໑. ຠູຕຄາມສິກ຺ຂາປທໍ

໘໙. ເຕນ ສມເຍນ ພຸທ຺ໂຘ ຠຄວາ ອາຬວິຍໍ ວິຫຣຕິ ອຄ຺ຄາຬເວ ເຈຕິເຍ. ເຕນ ໂຂ ປນ ສມເຍນ ອາຬວກາ ຠິກ຺ຂູ ນວກມ຺ມໍ ກໂຣນ຺ຕາ ຣຸກ຺ຂໍ ຉິນ຺ທນ຺ຕິປິ ເຉທາເປນ຺ຕິປິ. ອຎ຺ຎຕໂຣປິ ອາຬວໂກ ຠິກ຺ຂຸ ຣຸກ຺ຂໍ ຉິນ຺ທຕິ. ຕສ຺ມິໍ ຣຸກ຺ເຂ ອຘິວຕ຺ຖາ ເທວຕາ ຕໍ ຠິກ຺ຂຸໍ ເອຕທໂວຈ – ‘‘ມາ, ຠນ຺ເຕ, ອຕ຺ຕໂນ ຠວນໍ ກຕ຺ຕຸກາໂມ ມຍ຺ຫໍ ຠວນໍ ຉິນ຺ທີ’’ຕິ. ໂສ ຠິກ຺ຂຸ ອນາທິຍນ຺ໂຕ ຉິນ຺ທິ ເຍວ, ຕສ຺ສາ ຈ ເທວຕາຍ ທາຣກສ຺ສ ພາຫຸໍ ອາໂກເຏສິ. ອຖ ໂຂ ຕສ຺ສາ ເທວຕາຍ ເອຕທໂຫສິ – ‘‘ຍໍນ຺ນູນາຫໍ ອິມໍ ຠິກ຺ຂຸໍ ອິເຘວ ຊີວິຕາ ໂວໂຣເປຍ຺ຍ’’ນ຺ຕິ. ອຖ ໂຂ ຕສ຺ສາ ເທວຕາຍ ເອຕທໂຫສິ – ‘‘ນ ໂຂ ເມຕໍ ປຕິຣູປໍ ຍາຫໍ ອິມໍ ຠິກ຺ຂຸໍ ອິເຘວ ຊີວິຕາ ໂວໂຣເປຍ຺ຍໍ. ຍນ຺ນູນາຫໍ ຠຄວໂຕ ເອຕມຕ຺ຖໍ ອາໂຣເຈຍ຺ຍ’’ນ຺ຕິ. ອຖ ໂຂ ສາ ເທວຕາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວໂຕ ເອຕມຕ຺ຖໍ ອາໂຣເຈສິ. ‘‘ສາຘຸ ສາຘຸ ເທວເຕ! ສາຘຸ ໂຂ ຕ຺ວໍ, ເທວເຕ, ຕໍ ຠິກ຺ຂຸໍ ຊີວິຕາ ນ ໂວໂຣເປສິ. ສຈຊ຺ຊ ຕ຺ວໍ, ເທວເຕ, ຕໍ ຠິກ຺ຂຸໍ ຊີວິຕາ ໂວໂຣເປຍ຺ຍາສິ, ພຫຸຎ຺ຈ ຕ຺ວໍ, ເທວເຕ, ອປຸຎ຺ຎໍ ປສເວຍ຺ຍາສິ. ຄຈ຺ຉ ຕ຺ວໍ, ເທວເຕ, ອມຸກສ຺ມິໍ ໂອກາເສ ຣຸກ຺ໂຂ ວິວິຕ຺ໂຕ ຕສ຺ມິໍ ອຸປຄຈ຺ຉາ’’ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ຣຸກ຺ຂໍ ຉິນ຺ທິສ຺ສນ຺ຕິປິ ເຉທາເປສ຺ສນ຺ຕິປິ ເອກິນ຺ທ຺ຣິຍໍ ສມຓາ ສກ຺ຍປຸຕ຺ຕິຍາ ຊີວໍ ວິເຫເຐສ຺ສນ຺ຕີ’’ຕິ!

ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຬວກາ ຠິກ຺ຂູ ຣຸກ຺ຂໍ ຉິນ຺ທິສ຺ສນ຺ຕິປິ ເຉທາເປສ຺ສນ຺ຕິປີ’’ຕິ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຣຸກ຺ຂໍ ຉິນ຺ທຖາປິ ເຉທາເປຖາປີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຣຸກ຺ຂໍ ຉິນ຺ທິສ຺ສຖາປິ, ເຉທາເປສ຺ສຖາປິ! ຊີວສຎ຺ຎິໂນ ຫິ, ໂມຆປຸຣິສາ, ມນຸສ຺ສາ ຣຸກ຺ຂສ຺ມິໍ, ເນຕໍ ໂມຆປຸຣິສາ ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໙໐. ‘‘ຠູຕຄາມປາຕພ຺ຍຕາຍ ປາຈິຕ຺ຕິຍ’’ນ຺ຕິ.

໙໑. ຠູຕຄາໂມ ນາມ ປຎ຺ຈ ພີຊຊາຕານິ – ມູລພີຊໍ, ຂນ຺ຘພີຊໍ, ຜຬຸພີຊໍ, ອຄ຺ຄພີຊໍ, ພີຊພີຊເມວ [ພີຊພີຊຎ຺ເຈວ (ອິຕິປິ)] ປຎ຺ຈມໍ.

ມູລພີຊໍ ນາມ – ຫລິທ຺ທິ, ສິງ຺ຄິເວຣໍ, ວຈາ, ວຈຕ຺ຕໍ, ອຕິວິສາ, ກຏຸກໂຣຫິຓີ, ອຸສີຣໍ, ຠທ຺ທມູຕ຺ຕກໍ, ຍານິ ວາ ປນຎ຺ຎານິປິ ອຕ຺ຖິ ມູເລ ຊາຍນ຺ຕິ, ມູເລ ສຎ຺ຊາຍນ຺ຕິ, ເອຕໍ ມູລພີຊໍ ນາມ.

ຂນ຺ຘພີຊໍ ນາມ – ອສ຺ສຕ຺ໂຖ, ນິຄ຺ໂຣໂຘ, ປິລກ຺ໂຂ, ອຸທຸມ຺ພໂຣ, ກຈ຺ຉໂກ, ກປິຕ຺ຖໂນ, ຍານິ ວາ ປນຎ຺ຎານິປິ ອຕ຺ຖິ ຂນ຺ເຘ ຊາຍນ຺ຕິ, ຂນ຺ເຘ ສຎ຺ຊາຍນ຺ຕິ, ເອຕໍ ຂນ຺ຘພີຊໍ ນາມ.

ຜຬຸພີຊໍ ນາມ – ອຸຈ຺ຉຸ, ເວຬຸ, ນໂຬ, ຍານິ ວາ ປນຎ຺ຎານິປິ ອຕ຺ຖິ ປພ຺ເພ ຊາຍນ຺ຕິ, ປພ຺ເພ ສຎ຺ຊາຍນ຺ຕິ, ເອຕໍ ຜຬຸພີຊໍ ນາມ.

ອຄ຺ຄພີຊໍ ນາມ – ອຊ຺ຊຸກໍ, ຜຓິຊ຺ຊກໍ, ຫິຣິເວຣໍ, ຍານິ ວາ ປນຎ຺ຎານິປິ ອຕ຺ຖິ ອຄ຺ເຄ ຊາຍນ຺ຕິ, ອຄ຺ເຄ ສຎ຺ຊາຍນ຺ຕິ, ເອຕໍ ອຄ຺ຄພີຊໍ ນາມ.

ພີຊພີຊໍ ນາມ – ປຸພ຺ພຓ຺ຓໍ, ອປຣຓ຺ຓໍ, ຍານິ ວາ ປນຎ຺ຎານິປິ ອຕ຺ຖິ ພີເຊ ຊາຍນ຺ຕິ, ພີເຊ ສຎ຺ຊາຍນ຺ຕິ, ເອຕໍ ພີຊພີຊໍ ນາມ.

໙໒. ພີເຊ ພີຊສຎ຺ຎີ ຉິນ຺ທຕິ ວາ ເຉທາເປຕິ ວາ, ຠິນ຺ທຕິ ວາ ເຠທາເປຕິ ວາ, ປຈຕິ ວາ ປຈາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ. ພີເຊ ເວມຕິໂກ ຉິນ຺ທຕິ ວາ ເຉທາເປຕິ ວາ, ຠິນ຺ທຕິ ວາ ເຠທາເປຕິ ວາ, ປຈຕິ ວາ ປຈາເປຕິ ວາ, ອາປຕ຺ຕິ ທຸກ຺ກຏສ຺ສ. ພີເຊ ອພີຊສຎ຺ຎີ ຉິນ຺ທຕິ ວາ ເຉທາເປຕິ ວາ, ຠິນ຺ທຕິ ວາ ເຠທາເປຕິ ວາ, ປຈຕິ ວາ ປຈາເປຕິ ວາ, ອນາປຕ຺ຕິ. ອພີເຊ ພີຊສຎ຺ຎີ ອາປຕ຺ຕິ ທຸກ຺ກຏສ຺ສ. ອພີເຊ ເວມຕິໂກ, ອາປຕ຺ຕິ ທຸກ຺ກຏສ຺ສ. ອພີເຊ ອພີຊສຎ຺ຎີ, ອນາປຕ຺ຕິ.

໙໓. ອນາປຕ຺ຕິ – ‘‘ອິມໍ ຊານ, ອິມໍ ເທຫິ, ອິມໍ ອາຫຣ, ອິມິນາ ອຕ຺ໂຖ, ອິມໍ ກປ຺ປິຍໍ ກໂຣຫີ’’ຕິ ຠຓຕິ, ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕສ຺ສ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ຠູຕຄາມສິກ຺ຂາປທໍ ນິຏ຺ຐິຕໍ ປຐມໍ.