໖. ອນຸປຂຊ຺ຊສິກ຺ຂາປທໍ

໑໑໙. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ວຣເສຍ຺ຍາໂຍ ປລິພຸນ຺ເຘນ຺ຕິ, ເຖຣາ ຠິກ຺ຂູ ວຸຏ຺ຐາເປນ຺ຕິ [ເອຕ຺ຖ ເຕ ອິຕິ ກມ຺ມປທໍ ອູນໍ ວິຍ ທິສ຺ສຕິ]. ອຖ ໂຂ ຉພ຺ພຄ຺ຄິຍານໍ ຠິກ຺ຂູນໍ ເອຕທໂຫສິ – ‘‘ເກນ ນຸ ໂຂ ມຍໍ ອຸປາເຍນ ອິເຘວ ວສ຺ສໍ ວເສຍ຺ຍາມາ’’ຕິ? ອຖ ໂຂ ຉພ຺ພຄ຺ຄິຍາ ຠິກ຺ຂູ ເຖເຣ ຠິກ຺ຂູ ອນຸປຂຊ຺ຊ ເສຍ຺ຍໍ ກປ຺ເປນ຺ຕິ – ຍສ຺ສ ສມ຺ພາໂຘ ຠວິສ຺ສຕິ ໂສ ປກ຺ກມິສ຺ສຕີຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ເຖເຣ ຠິກ຺ຂູ ອນຸປຂຊ຺ຊ ເສຍ຺ຍໍ ກປ຺ເປສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ຉພ຺ພຄ຺ຄິເຍ ຠິກ຺ຂູ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ …ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ເຖເຣ ຠິກ຺ຂູ ອນຸປຂຊ຺ຊ ເສຍ຺ຍໍ ກປ຺ເປຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ເຖເຣ ຠິກ຺ຂູ ອນຸປຂຊ຺ຊ ເສຍ຺ຍໍ ກປ຺ເປສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໑໒໐. ‘‘ໂຍ ປນ ຠິກ຺ຂຸ ສງ຺ຆິເກ ວິຫາເຣ ຊານໍ ປຸພ຺ພຸປຄຕໍ ຠິກ຺ຂຸໍ ອນຸປຂຊ຺ຊ ເສຍ຺ຍໍ ກປ຺ເປຍ຺ຍ – ຍສ຺ສ ສມ຺ພາໂຘ ຠວິສ຺ສຕິ ໂສ ປກ຺ກມິສ຺ສຕີ’ຕິ, ເອຕເທວ ປຈ຺ຈຍໍ ກຣິຕ຺ວາ ອນຎ຺ຎໍ, ປາຈິຕ຺ຕິຍ’’ນ຺ຕິ.

໑໒໑. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ໒.໐໒໕໑ ອຕ຺ເຖ ອຘິປ຺ເປໂຕ ຠິກ຺ຂູຕິ.

ສງ຺ຆິໂກ ນາມ ວິຫາໂຣ ສງ຺ຆສ຺ສ ທິນ຺ໂນ ໂຫຕິ ປຣິຈ຺ຈຕ຺ໂຕ.

ຊານາຕິ ນາມ ວຸຑ຺ໂຒຕິ ຊານາຕິ, ຄິລາໂນຕິ ຊານາຕິ, ສງ຺ເຆນ ທິນ຺ໂນຕິ ຊານາຕິ.

ອນຸປຂຊ຺ຊາຕິ ອນຸປວິສິຕ຺ວາ.

ເສຍ຺ຍໍ ກປ຺ເປຍ຺ຍາຕິ ມຎ຺ຈສ຺ສ ວາ ປີຐສ຺ສ ວາ ປວິສນ຺ຕສ຺ສ ວາ ນິກ຺ຂມນ຺ຕສ຺ສ ວາ ອຸປຈາເຣ ເສຍ຺ຍໍ ສນ຺ຖຣຕິ ວາ ສນ຺ຖຣາເປຕິ ວາ, ອາປຕ຺ຕິ ທຸກ຺ກຏສ຺ສ. ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ເອຕເທວ ປຈ຺ຈຍໍ ກຣິຕ຺ວາ ອນຎ຺ຎນ຺ຕິ ນ ອຎ຺ໂຎ ໂກຈິ ປຈ຺ຈໂຍ ໂຫຕິ ອນຸປຂຊ຺ຊ ເສຍ຺ຍໍ ກປ຺ເປຕຸໍ.

໑໒໒. ສງ຺ຆິເກ ສງ຺ຆິກສຎ຺ຎີ ອນຸປຂຊ຺ຊ ເສຍ຺ຍໍ ກປ຺ເປຕິ, ອາປຕ຺ຕິ ປາຈິຕ຺ຕິຍສ຺ສ. ສງ຺ຆິເກ ເວມຕິໂກ ອນຸປຂຊ຺ຊ ເສຍ຺ຍໍ ກປ຺ເປຕິ, ອາປຕ຺ຕິ ປາຈິຕ຺ຕິຍສ຺ສ. ສງ຺ຆິເກ ປຸຄ຺ຄລິກສຎ຺ຎີ ອນຸປຂຊ຺ຊ ເສຍ຺ຍໍ ກປ຺ເປຕິ, ອາປຕ຺ຕິ ປາຈິຕ຺ຕິຍສ຺ສ.

ມຎ຺ຈສ຺ສ ວາ ປີຐສ຺ສ ວາ ປວິສນ຺ຕສ຺ສ ວາ ນິກ຺ຂມນ຺ຕສ຺ສ ວາ ອຸປຈາຣໍ ຐເປຕ຺ວາ ເສຍ຺ຍໍ ສນ຺ຖຣຕິ ວາ ສນ຺ຖຣາເປຕິ ວາ, ອາປຕ຺ຕິ ທຸກ຺ກຏສ຺ສ. ອຠິນິສີທຕິ ວາ ອຠິນິປຊ຺ຊຕິ ວາ, ອາປຕ຺ຕິ ທຸກ຺ກຏສ຺ສ. ວິຫາຣສ຺ສ ອຸປຈາເຣ ວາ ອຸປຏ຺ຐານສາລາຍໍ ວາ ມຓ຺ຑເປ ວາ ຣຸກ຺ຂມູເລ ວາ ອຊ຺ໂຌກາເສ ວາ ເສຍ຺ຍໍ ສນ຺ຖຣຕິ ວາ ສນ຺ຖຣາເປຕິ ວາ, ອາປຕ຺ຕິ ທຸກ຺ກຏສ຺ສ. ອຠິນິສີທຕິ ວາ ອຠິນິປ຺ປຊ຺ຊຕິ ວາ, ອາປຕ຺ຕິ ທຸກ຺ກຏສ຺ສ. ປຸຄ຺ຄລິເກ ສງ຺ຆິກສຎ຺ຎີ, ອາປຕ຺ຕິ ທຸກ຺ກຏສ຺ສ. ປຸຄ຺ຄລິເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ປຸຄ຺ຄລິເກ ປຸຄ຺ຄລິກສຎ຺ຎີ ອຎ຺ຎສ຺ສ ປຸຄ຺ຄລິເກ ອາປຕ຺ຕິ ທຸກ຺ກຏສ຺ສ. ອຕ຺ຕໂນ ປຸຄ຺ຄລິເກ ອນາປຕ຺ຕິ.

໑໒໓. ອນາປຕ຺ຕິ ຄິລາໂນ ປວິສຕິ, ສີເຕນ ວາ ອຸຓ຺ເຫນ ວາ ປີຬິໂຕ ປວິສຕິ, ອາປທາສຸ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອນຸປຂຊ຺ຊສິກ຺ຂາປທໍ ນິຏ຺ຐິຕໍ ຉຏ຺ຐໍ.