໑໐. ປຖວີຂຓນສິກ຺ຂາປທໍ

໘໔. ເຕນ ສມເຍນ ພຸທ຺ໂຘ ຠຄວາ ອາຬວິຍໍ ວິຫຣຕິ ອຄ຺ຄາຬເວ ເຈຕິເຍ. ເຕນ ໂຂ ປນ ສມເຍນ ອາຬວກາ [ອາຬວິກາ (ສ຺ຍາ.)] ຠິກ຺ຂູ ນວກມ຺ມໍ ກໂຣນ຺ຕາ ປຖວິໍ ຂຓນ຺ຕິປິ ຂຓາເປນ຺ຕິປິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ປຖວິໍ ຂຓິສ຺ສນ຺ຕິປິ ຂຓາເປສ຺ສນ຺ຕິປິ! ເອກິນ຺ທ຺ຣິຍໍ ສມຓາ ສກ຺ຍປຸຕ຺ຕິຍາ ຊີວໍ ວິເຫເຐນ຺ຕີ’’ຕິ! ອສ຺ໂສສຸໍ ໂຂ ຠິກ຺ຂູ ເຕສໍ ມນຸສ຺ສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຬວກາ ຠິກ຺ຂູ ປຖວິໍ ຂຓິສ຺ສນ຺ຕິປິ ຂຓາເປສ຺ສນ຺ຕິປີ’’ຕິ…ເປ… ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ປຖວິໍ ຂຓຖປິ ຂຓາເປຖປີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ຕຸມ຺ເຫ, ໂມຆປຸຣິສາ, ປຖວິໍ ຂຓິສ຺ສຖປິ ຂຓາເປສ຺ສຖປິ! ຊີວສຎ຺ຎິໂນ ຫິ, ໂມຆປຸຣິສາ, ມນຸສ຺ສາ ປຖວິຍາ. ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໘໕. ‘‘ໂຍ ປນ ຠິກ຺ຂຸ ປຖວິໍ ຂເຓຍ຺ຍ ວາ ຂຓາເປຍ຺ຍ ວາ, ປາຈິຕ຺ຕິຍ’’ນ຺ຕິ.

໘໖. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ປຖວີ ນາມ ທ຺ເວ ປຖວິໂຍ – ຊາຕາ ຈ ປຖວີ ອຊາຕາ ຈ ປຖວີ.

ຊາຕາ ນາມ ປຖວີ – ສຸທ຺ຘປໍສຸ ສຸທ຺ຘມຕ຺ຕິກາ ອປ຺ປປາສາຓາ ອປ຺ປສກ຺ຂຣາ ອປ຺ປກຐລາ ອປ຺ປມຣຸມ຺ພາ ອປ຺ປວາລິກາ, ເຍຠຸຍ຺ເຍນປໍສຸກາ, ເຍຠຸຍ຺ເຍນມຕ຺ຕິກາ. ອທຑ຺ຒາປິ ວຸຈ຺ຈຕິ ຊາຕາ ປຖວີ. ໂຍປິ ປໍສຸປຸຎ຺ໂຊ ວາ ມຕ຺ຕິກາປຸຎ຺ໂຊ ວາ ອຕິເຣກຈາຕຸມາສໍ ໂອວຏ຺ໂຐ, ອຍມ຺ປິ ວຸຈ຺ຈຕິ ຊາຕາ ປຖວີ.

ອຊາຕາ ນາມ ປຖວີ – ສຸທ຺ຘປາສາຓາ ສຸທ຺ຘສກ຺ຂຣາ ສຸທ຺ຘກຐລາ ສຸທ຺ຘມຣຸມ຺ພາ ສຸທ຺ຘວາລິກາ ອປ຺ປປໍສຸກາ ອປ຺ປມຕ຺ຕິກາ, ເຍຠຸຍ຺ເຍນປາສາຓາ, ເຍຠຸຍ຺ເຍນສກ຺ຂຣາ, ເຍຠຸຍ຺ເຍນກຐລາ, ເຍຠຸຍ຺ເຍນມຣຸມ຺ພາ, ເຍຠຸຍ຺ເຍນວາລິກາ. ທຑ຺ຒາປິ ວຸຈ຺ຈຕິ ອຊາຕາ ປຖວີ. ໂຍປິ ປໍສຸປຸຎ຺ໂຊ ວາ ມຕ຺ຕິກາປຸຎ຺ໂຊ ວາ ໂອມກຈາຕຸມາສໍ ໂອວຏ຺ໂຐ, ອຍມ຺ປິ ວຸຈ຺ຈຕິ ອຊາຕາ ປຖວີ.

ຂເຓຍ຺ຍາຕິ ສຍໍ ຂຓຕິ, ອາປຕ຺ຕິ ປາຈິຕ຺ຕິຍສ຺ສ.

ຂຓາເປຍ຺ຍາຕິ ອຎ຺ຎໍ ອາຓາເປຕິ, ອາປຕ຺ຕິ ປາຈິຕ຺ຕິຍສ຺ສ. ສກິໍ ອາຓຕ຺ໂຕ ພຫຸກມ຺ປິ ຂຓຕິ, ອາປຕ຺ຕິ ປາຈິຕ຺ຕິຍສ຺ສ.

໘໗. ປຖວິຍາ ປຖວິສຎ຺ຎີ ຂຓຕິ ວາ ຂຓາເປຕິ ວາ, ຠິນ຺ທຕິ ວາ ເຠທາເປຕິ ວາ, ທຫຕິ ວາ ທຫາເປຕິ ວາ, ອາປຕ຺ຕິ ປາຈິຕ຺ຕິຍສ຺ສ.

ປຖວິຍາ ເວມຕິໂກ ຂຓຕິ ວາ ຂຓາເປຕິ ວາ, ຠິນ຺ທຕິ ວາ ເຠທາເປຕິ ວາ, ທຫຕິ ວາ ທຫາເປຕິ ວາ, ອາປຕ຺ຕິ ທຸກ຺ກຏສ຺ສ.

ປຖວິຍາ ອປຖວິສຎ຺ຎີ ຂຓຕິ ວາ ຂຓາເປຕິ ວາ, ຠິນ຺ທຕິ ວາ ເຠທາເປຕິ ວາ, ທຫຕິ ວາ ທຫາເປຕິ ວາ, ອນາປຕ຺ຕິ.

ອປຖວິຍາ ປຖວິສຎ຺ຎີ, ອາປຕ຺ຕິ ທຸກ຺ກຏສ຺ສ. ອປຖວິຍາ ເວມຕິໂກ, ອາປຕ຺ຕິ ທຸກ຺ກຏສ຺ສ. ອປຖວິຍາ ອປຖວິສຎ຺ຎີ, ອນາປຕ຺ຕິ.

໘໘. ອນາປຕ຺ຕິ – ‘‘ອິມໍ ຊານ, ອິມໍ ເທຫິ, ອິມໍ ອາຫຣ, ອິມິນາ ອຕ຺ໂຖ, ອິມໍ ກປ຺ປິຍໍ ກໂຣຫີ’’ຕິ ຠຓຕິ, ອສຎ຺ຈິຈ຺ຈ, ອສຕິຍາ, ອຊານນ຺ຕສ຺ສ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ປຖວີຂຓນສິກ຺ຂາປທໍ ນິຏ຺ຐິຕໍ ທສມໍ.

ມຸສາວາທວຄ຺ໂຄ ປຐໂມ.

ຕສ຺ສຸທ຺ທານໍ –

ມຸສາ ໂອມສເປສຸຎ຺ຎໍ, ປທເສຍ຺ຍາຍ ເວ ທຸເວ;

ອຎ຺ຎຕ຺ຣ ວິຎ຺ຎຸນາ ຠູຕາ, ທຸຏ຺ຐຸລ຺ລາປຕ຺ຕິ ຂຓນາຕິ.