໖. ຈີວຣສິພ຺ພນສິກ຺ຂາປທໍ

໑໗໕. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸທາຍີ ປຏ຺ໂຏ [ປຏ຺ໂຐ (ສີ. ສ຺ຍາ.)] ໂຫຕິ ຈີວຣກມ຺ມໍ ກາຕຸໍ. ອຎ຺ຎຕຣາ ຠິກ຺ຂຸນີ ເຍນາຍສ຺ມາ ອຸທາຍີ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸທາຍິໍ ເອຕທໂວຈ – ‘‘ສາຘຸ ເມ, ຠນ຺ເຕ, ອຍ຺ໂຍ ຈີວຣໍ ສິພ຺ພຕູ’’ຕິ. ອຖ ໂຂ ອາຍສ຺ມາ ອຸທາຍີ ຕສ຺ສາ ຠິກ຺ຂຸນິຍາ ຈີວຣໍ ສິພ຺ພິຕ຺ວາ ສຸຣຕ຺ຕໍ ສຸປຣິກມ຺ມກຕໍ ກຕ຺ວາ ມຊ຺ເຌ ປຏິຠານຈິຕ຺ຕໍ ວຸຏ຺ຐາເປຕ຺ວາ ສໍຫຣິຕ຺ວາ ນິກ຺ຂິປິ. ອຖ ໂຂ ສາ ຠິກ຺ຂຸນີ ເຍນາຍສ຺ມາ ອຸທາຍີ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸທາຍິໍ ເອຕທໂວຈ – ‘‘ກຫໍ ຕໍ, ຠນ຺ເຕ, ຈີວຣ’’ນ຺ຕິ? ‘‘ຫນ຺ທ, ຠຄິນິ, ອິມໍ ຈີວຣໍ ຍຖາສໍຫຏໍ ຫຣິຕ຺ວາ ນິກ຺ຂິປິຕ຺ວາ ຍທາ ຠິກ຺ຂຸນິສງ຺ໂຆ ໂອວາທໍ ອາຄຈ຺ຉຕິ ຕທາ ອິມໍ ຈີວຣໍ ປາຣຸປິຕ຺ວາ ຠິກ຺ຂຸນິສງ຺ຆສ຺ສ ປິຏ຺ຐິໂຕ ປິຏ຺ຐິໂຕ ອາຄຈ຺ຉາ’’ຕິ. ອຖ ໂຂ ສາ ຠິກ຺ຂຸນີ ຕໍ ຈີວຣໍ ຍຖາສໍຫຏໍ ຫຣິຕ຺ວາ ນິກ຺ຂິປິຕ຺ວາ ຍທາ ຠິກ຺ຂຸນິສງ຺ໂຆ ໂອວາທໍ ອາຄຈ຺ຉຕິ ຕທາ ຕໍ ຈີວຣໍ ປາຣຸປິຕ຺ວາ ຠິກ຺ຂຸນິສງ຺ຆສ຺ສ ປິຏ຺ຐິໂຕ ປິຏ຺ຐິໂຕ ອາຄຈ຺ຉຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ຍາວ ຉິນ຺ນິກາ ອິມາ ຠິກ຺ຂຸນິໂຍ ຘຸຕ຺ຕິກາ ອຫິຣິກາໂຍ, ຍຕ຺ຣ ຫິ ນາມ ຈີວເຣ ປຏິຠານຈິຕ຺ຕໍ ວຸຏ຺ຐາເປສ຺ສນ຺ຕີ’’ຕິ!

ຠິກ຺ຂຸນິໂຍ ເອວມາຫໍສຸ – ‘‘ກສ຺ສິທໍ ກມ຺ມ’’ນ຺ຕິ? ‘‘ອຍ຺ຍສ຺ສ ອຸທາຍິສ຺ສາ’’ຕິ. ‘‘ເຍປິ ເຕ ຉິນ຺ນກາ ຘຸຕ຺ຕກາ ອຫິຣິກາ ເຕສມ຺ປິ ເອວຣູປໍ ນ ໂສເຠຍ຺ຍ, ກິໍ ປນ ອຍ຺ຍສ຺ສ ອຸທາຍິສ຺ສາ’’ຕິ! ອຖ ໂຂ ຕາ ຠິກ຺ຂຸນິໂຍ ຠິກ຺ຂູນໍ ເອຕມຕ຺ຖໍ ອາໂຣເຈສຸໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸທາຍີ ຠິກ຺ຂຸນິຍາ ຈີວຣໍ ສິພ຺ພິສ຺ສຕີ’’ຕິ…ເປ… ສຈ຺ຈໍ ກິຣ ຕ຺ວໍ, ອຸທາຍິ, ຠິກ຺ຂຸນິຍາ ຈີວຣໍ ສິພ຺ພສີ’’ຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕິກາ ເຕ, ອຸທາຍິ, ອຎ຺ຎາຕິກາ’’ຕິ? ‘‘ອຎ຺ຎາຕິກາ, ຠຄວາ’’ຕິ. ‘‘ອຎ຺ຎາຕໂກ, ໂມຆປຸຣິສ, ອຎ຺ຎາຕິກາຍ ນ ຊານາຕິ ປຕິຣູປໍ ວາ ອປ຺ປຕິຣູປໍ ວາ ປາສາທິກໍ ວາ ອປາສາທິກໍ ວາ. ກຖຎ຺ຫິ ນາມ ຕ຺ວໍ, ໂມຆປຸຣິສ, ອຎ຺ຎາຕິກາຍ ຠິກ຺ຂຸນິຍາ ຈີວຣໍ ສິພ຺ພິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໑໗໖. ‘‘ໂຍ ປນ ຠິກ຺ຂຸ ອຎ຺ຎາຕິກາຍ ຠິກ຺ຂຸນິຍາ ຈີວຣໍ ສິພ຺ເພຍ຺ຍ ວາ ສິພ຺ພາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໑໗໗. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອຎ຺ຎາຕິກາ ນາມ ມາຕິໂຕ ວາ ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ຘາ.

ຠິກ຺ຂຸນີ ນາມ ອຸຠໂຕສງ຺ເຆ ອຸປສມ຺ປນ຺ນາ.

ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ.

ສິພ຺ເພຍ຺ຍາຕິ ສຍໍ ສິພ຺ພຕິ ອາຣາປເຖ ອາຣາປເຖ ອາປຕ຺ຕິ ປາຈິຕ຺ຕິຍສ຺ສ.

ສິພ຺ພາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ. ສກິໍ ອາຓຕ຺ໂຕ ພຫຸກມ຺ປິ ສິພ຺ພຕິ, ອາປຕ຺ຕິ ປາຈິຕ຺ຕິຍສ຺ສ.

໑໗໘. ອຎ຺ຎາຕິກາຍ ອຎ຺ຎາຕິກສຎ຺ຎີ ຈີວຣໍ ສິພ຺ພຕິ ວາ ສິພ຺ພາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຎ຺ຎາຕິກາຍ ເວມຕິໂກ ຈີວຣໍ ສິພ຺ພຕິ ວາ ສິພ຺ພາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ອຎ຺ຎາຕິກາຍ ຎາຕິກສຎ຺ຎີ ຈີວຣໍ ສິພ຺ພຕິ ວາ ສິພ຺ພາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ເອກໂຕອຸປສມ຺ປນ຺ນາຍ ຈີວຣໍ ສິພ຺ພຕິ ວາ ສິພ຺ພາເປຕິ ວາ, ອາປຕ຺ຕິ ທຸກ຺ກຏສ຺ສ. ຎາຕິກາຍ ອຎ຺ຎາຕິກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕິກາຍ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕິກາຍ ຎາຕິກສຎ຺ຎີ, ອນາປຕ຺ຕິ.

໑໗໙. ອນາປຕ຺ຕິ ຎາຕິກາຍ, ຈີວຣໍ ຐເປຕ຺ວາ ອຎ຺ຎໍ ປຣິກ຺ຂາຣໍ ສິພ຺ພຕິ ວາ ສິພ຺ພາເປຕິ ວາ, ສິກ຺ຂມານາຍ, ສາມເຓຣິຍາ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຈີວຣສິພ຺ພນສິກ຺ຂາປທໍ ນິຏ຺ຐິຕໍ ຉຏ຺ຐໍ.