໒໖໗. ອທສ຺ສເນ ອຸກ຺ເຂປນີຍກມ຺ມປຏິປ຺ປສ຺ສທ຺ຘິກຖາ

໔໔໘. ອິຘ ປນ, ຠິກ຺ຂເວ, ຠິກ຺ຂຸ ສງ຺ເຆນ ອາປຕ຺ຕິຍາ ອທສ຺ສເນ ອຸກ຺ເຂປນີຍກມ຺ມກໂຕ ສມ຺ມາ ວຕ຺ຕຕິ, ໂລມໍ ປາເຕຕິ, ເນຕ຺ຖາຣໍ ວຕ຺ຕຕິ, ອາປຕ຺ຕິຍາ ອທສ຺ສເນ ອຸກ຺ເຂປນີຍສ຺ສ ກມ຺ມສ຺ສ ປຏິປ຺ປສ຺ສທ຺ຘິໍ ຍາຈຕິ. ຕຕ຺ຣ ເຈ ຠິກ຺ຂູນໍ ເອວໍ ໂຫຕິ – ‘‘ອຍໍ ໂຂ, ອາວຸໂສ, ຠິກ຺ຂຸ ສງ຺ເຆນ ອາປຕ຺ຕິຍາ ອທສ຺ສເນ ອຸກ຺ເຂປນີຍກມ຺ມກໂຕ ສມ຺ມາ ວຕ຺ຕຕິ, ໂລມໍ ປາເຕຕິ, ເນຕ຺ຖາຣໍ ວຕ຺ຕຕິ, ອາປຕ຺ຕິຍາ ອທສ຺ສເນ ອຸກ຺ເຂປນີຍສ຺ສ ກມ຺ມສ຺ສ ປຏິປ຺ປສ຺ສທ຺ຘິໍ ຍາຈຕິ. ຫນ຺ທສ຺ສ ມຍໍ ອາປຕ຺ຕິຍາ ອທສ຺ສເນ ອຸກ຺ເຂປນີຍກມ຺ມໍ ປຏິປ຺ປສ຺ສມ຺ເຠມາ’’ຕິ. ເຕ ຕສ຺ສ ອາປຕ຺ຕິຍາ ອທສ຺ສເນ ອຸກ຺ເຂປນີຍກມ຺ມໍ ປຏິປ຺ປສ຺ສມ຺ເຠນ຺ຕິ – ອຘມ຺ເມນ ວຄ຺ຄາ…ເປ… ອຘມ຺ເມນ ສມຄ຺ຄາ… ຘມ຺ເມນ ວຄ຺ຄາ… ຘມ຺ມປຕິຣູປເກນ ວຄ຺ຄາ… ຘມ຺ມປຕິຣູປເກນ ສມຄ຺ຄາ. ຕຕ຺ຣຏ຺ໂຐ ສງ຺ໂຆ ວິວທຕິ – ‘‘ອຘມ຺ເມນ ວຄ຺ຄກມ຺ມໍ, ອຘມ຺ເມນ ສມຄ຺ຄກມ຺ມໍ, ຘມ຺ເມນ ວຄ຺ຄກມ຺ມໍ, ຘມ຺ມປຕິຣູປເກນ ວຄ຺ຄກມ຺ມໍ, ຘມ຺ມປຕິຣູປເກນ ສມຄ຺ຄກມ຺ມໍ, ອກຕໍ ກມ຺ມໍ ທຸກ຺ກຏໍ ກມ຺ມໍ ປຸນ ກາຕພ຺ພໍ ກມ຺ມ’’ນ຺ຕິ. ຕຕ຺ຣ, ຠິກ຺ຂເວ, ເຍ ເຕ ຠິກ຺ຂູ ເອວມາຫໍສຸ – ‘‘ຘມ຺ມປຕິຣູປເກນ ສມຄ຺ຄກມ຺ມ’’ນ຺ຕິ, ເຍ ຈ ເຕ ຠິກ຺ຂູ ເອວມາຫໍສຸ – ‘‘ອກຕໍ ກມ຺ມໍ ທຸກ຺ກຏໍ ກມ຺ມໍ ປຸນ ກາຕພ຺ພໍ ກມ຺ມ’’ນ຺ຕິ, ອິເມ ຕຕ຺ຖ ຠິກ຺ຂູ ຘມ຺ມວາທິໂນ. ອິເມປິ ປຎ຺ຈ ວາຣາ ສໍຂິຕ຺ຕາ.

ອທສ຺ສເນ ອຸກ຺ເຂປນີຍກມ຺ມປຏິປ຺ປສ຺ສທ຺ຘິກຖາ ນິຏ຺ຐິຕາ.