໒໖໖. ປຏິສາຣຓີຍກມ຺ມປຏິປ຺ປສ຺ສທ຺ຘິກຖາ

໔໔໗. ອິຘ ປນ, ຠິກ຺ຂເວ, ຠິກ຺ຂຸ ສງ຺ເຆນ ປຏິສາຣຓີຍກມ຺ມກໂຕ ສມ຺ມາ ວຕ຺ຕຕິ, ໂລມໍ ປາເຕຕິ, ເນຕ຺ຖາຣໍ ວຕ຺ຕຕິ, ປຏິສາຣຓີຍສ຺ສ ກມ຺ມສ຺ສ ປຏິປ຺ປສ຺ສທ຺ຘິໍ ຍາຈຕິ. ຕຕ຺ຣ ເຈ ຠິກ຺ຂູນໍ ເອວໍ ໂຫຕິ – ‘‘ອຍໍ ໂຂ, ອາວຸໂສ, ຠິກ຺ຂຸ ສງ຺ເຆນ ປຏິສາຣຓີຍກມ຺ມກໂຕ ສມ຺ມາ ວຕ຺ຕຕິ, ໂລມໍ ປາເຕຕິ, ເນຕ຺ຖາຣໍ ວຕ຺ຕຕິ, ປຏິສາຣຓີຍສ຺ສ ກມ຺ມສ຺ສ ປຏິປ຺ປສ຺ສທ຺ຘິໍ ຍາຈຕິ. ຫນ຺ທສ຺ສ ມຍໍ ປຏິສາຣຓີຍກມ຺ມໍ ປຏິປ຺ປສ຺ສມ຺ເຠມາ’’ຕິ. ເຕ ຕສ຺ສ ປຏິສາຣຓີຍກມ຺ມໍ ປຏິປ຺ປສ຺ສມ຺ເຠນ຺ຕິ – ອຘມ຺ເມນ ວຄ຺ຄາ…ເປ… ອຘມ຺ເມນ ສມຄ຺ຄາ… ຘມ຺ເມນ ວຄ຺ຄາ… ຘມ຺ມປຕິຣູປເກນ ວຄ຺ຄາ… ຘມ຺ມປຕິຣູປເກນ ສມຄ຺ຄາ. ຕຕ຺ຣຏ຺ໂຐ ສງ຺ໂຆ ວິວທຕິ – ‘‘ອຘມ຺ເມນ ວຄ຺ຄກມ຺ມໍ, ອຘມ຺ເມນ ສມຄ຺ຄກມ຺ມໍ, ຘມ຺ເມນ ວຄ຺ຄກມ຺ມໍ, ຘມ຺ມປຕິຣູປເກນ ວຄ຺ຄກມ຺ມໍ, ຘມ຺ມປຕິຣູປເກນ ສມຄ຺ຄກມ຺ມໍ, ອກຕໍ ກມ຺ມໍ ທຸກ຺ກຏໍ ກມ຺ມໍ ປຸນ ກາຕພ຺ພໍ ກມ຺ມ’’ນ຺ຕິ. ຕຕ຺ຣ, ຠິກ຺ຂເວ, ເຍ ເຕ ຠິກ຺ຂູ ເອວມາຫໍສຸ – ‘‘ຘມ຺ມປຕິຣູປເກນ ສມຄ຺ຄກມ຺ມ’’ນ຺ຕິ, ເຍ ຈ ເຕ ຠິກ຺ຂູ ເອວມາຫໍສຸ – ‘‘ອກຕໍ ກມ຺ມໍ ທຸກ຺ກຏໍ ກມ຺ມໍ ປຸນ ກາຕພ຺ພໍ ກມ຺ມ’’ນ຺ຕິ. ອິເມ ຕຕ຺ຖ ຠິກ຺ຂູ ຘມ຺ມວາທິໂນ. ອິເມປິ ປຎ຺ຈ ວາຣາ ສໍຂິຕ຺ຕາ.

ປຏິສາຣຓີຍກມ຺ມປຏິປ຺ປສ຺ສທ຺ຘິກຖາ ນິຏ຺ຐິຕາ.