໙. ທຸຏ຺ຐຸລ຺ລາໂຣຈນສິກ຺ຂາປທໍ

໗໘. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ຉພ຺ພຄ຺ຄິເຍຫິ ຠິກ຺ຂູຫິ ສທ຺ຘິໍ ຠຓ຺ຑນກໂຕ ໂຫຕິ. ໂສ ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ ສງ຺ຆໍ ຕສ຺ສາ ອາປຕ຺ຕິຍາ ປຣິວາສໍ ຍາຈິ. ຕສ຺ສ ສງ຺ໂຆ ຕສ຺ສາ ອາປຕ຺ຕິຍາ ປຣິວາສໍ ອທາສິ. ເຕນ ໂຂ ປນ ສມເຍນ ສາວຕ຺ຖິຍໍ ອຎ຺ຎຕຣສ຺ສ ປູຄສ຺ສ ສງ຺ຆຠຕ຺ຕໍ ໂຫຕິ. ໂສ ປຣິວສນ຺ໂຕ ຠຕ຺ຕຄ຺ເຄ ອາສນປຣິຍນ຺ເຕ ນິສີທິ. ຉພ຺ພຄ຺ຄິຍາ ຠິກ຺ຂູ ເຕ ອຸປາສເກ ເອຕທໂວຈຸໍ – ‘‘ເອໂສ, ອາວຸໂສ, ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ຕຸມ຺ຫາກໍ ສມ຺ຠາວິໂຕ ກຸລູປໂກ; ເຍເນວ ຫຕ຺ເຖນ ສທ຺ຘາເທຍ຺ຍໍ ຠຸຎ຺ຊຕິ ເຕເນວ ຫຕ຺ເຖນ ອຸປກ຺ກມິຕ຺ວາ ອສຸຈິໍ ໂມເຈສິ. ໂສ ສຎ຺ເຈຕນິກໍ ສຸກ຺ກວິສ຺ສຏ຺ຐິໍ ອາປຕ຺ຕິໍ ອາປຊ຺ຊິຕ຺ວາ ສງ຺ຆໍ ຕສ຺ສາ ອາປຕ຺ຕິຍາ ປຣິວາສໍ ຍາຈິ. ຕສ຺ສ ສງ຺ໂຆ ຕສ຺ສາ ອາປຕ຺ຕິຍາ ປຣິວາສໍ ອທາສິ. ໂສ ປຣິວສນ຺ໂຕ ອາສນປຣິຍນ຺ເຕ ນິສິນ຺ໂນ’’ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉພ຺ພຄ຺ຄິຍາ ຠິກ຺ຂູ ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈສ຺ສນ຺ຕີ’’ຕິ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈຖາ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈສ຺ສຖ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໗໙. ‘‘ໂຍ ປນ ຠິກ຺ຂຸ ຠິກ຺ຂຸສ຺ສ ທຸຏ຺ຐຸລ຺ລໍ ອາປຕ຺ຕິໍ ອນຸປສມ຺ປນ຺ນສ຺ສ ອາໂຣເຈຍ຺ຍ, ອຎ຺ຎຕ຺ຣ ຠິກ຺ຂຸສມ຺ມຸຕິຍາ [ຠິກ຺ຂຸສມ຺ມຕິຍາ (ສ຺ຍາ.)], ປາຈິຕ຺ຕິຍ’’ນ຺ຕິ.

໘໐. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ຠິກ຺ຂຸສ຺ສາຕິ ອຎ຺ຎສ຺ສ ຠິກ຺ຂຸສ຺ສ.

ທຸຏ຺ຐຸລ຺ລາ ນາມ ອາປຕ຺ຕິ – ຈຕ຺ຕາຣິ ຈ ປາຣາຊິການິ, ເຕຣສ ຈ ສງ຺ຆາທິເສສາ.

ອນຸປສມ຺ປນ຺ໂນ ນາມ ຠິກ຺ຂຸຎ຺ຈ ຠິກ຺ຂຸນິຎ຺ຈ ຐເປຕ຺ວາ ອວເສໂສ ອນຸປສມ຺ປນ຺ໂນ ນາມ.

ອາໂຣເຈຍ຺ຍາຕິ ອາໂຣເຈຍ຺ຍ ອິຕ຺ຖິຍາ ວາ ປຸຣິສສ຺ສ ວາ ຄຫຏ຺ຐສ຺ສ ວາ ປພ຺ພຊິຕສ຺ສ ວາ.

ອຎ຺ຎຕ຺ຣ ຠິກ຺ຂຸສມ຺ມຸຕິຍາຕິ ຐເປຕ຺ວາ ຠິກ຺ຂຸສມ຺ມຸຕິໍ.

ອຕ຺ຖິ ຠິກ຺ຂຸສມ຺ມຸຕິ ອາປຕ຺ຕິປຣິຍນ຺ຕາ, ນ ກຸລປຣິຍນ຺ຕາ. ອຕ຺ຖິ ຠິກ຺ຂຸສມ຺ມຸຕິ ກຸລປຣິຍນ຺ຕາ, ນ ອາປຕ຺ຕິປຣິຍນ຺ຕາ, ອຕ຺ຖິ ຠິກ຺ຂຸສມ຺ມຸຕິ ອາປຕ຺ຕິປຣິຍນ຺ຕາ ຈ ກຸລປຣິຍນ຺ຕາ ຈ, ອຕ຺ຖິ ຠິກ຺ຂຸສມ຺ມຸຕິ ເນວ ອາປຕ຺ຕິປຣິຍນ຺ຕາ ນ ກຸລປຣິຍນ຺ຕາ.

ອາປຕ຺ຕິປຣິຍນ຺ຕາ ນາມ ອາປຕ຺ຕິໂຍ ປຣິຄ຺ຄຫິຕາໂຍ ໂຫນ຺ຕິ – ‘‘ເອຕ຺ຕກາຫິ ອາປຕ຺ຕີຫິ ອາໂຣເຈຕພ຺ໂພ’’ຕິ.

ກຸລປຣິຍນ຺ຕາ ນາມ ກຸລານິ ປຣິຄ຺ຄຫິຕານິ ໂຫນ຺ຕິ – ‘‘ເອຕ຺ຕເກສຸ ກຸເລສຸ ອາໂຣເຈຕພ຺ໂພ’’ຕິ. ອາປຕ຺ຕິປຣິຍນ຺ຕາ ຈ ກຸລປຣິຍນ຺ຕາ ຈ ນາມ ອາປຕ຺ຕິໂຍ ຈ ປຣິຄ຺ຄຫິຕາໂຍ ໂຫນ຺ຕິ, ກຸລານິ ຈ ປຣິຄ຺ຄຫິຕານິ ໂຫນ຺ຕິ – ‘‘ເອຕ຺ຕກາຫິ ອາປຕ຺ຕີຫິ ເອຕ຺ຕເກສຸ ກຸເລສຸ ອາໂຣເຈຕພ຺ໂພ’’ຕິ. ເນວ ອາປຕ຺ຕິປຣິຍນ຺ຕາ ນ ກຸລປຣິຍນ຺ຕາ ນາມ ອາປຕ຺ຕິໂຍ ຈ ອປຣິຄ຺ຄຫິຕາໂຍ ໂຫນ຺ຕິ, ກຸລານິ ຈ ອປຣິຄ຺ຄຫິຕານິ ໂຫນ຺ຕິ – ‘‘ເອຕ຺ຕກາຫິ ອາປຕ຺ຕີຫິ ເອຕ຺ຕເກສຸ ກຸເລສຸ ອາໂຣເຈຕພ຺ໂພ’’ຕິ.

໘໑. ອາປຕ຺ຕິປຣິຍນ຺ເຕ ຍາ ອາປຕ຺ຕິໂຍ ປຣິຄ຺ຄຫິຕາໂຍ ໂຫນ຺ຕິ, ຕາ ອາປຕ຺ຕິໂຍ ຐເປຕ຺ວາ ອຎ຺ຎາຫິ ອາປຕ຺ຕີຫິ ອາໂຣເຈຕິ, ອາປຕ຺ຕິ ປາຈິຕ຺ຕິຍສ຺ສ.

ກຸລປຣິຍນ຺ເຕ ຍານິ ກຸລານິ ປຣິຄ຺ຄຫິຕານິ ໂຫນ຺ຕິ, ຕານິ ກຸລານິ ຐເປຕ຺ວາ ອຎ຺ເຎສຸ ກຸເລສຸ ອາໂຣເຈຕິ, ອາປຕ຺ຕິ ປາຈິຕ຺ຕິຍສ຺ສ.

ອາປຕ຺ຕິປຣິຍນ຺ເຕ ຈ ກຸລປຣິຍນ຺ເຕ ຈ ຍາ ອາປຕ຺ຕິໂຍ ປຣິຄ຺ຄຫິຕາໂຍ ໂຫນ຺ຕິ, ຕາ ອາປຕ຺ຕິໂຍ ຐເປຕ຺ວາ ຍານິ ກຸລານິ ປຣິຄ຺ຄຫິຕານິ ໂຫນ຺ຕິ, ຕານິ ກຸລານິ ຐເປຕ຺ວາ ອຎ຺ຎາຫິ ອາປຕ຺ຕີຫິ ອຎ຺ເຎສຸ ກຸເລສຸ ອາໂຣເຈຕິ, ອາປຕ຺ຕິ ປາຈິຕ຺ຕິຍສ຺ສ.

ເນວ ອາປຕ຺ຕິປຣິຍນ຺ເຕ ນ ກຸລປຣິຍນ຺ເຕ, ອນາປຕ຺ຕິ.

໘໒. ທຸຏ຺ຐຸລ຺ລາຍ ອາປຕ຺ຕິຍາ ທຸຏ຺ຐຸລ຺ລາປຕ຺ຕິສຎ຺ຎີ ອນຸປສມ຺ປນ຺ນສ຺ສ ອາໂຣເຈຕິ, ອຎ຺ຎຕ຺ຣ ຠິກ຺ຂຸສມ຺ມຸຕິຍາ, ອາປຕ຺ຕິ ປາຈິຕ຺ຕິຍສ຺ສ.

ທຸຏ຺ຐຸລ຺ລາຍ ອາປຕ຺ຕິຍາ ເວມຕິໂກ ອນຸປສມ຺ປນ຺ນສ຺ສ ອາໂຣເຈຕິ, ອຎ຺ຎຕ຺ຣ ຠິກ຺ຂຸສມ຺ມຸຕິຍາ, ອາປຕ຺ຕິ ປາຈິຕ຺ຕິຍສ຺ສ.

ທຸຏ຺ຐຸລ຺ລາຍ ອາປຕ຺ຕິຍາ ອທຸຏ຺ຐຸລ຺ລາປຕ຺ຕິສຎ຺ຎີ ອນຸປສມ຺ປນ຺ນສ຺ສ ອາໂຣເຈຕິ, ອຎ຺ຎຕ຺ຣ ຠິກ຺ຂຸສມ຺ມຸຕິຍາ, ອາປຕ຺ຕິ ປາຈິຕ຺ຕິຍສ຺ສ.

ອທຸຏ຺ຐຸລ຺ລໍ ອາປຕ຺ຕິໍ ອາໂຣເຈຕິ, ອາປຕ຺ຕິ ທຸກ຺ກຏສ຺ສ.

ອນຸປສມ຺ປນ຺ນສ຺ສ ທຸຏ຺ຐຸລ຺ລໍ ວາ ອທຸຏ຺ຐຸລ຺ລໍ ວາ ອຊ຺ຌາຈາຣໍ ອາໂຣເຈຕິ, ອາປຕ຺ຕິ ທຸກ຺ກຏສ຺ສ.

ອທຸຏ຺ຐຸລ຺ລາຍ ອາປຕ຺ຕິຍາ ທຸຏ຺ຐຸລ຺ລາປຕ຺ຕິສຎ຺ຎີ, ອາປຕ຺ຕິ ທຸກ຺ກຏສ຺ສ.

ອທຸຏ຺ຐຸລ຺ລາຍ ອາປຕ຺ຕິຍາ ເວມຕິໂກ, ອາປຕ຺ຕິ ທຸກ຺ກຏສ຺ສ.

ອທຸຏ຺ຐຸລ຺ລາຍ ອາປຕ຺ຕິຍາ ອທຸຏ຺ຐຸລ຺ລາປຕ຺ຕິສຎ຺ຎີ, ອາປຕ຺ຕິ ທຸກ຺ກຏສ຺ສ.

໘໓. ອນາປຕ຺ຕິ ວຕ຺ຖຸໍ ອາໂຣເຈຕິ ໂນ ອາປຕ຺ຕິໍ, ອາປຕ຺ຕິໍ ອາໂຣເຈຕິ ໂນ ວຕ຺ຖຸໍ, ຠິກ຺ຂຸສມ຺ມຸຕິຍາ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸຏ຺ຐຸລ຺ລາໂຣຈນສິກ຺ຂາປທໍ ນິຏ຺ຐິຕໍ ນວມໍ.