໒. ຄຓໂຠຊນສິກ຺ຂາປທໍ

໒໐໙. ເຕນ ສມເຍນ ພຸທ຺ໂຘ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ເທວທຕ຺ໂຕ ປຣິຫີນລາຠສກ຺ກາໂຣ ສປຣິໂສ ກຸເລສຸ ວິຎ຺ຎາເປຕ຺ວາ ວິຎ຺ຎາເປຕ຺ວາ ຠຸຎ຺ຊຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ກຸເລສຸ ວິຎ຺ຎາເປຕ຺ວາ ວິຎ຺ຎາເປຕ຺ວາ ຠຸຎ຺ຊິສ຺ສນ຺ຕິ! ກສ຺ສ ສມ຺ປນ຺ນໍ ນ ມນາປໍ, ກສ຺ສ ສາທຸໍ ນ ຣຸຈ຺ຈຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ເທວທຕ຺ໂຕ ສປຣິໂສ ກຸເລສຸ ວິຎ຺ຎາເປຕ຺ວາ ວິຎ຺ຎາເປຕ຺ວາ ຠຸຎ຺ຊິສ຺ສຕີ’’ຕິ…ເປ… ສຈ຺ຈໍ ກິຣ ຕ຺ວໍ, ເທວທຕ຺ຕ, ສປຣິໂສ ກຸເລສຸ ວິຎ຺ຎາເປຕ຺ວາ ວິຎ຺ຎາເປຕ຺ວາ ຠຸຎ຺ຊສີຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ສປຣິໂສ ກຸເລສຸ ວິຎ຺ຎາເປຕ຺ວາ ວິຎ຺ຎາເປຕ຺ວາ ຠຸຎ຺ຊິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໐. ເຕນ ໂຂ ປນ ສມເຍນ ມນຸສ຺ສາ ຄິລາເນ ຠິກ຺ຂູ ຠຕ຺ເຕນ ນິມນ຺ເຕນ຺ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໑. ເຕນ ໂຂ ປນ ສມເຍນ ມນຸສ຺ສາ ຈີວຣທານສມເຍ ສຈີວຣຠຕ຺ຕໍ ປຏິຍາເທຕ຺ວາ ຠິກ຺ຂູ ນິມນ຺ເຕນ຺ຕິ – ‘‘ໂຠເຊຕ຺ວາ ຈີວເຣນ ອຈ຺ຉາເທສ຺ສາມາ’’ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຈີວຣໍ ປຣິຕ຺ຕໍ ອຸປ຺ປຊ຺ຊຕິ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຈີວຣທານສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໒. ເຕນ ໂຂ ປນ ສມເຍນ ມນຸສ຺ສາ ຈີວຣກາຣເກ ຠິກ຺ຂູ ຠຕ຺ເຕນ ນິມນ຺ເຕນ຺ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ຈີວຣກາຣສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ, ຈີວຣກາຣສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໓. ເຕນ ໂຂ ປນ ສມເຍນ ຠິກ຺ຂູ ມນຸສ຺ເສຫິ ສທ຺ຘິໍ ອທ຺ຘານໍ ຄຈ຺ຉນ຺ຕິ. ອຖ ໂຂ ເຕ ຠິກ຺ຂູ ເຕ ມນຸສ຺ເສ ເອຕທໂວຈຸໍ – ‘‘ມຸຫຸຕ຺ຕໍ, ອາວຸໂສ, ອາຄເມຖ; ປິຓ຺ຑາຍ ຈຣິສ຺ສາມາ’’ຕິ. ເຕ ເອວມາຫໍສຸ – ‘‘ອິເຘວ, ຠນ຺ເຕ, ຠຸຎ຺ຊຖາ’’ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນ ປຏິຄ຺ຄຓ຺ຫນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ອທ຺ຘານຄມນສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ, ຈີວຣກາຣສມໂຍ, ອທ຺ຘານຄມນສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໔. ເຕນ ໂຂ ປນ ສມເຍນ ຠິກ຺ຂູ ມນຸສ຺ເສຫິ ສທ຺ຘິໍ ນາວາຍ ຄຈ຺ຉນ຺ຕິ. ອຖ ໂຂ ເຕ ຠິກ຺ຂູ ເຕ ມນຸສ຺ເສ ເອຕທໂວຈຸໍ – ‘‘ມຸຫຸຕ຺ຕໍ, ອາວຸໂສ, ຕີຣໍ ອຸປເນຖ; ປິຓ຺ຑາຍ ຈຣິສ຺ສາມາ’’ຕິ. ເຕ ເອວມາຫໍສຸ – ‘‘ອິເຘວ, ຠນ຺ເຕ, ຠຸຎ຺ຊຖາ’’ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນ ປຏິຄ຺ຄຓ຺ຫນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ນາວາຠິຣຸຫນສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ, ຈີວຣກາຣສມໂຍ, ອທ຺ຘານຄມນສມໂຍ, ນາວາຠິຣຸຫນສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໕. ເຕນ ໐ ໂຂ ປນ ສມເຍນ ທິສາສຸ ວສ຺ສໍວຸຏ຺ຐາ ຠິກ຺ຂູ ຣາຊຄຫໍ ອາຄຈ຺ຉນ຺ຕິ ຠຄວນ຺ຕໍ ທສ຺ສນາຍ. ມນຸສ຺ສາ ນານາເວຣຊ຺ຊເກ ຠິກ຺ຂູ ປສ຺ສິຕ຺ວາ ຠຕ຺ເຕນ ນິມນ຺ເຕນ຺ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ອນຸຊານາມິ, ຠິກ຺ຂເວ, ມຫາສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ຄຓໂຠຊເນ, ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ, ຈີວຣກາຣສມໂຍ, ອທ຺ຘານຄມນສມໂຍ, ນາວາຠິຣຸຫນສມໂຍ, ມຫາສມໂຍ – ອຍໍ ຕຕ຺ຖ ສມໂຍ’’ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໒໑໖. ເຕນ ໂຂ ປນ ສມເຍນ ຣຎ຺ໂຎ ມາຄຘສ຺ສ ເສນິຍສ຺ສ ພິມ຺ພິສາຣສ຺ສ ຎາຕິສາໂລຫິໂຕ ອາຊີວເກສຸ ປພ຺ພຊິໂຕ ໂຫຕິ. ອຖ ໂຂ ໂສ ອາຊີວໂກ ເຍນ ຣາຊາ ມາຄໂຘ ເສນິໂຍ ພິມ຺ພິສາໂຣ ເຕນຸປສງ຺ກມິ; ອຸປສງ຺ກມິຕ຺ວາ ຣາຊານໍ ມາຄຘໍ ເສນິຍໍ ພິມ຺ພິສາຣໍ ເອຕທໂວຈ – ‘‘ອິຈ຺ຉາມຫໍ, ມຫາຣາຊ, ສພ຺ພປາສຓ຺ຑິກຠຕ຺ຕໍ ກາຕຸ’’ນ຺ຕິ. ‘‘ສເຈ ຕ຺ວໍ, ຠນ຺ເຕ, ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ປຐມໍ ໂຠເຊຍ຺ຍາສິ’’. ‘‘ເອວໍ ກເຣຍ຺ຍາມີ’’ຕິ. ອຖ ໂຂ ໂສ ອາຊີວໂກ ຠິກ຺ຂູນໍ ສນ຺ຕິເກ ທູຕໍ ປາເຫສິ – ‘‘ອຘິວາເສນ຺ຕຸ ເມ ຠິກ຺ຂູ ສ຺ວາຕນາຍ ຠຕ຺ຕ’’ນ຺ຕິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຘິວາເສນ຺ຕິ – ‘‘ປຏິກ຺ຂິຕ຺ຕໍ ຠຄວຕາ ຄຓໂຠຊນ’’ນ຺ຕິ. ອຖ ໂຂ ໂສ ອາຊີວໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ, ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິໂຕ ໂຂ ໂສ ອາຊີວໂກ ຠຄວນ຺ຕໍ ເອຕທໂວຈ – ‘‘ຠວມ຺ປິ ໂຄຕໂມ ປພ຺ພຊິໂຕ, ອຫມ຺ປິ ປພ຺ພຊິໂຕ; ອຣຫຕິ ປພ຺ພຊິໂຕ ປພ຺ພຊິຕສ຺ສ ປິຓ຺ຑໍ ປຏິຄ຺ຄເຫຕຸໍ. ອຘິວາເສຕຸ ເມ ຠວໍ ໂຄຕໂມ ສ຺ວາຕນາຍ ຠຕ຺ຕໍ ສທ຺ຘິໍ ຠິກ຺ຂຸສງ຺ເຆນາ’’ຕິ. ອຘິວາເສສິ ຠຄວາ ຕຸຓ຺ຫີຠາເວນ. ອຖ ໂຂ ໂສ ອາຊີວໂກ ຠຄວໂຕ ອຘິວາສນໍ ວິທິຕ຺ວາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ສມຓຠຕ຺ຕສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໒໑໗. ຄຓໂຠຊເນ , ອຎ຺ຎຕ຺ຣ ສມຍາ, ປາຈິຕ຺ຕິຍໍ. ຕຕ຺ຖາຍໍ ສມໂຍ. ຄິລານສມໂຍ, ຈີວຣທານສມໂຍ, ຈີວຣກາຣສມໂຍ, ອທ຺ຘານຄມນສມໂຍ, ນາວາຠິຣຸຫນສມໂຍ, ມຫາສມໂຍ, ສມຓຠຕ຺ຕສມໂຍ – ອຍໍ ຕຕ຺ຖ ສມໂຍ’’ຕິ.

໒໑໘. ຄຓໂຠຊນໍ ນາມ ຍຕ຺ຖ ຈຕ຺ຕາໂຣ ຠິກ຺ຂູ ປຎ຺ຈນ຺ນໍ ໂຠຊນານໍ ອຎ຺ຎຕເຣນ ໂຠຊເນນ ນິມນ຺ຕິຕາ ຠຸຎ຺ຊນ຺ຕິ. ເອຕໍ ຄຓໂຠຊນໍ ນາມ.

ອຎ຺ຎຕ຺ຣ ສມຍາຕິ ຐເປຕ຺ວາ ສມຍໍ.

ຄິລານສມໂຍ ນາມ ອນ຺ຕມໂສ ປາທາປິ ຜລິຕາ [ຜາລິຕາ (ສ຺ຍາ. ກ.)] ໂຫນ຺ຕິ. ‘‘ຄິລານສມໂຍ’’ຕິ ຠຸຎ຺ຊິຕພ຺ພໍ.

ຈີວຣທານສມໂຍ ນາມ ອນຕ຺ຖເຕ ກຖິເນ ວສ຺ສານສ຺ສ ປຈ຺ຉິໂມ ມາໂສ, ອຕ຺ຖເຕ ກຖິເນ ປຎ຺ຈມາສາ. ‘‘ຈີວຣທານສມໂຍ’’ຕິ ຠຸຎ຺ຊິຕພ຺ພໍ.

ຈີວຣກາຣສມໂຍ ນາມ ຈີວເຣ ກຍິຣມາເນ. ‘‘ຈີວຣກາຣສມໂຍ’’ຕິ ຠຸຎ຺ຊິຕພ຺ພໍ.

ອທ຺ຘານຄມນສມໂຍ ນາມ ‘‘ອທ຺ຘໂຍຊນໍ ຄຈ຺ຉິສ຺ສາມີ’’ຕິ ຠຸຎ຺ຊິຕພ຺ພໍ, ຄຈ຺ຉນ຺ເຕນ ຠຸຎ຺ຊິຕພ຺ພໍ, ຄເຕນ ຠຸຎ຺ຊິຕພ຺ພໍ.

ນາວາຠິຣຸຫນສມໂຍ ນາມ ‘‘ນາວໍ ອຠິຣຸຫິສ຺ສາມີ’’ຕິ ຠຸຎ຺ຊິຕພ຺ພໍ, ອາຣຸຬ຺ເຫນ ຠຸຎ຺ຊິຕພ຺ພໍ, ໂອຣຸຬ຺ເຫນ ຠຸຎ຺ຊິຕພ຺ພໍ.

ມຫາສມໂຍ ນາມ ຍຕ຺ຖ ທ຺ເວ ຕໂຍ ຠິກ຺ຂູ ປິຓ຺ຑາຍ ຈຣິຕ຺ວາ ຍາເປນ຺ຕິ, ຈຕຸຕ຺ເຖ ອາຄເຕ ນ ຍາເປນ຺ຕິ. ‘‘ມຫາສມໂຍ’’ຕິ ຠຸຎ຺ຊິຕພ຺ພໍ.

ສມຓຠຕ຺ຕສມໂຍ ນາມ ໂຍ ໂກຈິ ປຣິພ຺ພາຊກສມາປນ຺ໂນ ຠຕ຺ຕໍ ກໂຣຕິ. ‘‘ສມຓຠຕ຺ຕສມໂຍ’’ຕິ ຠຸຎ຺ຊິຕພ຺ພໍ.

‘‘ອຎ຺ຎຕ຺ຣ ສມຍາ ຠຸຎ຺ຊິສ຺ສາມີ’’ຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ປາຈິຕ຺ຕິຍສ຺ສ.

໒໑໙. ຄຓໂຠຊເນ ຄຓໂຠຊນສຎ຺ຎີ, ອຎ຺ຎຕ຺ຣ ສມຍາ, ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຄຓໂຠຊເນ ເວມຕິໂກ, ອຎ຺ຎຕ຺ຣ ສມຍາ, ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ. ຄຓໂຠຊເນ ນຄຓໂຠຊນສຎ຺ຎີ, ອຎ຺ຎຕ຺ຣ ສມຍາ, ຠຸຎ຺ຊຕິ, ອາປຕ຺ຕິ ປາຈິຕ຺ຕິຍສ຺ສ.

ນຄຓໂຠຊເນ ຄຓໂຠຊນສຎ຺ຎີ, ອາປຕ຺ຕິ ທຸກ຺ກຏສ຺ສ. ນຄຓໂຠຊເນ ເວມຕິໂກ, ອາປຕ຺ຕິ ທຸກ຺ກຏສ຺ສ. ນຄຓໂຠຊເນ ນຄຓໂຠຊນສຎ຺ຎີ, ອນາປຕ຺ຕິ.

໒໒໐. ອນາປຕ຺ຕິ ສມເຍ, ທ຺ເວ ຕໂຍ ເອກໂຕ ຠຸຎ຺ຊນ຺ຕິ, ປິຓ຺ຑາຍ ຈຣິຕ຺ວາ ເອກໂຕ ສນ຺ນິປຕິຕ຺ວາ ຠຸຎ຺ຊນ຺ຕິ, ນິຈ຺ຈຠຕ຺ຕໍ, ສລາກຠຕ຺ຕໍ, ປກ຺ຂິກໍ, ອຸໂປສຖິກໍ, ປາຏິປທິກໍ, ປຎ຺ຈ ໂຠຊນານິ ຐເປຕ຺ວາ ສພ຺ພຕ຺ຖ ອນາປຕ຺ຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຄຓໂຠຊນສິກ຺ຂາປທໍ ນິຏ຺ຐິຕໍ ທຸຕິຍໍ.