ ສນ຺ທສ຺ເສສິ ສມາທເປສິ ສມຸຕ຺ເຕເຊສິ ສມ຺ປຫໍເສສິ. ອຖ ໂຂ ເຕ ອຸປາສກາ ຠຄວຕາ ຘມ຺ມິຍາ ກຖາຍ ສນ຺ທສ຺ສິຕາ ສມາທປິຕາ ສມຸຕ຺ເຕຊິຕາ ສມ຺ປຫໍສິຕາ ອຸຏ຺ຐາຍາສນາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກມິໍສຸ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ເຕນ ຫິ, ຠິກ຺ຂເວ, ຠິກ຺ຂູນໍ ສິກ຺ຂາປທໍ ປຎ຺ຎເປສ຺ສາມິ ທສ ອຕ຺ຖວເສ ປຏິຈ຺ຈ – ສງ຺ຆສຸຏ຺ຐຸຕາຍ, ສງ຺ຆຜາສຸຕາຍ …ເປ… ສທ຺ຘມ຺ມຏ຺ຐິຕິຍາ, ວິນຍານຸຄ຺ຄຫາຍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໗໐. ‘‘ໂຍ ປນ ຠິກ຺ຂຸ ອເຈລກສ຺ສ ວາ ປຣິພ຺ພາຊກສ຺ສ ວາ ປຣິພ຺ພາຊິກາຍ ວາ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ທເທຍ຺ຍ, ປາຈິຕ຺ຕິຍ’’ນ຺ຕິ.

໒໗໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອເຈລໂກ ນາມ ໂຍ ໂກຈິ ປຣິພ຺ພາຊກສມາປນ຺ໂນ ນຄ຺ໂຄ.

ປຣິພ຺ພາຊໂກ ນາມ ຠິກ຺ຂຸຎ຺ຈ ສາມເຓຣຎ຺ຈ ຐເປຕ຺ວາ ໂຍ ໂກຈິ ປຣິພ຺ພາຊກສມາປນ຺ໂນ.

ປຣິພ຺ພາຊິກາ ນາມ ຠິກ຺ຂຸນິຎ຺ຈ ສິກ຺ຂມານຎ຺ຈ ສາມເຓຣິຎ຺ຈ ຐເປຕ຺ວາ ຍາ ກາຈິ ປຣິພ຺ພາຊິກສມາປນ຺ນາ.

ຂາທນີຍໍ ນາມ ປຎ຺ຈ ໂຠຊນານິ – ອຸທກທນ຺ຕໂປນໍ ຐເປຕ຺ວາ ອວເສສໍ ຂາທນີຍໍ ນາມ.

ໂຠຊນີຍໍ ນາມ ປຎ຺ຈ ໂຠຊນານິ – ໂອທໂນ, ກຸມ຺ມາໂສ, ສຕ຺ຕຸ, ມຈ຺ໂຉ, ມໍສໍ.

ທເທຍ຺ຍາຕິ ກາເຍນ ວາ ກາຍປຏິພທ຺ເຘນ ວາ ນິສ຺ສຄ຺ຄິເຍນ ວາ ເທຕິ, ອາປຕ຺ຕິ ປາຈິຕ຺ຕິຍສ຺ສ.

໒໗໒. ຕິຕ຺ຖິເຍ ຕິຕ຺ຖິຍສຎ຺ຎີ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ເທຕິ, ອາປຕ຺ຕິ ປາຈິຕ຺ຕິຍສ຺ສ. ຕິຕ຺ຖິເຍ ເວມຕິໂກ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ເທຕິ, ອາປຕ຺ຕິ ປາຈິຕ຺ຕິຍສ຺ສ. ຕິຕ຺ຖິເຍ ອຕິຕ຺ຖິຍສຎ຺ຎີ ສຫຕ຺ຖາ ຂາທນີຍໍ ວາ ໂຠຊນີຍໍ ວາ ເທຕິ, ອາປຕ຺ຕິ ປາຈິຕ຺ຕິຍສ຺ສ.

ອຸທກທນ຺ຕໂປນໍ ເທຕິ, ອາປຕ຺ຕິ ທຸກ຺ກຏສ຺ສ. ອຕິຕ຺ຖິເຍ ຕິຕ຺ຖິຍສຎ຺ຎີ, ອາປຕ຺ຕິ ທຸກ຺ກຏສ຺ສ. ອຕິຕ຺ຖິເຍ ເວມຕິໂກ, ອາປຕ຺ຕິ ທຸກ຺ກຏສ຺ສ. ອຕິຕ຺ຖິເຍ ອຕິຕ຺ຖິຍສຎ຺ຎີ, ອນາປຕ຺ຕິ.

໒໗໓. ອນາປຕ຺ຕິ ທາເປຕິ ນ ເທຕິ, ອຸປນິກ຺ຂິປິຕ຺ວາ ເທຕິ, ພາຫິຣາເລປໍ ເທຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອເຈລກສິກ຺ຂາປທໍ ນິຏ຺ຐິຕໍ ປຐມໍ.