໙. ປຣິປາຈິຕສິກ຺ຂາປທໍ

໑໙໒. ເຕນ ສມເຍນ ພຸທ຺ໂຘ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ເຕນ ໂຂ ປນ ສມເຍນ ຖຸລ຺ລນນ຺ທາ ຠິກ຺ຂຸນີ ອຎ຺ຎຕຣສ຺ສ ກຸລສ຺ສ ກຸລູປິກາ ໂຫຕິ ນິຈ຺ຈຠຕ຺ຕິກາ. ເຕນ ຈ ຄຫປຕິນາ ເຖຣາ ຠິກ຺ຂູ ນິມນ຺ຕິຕາ ໂຫນ຺ຕິ. ອຖ ໂຂ ຖຸລ຺ລນນ຺ທາ ຠິກ຺ຂຸນີ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ຕໍ ກຸລໍ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ຄຫປຕິໍ ເອຕທໂວຈ – ‘‘ກິມິທໍ, ຄຫປຕິ, ປຫູຕໍ ຂາທນີຍໍ ໂຠຊນີຍໍ ປຏິຍຕ຺ຕ’’ນ຺ຕິ? ‘‘ເຖຣາ ມຍາ, ອຍ຺ເຍ, ນິມນ຺ຕິຕາ’’ຕິ. ‘‘ເກ ປນ ເຕ, ຄຫປຕິ, ເຖຣາ’’ຕິ? ‘‘ອຍ຺ໂຍ ສາຣິປຸຕ຺ໂຕ ອຍ຺ໂຍ ມຫາໂມຄ຺ຄລ຺ລາໂນ ອຍ຺ໂຍ ມຫາກຈ຺ຈາໂນ ອຍ຺ໂຍ ມຫາໂກຏ຺ຐິໂກ ອຍ຺ໂຍ ມຫາກປ຺ປິໂນ ອຍ຺ໂຍ ມຫາຈຸນ຺ໂທ ອຍ຺ໂຍ ອນຸຣຸທ຺ໂຘ ອຍ຺ໂຍ ເຣວໂຕ ອຍ຺ໂຍ ອຸປາລິ ອຍ຺ໂຍ ອານນ຺ໂທ ອຍ຺ໂຍ ຣາຫຸໂລ’’ຕິ. ‘‘ກິໍ ປນ ຕ຺ວໍ, ຄຫປຕິ, ມຫານາເຄ ຕິຏ຺ຐມາເນ ເຈຏເກ ນິມນ຺ເຕສີ’’ຕິ?

‘‘ເກ ປນ ເຕ, ອຍ຺ເຍ, ມຫານາຄາ’’ຕິ? ‘‘ອຍ຺ໂຍ ເທວທຕ຺ໂຕ ອຍ຺ໂຍ ໂກກາລິໂກ ອຍ຺ໂຍ ກຏໂມທກຕິສ຺ສໂກ [ກຏໂມຣກຕິສ຺ສໂກ (ສີ.) ກຕໂມຣກຕິສ຺ສໂກ (ສ຺ຍາ.)] ອຍ຺ໂຍ ຂຓ຺ຑເທວິຍາ ປຸຕ຺ໂຕ ອຍ຺ໂຍ ສມຸທ຺ທທຕ຺ໂຕ’’ຕິ. ອຍໍ ຈຣຫິ ຖຸລ຺ລນນ຺ທາຍ ຠິກ຺ຂຸນິຍາ ອນ຺ຕຣາ ກຖາ ວິປ຺ປກຕາ, ອຖ ເຕ ເຖຣາ ຠິກ຺ຂູ ປວິສິໍສຸ. ‘‘ສຈ຺ຈໍ ມຫານາຄາ ໂຂ ຕຍາ, ຄຫປຕິ, ນິມນ຺ຕິຕາ’’ຕິ. ‘‘ອິທາເນວ ໂຂ ຕ຺ວໍ, ອຍ຺ເຍ, ເຈຏເກ ອກາສິ; ອິທານິ ມຫານາເຄ’’ຕິ. ຆຣໂຕ ຈ ນິກ຺ກຑ຺ຒິ, ນິຈ຺ຈຠຕ຺ຕຎ຺ຈ ປຈ຺ຉິນ຺ທິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ເທວທຕ຺ໂຕ ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊິສ຺ສຕີ’’ຕິ…ເປ… ‘‘ສຈ຺ຈໍ ກິຣ ຕ຺ວໍ, ເທວທຕ຺ຕ, ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊສີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕ຺ວໍ, ໂມຆປຸຣິສ, ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊິສ຺ສສິ. ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

‘‘ໂຍ ປນ ຠິກ຺ຂຸ ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ເຊຍ຺ຍ, ປາຈິຕ຺ຕິຍ’’ນ຺ຕິ.

ເອວຎ຺ຈິທໍ ຠຄວຕາ ຠິກ຺ຂູນໍ ສິກ຺ຂາປທໍ ປຎ຺ຎຕ຺ຕໍ ໂຫຕິ.

໑໙໓. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຣາຊຄຫາ ປພ຺ພຊິໂຕ ຎາຕິກຸລໍ ອຄມາສິ. ມນຸສ຺ສາ – ‘‘ຈິຣສ຺ສມ຺ປິ ຠທນ຺ໂຕ ອາຄໂຕ’’ຕິ ສກ຺ກຈ຺ຈໍ ຠຕ຺ຕໍ ອກໍສຸ. ຕສ຺ສ ກຸລສ຺ສ ກຸລູປິກາ ຠິກ຺ຂຸນີ ເຕ ມນຸສ຺ເສ ເອຕທໂວຈ – ‘‘ເທຖຍ຺ຍສ຺ສ, ອາວຸໂສ, ຠຕ຺ຕ’’ນ຺ຕິ. ອຖ ໂຂ ໂສ ຠິກ຺ຂຸ – ‘‘ຠຄວຕາ ປຏິກ຺ຂິຕ຺ຕໍ ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊິຕຸ’’ນ຺ຕິ ກຸກ຺ກຸຈ຺ຈາຍນ຺ໂຕ ນ ປຏິຄ຺ຄເຫສິ. ນາສກ຺ຂິ ປິຓ຺ຑາຍ ຈຣິຕຸໍ, ຉິນ຺ນຠຕ຺ໂຕ ອໂຫສິ. ອຖ ໂຂ ໂສ ຠິກ຺ຂຸ ອາຣາມໍ ຄນ຺ຕ຺ວາ ຠິກ຺ຂູນໍ ເອຕມຕ຺ຖໍ ອາໂຣເຈສິ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ອນຸຊານາມິ, ຠິກ຺ຂເວ, ປຸພ຺ເພ ຄິຫິສມາຣມ຺ເຠ ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ຊິຕຸໍ. ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໑໙໔. ‘‘ໂຍ ປນ ຠິກ຺ຂຸ ຊານໍ ຠິກ຺ຂຸນິປຣິປາຈິຕໍ ປິຓ຺ຑປາຕໍ ຠຸຎ຺ເຊຍ຺ຍ, ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ, ປາຈິຕ຺ຕິຍ’’ນ຺ຕິ.

໑໙໕. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຊານາຕິ ນາມ ສາມໍ ວາ ຊານາຕິ ອຎ຺ເຎ ວາ ຕສ຺ສ ອາໂຣເຈນ຺ຕິ ສາ ວາ ອາໂຣເຈຕິ.

ຠິກ຺ຂຸນີ ນາມ ອຸຠໂຕສງ຺ເຆ ອຸປສມ຺ປນ຺ນາ.

ປຣິປາເຈຕິ ນາມ ປຸພ຺ເພ ອທາຕຸກາມານໍ ອກຕ຺ຕຸກາມານໍ – ‘‘ອຍ຺ໂຍ ຠາຓໂກ, ອຍ຺ໂຍ ພຫຸສ຺ສຸໂຕ, ອຍ຺ໂຍ ສຸຕ຺ຕນ຺ຕິໂກ, ອຍ຺ໂຍ ວິນຍຘໂຣ, ອຍ຺ໂຍ ຘມ຺ມກຖິໂກ, ເທຖ ອຍ຺ຍສ຺ສ, ກໂຣຖ ອຍ຺ຍສ຺ສາ’’ຕິ ເອສາ ປຣິປາເຈຕິ ນາມ.

ປິຓ຺ຑປາໂຕ ນາມ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ໂຠຊນໍ.

ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາຕິ ຐເປຕ຺ວາ ຄິຫິສມາຣມ຺ຠໍ.

ຄິຫິສມາຣມ຺ໂຠ ນາມ ຎາຕກາ ວາ ໂຫນ຺ຕິ ປວາຣິຕາ ວາ ປກຕິປຏິຍຕ຺ຕໍ ວາ.

ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສ. ອຊ຺ໂຌຫາເຣ ອຊ຺ໂຌຫາເຣ, ອາປຕ຺ຕິ ປາຈິຕ຺ຕິຍສ຺ສ.

໑໙໖. ປຣິປາຈິເຕ ປຣິປາຈິຕສຎ຺ຎີ ຠຸຎ຺ຊຕິ, ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ, ອາປຕ຺ຕິ ປາຈິຕ຺ຕິຍສ຺ສ. ປຣິປາຈິເຕ ເວມຕິໂກ ຠຸຎ຺ຊຕິ, ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ, ອາປຕ຺ຕິ ທຸກ຺ກຏສ຺ສ. ປຣິປາຈິເຕ ອປຣິປາຈິຕສຎ຺ຎີ ຠຸຎ຺ຊຕິ, ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ, ອນາປຕ຺ຕິ. ເອກໂຕອຸປສມ຺ປນ຺ນາຍ ປຣິປາຈິຕໍ ຠຸຎ຺ຊຕິ, ອຎ຺ຎຕ຺ຣ ປຸພ຺ເພ ຄິຫິສມາຣມ຺ຠາ, ອາປຕ຺ຕິ ທຸກ຺ກຏສ຺ສ. ອປຣິປາຈິເຕ ປຣິປາຈິຕສຎ຺ຎີ, ອາປຕ຺ຕິ ທຸກ຺ກຏສ຺ສ. ອປຣິປາຈິຕ຺ເຕ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປຣິປາຈິເຕ ອປຣິປາຈິຕສຎ຺ຎີ, ອນາປຕ຺ຕິ.

໑໙໗. ອນາປຕ຺ຕິ ປຸພ຺ເພ ຄິຫິສມາຣມ຺ເຠ, ສິກ຺ຂມານາ ປຣິປາເຈຕິ, ສາມເຓຣີ ປຣິປາເຈຕິ, ປຎ຺ຈ ໂຠຊນານິ ຐເປຕ຺ວາ ສພ຺ພຕ຺ຖ ອນາປຕ຺ຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຣິປາຈິຕສິກ຺ຂາປທໍ ນິຏ຺ຐິຕໍ ນວມໍ.