໒໒໙. ວສ຺ສໍວຸຏ຺ຐານໍ ອນຸປ຺ປນ຺ນຈີວຣກຖາ

໓໗໓. ເຕນ ໂຂ ປນ ສມເຍນ ວສ຺ສໍວຸຏ຺ຐາ ຠິກ຺ຂູ ອນຸປ຺ປນ຺ເນ ຈີວເຣ ປກ຺ກມນ຺ຕິປິ, ວິພ຺ຠມນ຺ຕິປິ, ກາລມ຺ປິ ກໂຣນ຺ຕິ, ສາມເຓຣາປິ ປຏິຊານນ຺ຕິ, ສິກ຺ຂໍ ປຈ຺ຈກ຺ຂາຕກາປິ ປຏິຊານນ຺ຕິ, ອນ຺ຕິມວຕ຺ຖຸໍ ອຊ຺ຌາປນ຺ນກາປິ ປຏິຊານນ຺ຕິ, ອຸມ຺ມຕ຺ຕກາປິ ປຏິຊານນ຺ຕິ, ຂິຕ຺ຕຈິຕ຺ຕາປິ ປຏິຊານນ຺ຕິ, ເວທນາຏ຺ຏາປິ ປຏິຊານນ຺ຕິ, ອາປຕ຺ຕິຍາ ອທສ຺ສເນ ອຸກ຺ຂິຕ຺ຕກາປິ ປຏິຊານນ຺ຕິ, ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕກາປິ ປຏິຊານນ຺ຕິ, ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕກາປິ ປຏິຊານນ຺ຕິ, ປຓ຺ຑກາປິ ປຏິຊານນ຺ຕິ, ເຖຍ຺ຍສໍວາສກາປິ ປຏິຊານນ຺ຕິ, ຕິຕ຺ຖິຍປກ຺ກນ຺ຕກາປິ ປຏິຊານນ຺ຕິ, ຕິຣຈ຺ຉານຄຕາປິ ປຏິຊານນ຺ຕິ, ມາຕຸຆາຕກາປິ ປຏິຊານນ຺ຕິ, ປິຕຸຆາຕກາປິ ປຏິຊານນ຺ຕິ, ອຣຫນ຺ຕຆາຕກາປິ ປຏິຊານນ຺ຕິ, ຠິກ຺ຂຸນິທູສກາປິ ປຏິຊານນ຺ຕິ, ສງ຺ຆເຠທກາປິ ປຏິຊານນ຺ຕິ, ໂລຫິຕຸປ຺ປາທກາປິ ປຏິຊານນ຺ຕິ, ອຸຠໂຕພ຺ຍຎ຺ຊນກາປິ ປຏິຊານນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ.

໓໗໔. ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອນຸປ຺ປນ຺ເນ ຈີວເຣ ປກ຺ກມຕິ, ສນ຺ເຕ ປຕິຣູເປ ຄາຫເກ ທາຕພ຺ພໍ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອນຸປ຺ປນ຺ເນ ຈີວເຣ ວິພ຺ຠມຕິ, ກາລໍ ກໂຣຕິ, ສາມເຓໂຣ ປຏິຊານາຕິ, ສິກ຺ຂໍ ປຈ຺ຈກ຺ຂາຕໂກ ປຏິຊານາຕິ, ອນ຺ຕິມວຕ຺ຖຸໍ ອຊ຺ຌາປນ຺ນໂກ ປຏິຊານາຕິ, ສງ຺ໂຆ ສາມີ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອນຸປ຺ປນ຺ເນ ຈີວເຣ ອຸມ຺ມຕ຺ຕໂກ ປຏິຊານາຕິ, ຂິຕ຺ຕຈິຕ຺ໂຕ ປຏິຊານາຕິ, ເວທນາຏ຺ໂຏ ປຏິຊານາຕິ, ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ປຏິຊານາຕິ, ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕໂກ ປຏິຊານາຕິ, ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ ປຏິຊານາຕິ, ສນ຺ເຕ ປຕິຣູເປ ຄາຫເກ ທາຕພ຺ພໍ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອນຸປ຺ປນ຺ເນ ຈີວເຣ ປຓ຺ຑໂກ ປຏິຊານາຕິ, ເຖຍ຺ຍສໍວາສໂກ ປຏິຊານາຕິ, ຕິຕ຺ຖິຍປກ຺ກນ຺ຕໂກ ປຏິຊານາຕິ, ຕິຣຈ຺ຉານຄໂຕ ປຏິຊານາຕິ, ມາຕຸຆາຕໂກ ປຏິຊານາຕິ, ປິຕຸຆາຕໂກ ປຏິຊານາຕິ, ອຣຫນ຺ຕຆາຕໂກ ປຏິຊານາຕິ, ຠິກ຺ຂຸນິທູສໂກ ປຏິຊານາຕິ, ສງ຺ຆເຠທໂກ ປຏິຊານາຕິ, ໂລຫິຕຸປ຺ປາທໂກ ປຏິຊານາຕິ, ອຸຠໂຕພ຺ຍຎ຺ຊນໂກ ປຏິຊານາຕິ, ສງ຺ໂຆ ສາມີ.

໓໗໕. ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອຸປ຺ປນ຺ເນ ຈີວເຣ ອຠາຊິເຕ ປກ຺ກມຕິ, ສນ຺ເຕ ປຕິຣູເປ ຄາຫເກ ທາຕພ຺ພໍ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອຸປ຺ປນ຺ເນ ຈີວເຣ ອຠາຊິເຕ ວິພ຺ຠມຕິ, ກາລໍ ກໂຣຕິ, ສາມເຓໂຣ ປຏິຊານາຕິ, ສິກ຺ຂໍ ປຈ຺ຈກ຺ຂາຕໂກ ປຏິຊານາຕິ, ອນ຺ຕິມວຕ຺ຖຸໍ ອຊ຺ຌາປນ຺ນໂກ ປຏິຊານາຕິ, ສງ຺ໂຆ ສາມີ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອຸປ຺ປນ຺ເນ ຈີວເຣ ອຠາຊິເຕ ອຸມ຺ມຕ຺ຕໂກ ປຏິຊານາຕິ. ຂິຕ຺ຕຈິຕ຺ໂຕ ປຏິຊານາຕິ, ເວທນາຏ຺ໂຏ ປຏິຊານາຕິ, ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ປຏິຊານາຕິ, ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕໂກ ປຏິຊານາຕິ, ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ ປຏິຊານາຕິ, ສນ຺ເຕ ປຕິຣູເປ ຄາຫເກ ທາຕພ຺ພໍ.

ອິຘ ປນ, ຠິກ຺ຂເວ, ວສ຺ສໍວຸຏ຺ໂຐ ຠິກ຺ຂຸ ອຸປ຺ປນ຺ເນ ຈີວເຣ ອຠາຊິເຕ ປຓ຺ຑໂກ ປຏິຊານາຕິ, ເຖຍ຺ຍສໍວາສໂກ ປຏິຊານາຕິ, ຕິຕ຺ຖິຍປກ຺ກນ຺ຕໂກ ປຏິຊານາຕິ, ຕິຣຈ຺ຉານຄໂຕ ປຏິຊານາຕິ, ມາຕຸຆາຕໂກ ປຏິຊານາຕິ, ປິຕຸຆາຕໂກ ປຏິຊານາຕິ, ອຣຫນ຺ຕຆາຕໂກ ປຏິຊານາຕິ, ຠິກ຺ຂຸນິທູສໂກ ປຏິຊານາຕິ, ສງ຺ຆເຠທໂກ ປຏິຊານາຕິ, ໂລຫິຕຸປ຺ປາທໂກ ປຏິຊານາຕິ, ອຸຠໂຕພ຺ຍຎ຺ຊນໂກ ປຏິຊານາຕິ, ສງ຺ໂຆ ສາມີ.

ວສ຺ສໍ ວຸຏ຺ຐານໍ ອນຸປ຺ປນ຺ນຈີວຣກຖາ ນິຏ຺ຐິຕາ.