໒໐໘. ສິເວຍ຺ຍກທຸສ຺ສຍຸຄກຖາ

໓໓໕. ເຕນ ໂຂ ປນ ສມເຍນ ຣຎ຺ໂຎ ປຊ຺ໂຊຕສ຺ສ ສິເວຍ຺ຍກໍ ທຸສ຺ສຍຸຄໍ ອຸປ຺ປນ຺ນໍ ໂຫຕິ – ພຫູນໍ [ພຫຸນ຺ນໍ (ສີ. ສ຺ຍາ.)] ທຸສ຺ສານໍ ພຫູນໍ ທຸສ຺ສຍຸຄານໍ ພຫູນໍ ທຸສ຺ສຍຸຄສຕານໍ ພຫູນໍ ທຸສ຺ສຍຸຄສຫສ຺ສານໍ ພຫູນໍ ທຸສ຺ສຍຸຄສຕສຫສ຺ສານໍ ອຄ຺ຄຎ຺ຈ ເສຏ຺ຐຎ຺ຈ ໂມກ຺ຂຎ຺ຈ ອຸຕ຺ຕມຎ຺ຈ ປວຣຎ຺ຈ. ອຖ ໂຂ ຣາຊາ ປຊ຺ໂຊໂຕ ຕໍ ສິເວຍ຺ຍກໍ ທຸສ຺ສຍຸຄໍ ຊີວກສ຺ສ ໂກມາຣຠຈ຺ຈສ຺ສ ປາເຫສິ. ອຖ ໂຂ ຊີວກສ຺ສ ໂກມາຣຠຈ຺ຈສ຺ສ ເອຕທໂຫສິ – ‘‘ອິທໍ ໂຂ ເມ ສິເວຍ຺ຍກໍ ທຸສ຺ສຍຸຄໍ ຣຎ຺ຎາ ປຊ຺ໂຊເຕນ ປຫິຕໍ – ພຫູນໍ ທຸສ຺ສານໍ ພຫູນໍ ທຸສ຺ສຍຸຄານໍ ພຫູນໍ ທຸສ຺ສຍຸຄສຕານໍ ພຫູນໍ ທຸສ຺ສຍຸຄສຫສ຺ສານໍ ພຫູນໍ ທຸສ຺ສຍຸຄສຕສຫສ຺ສານໍ ອຄ຺ຄຎ຺ຈ ເສຏ຺ຐຎ຺ຈ ໂມກ຺ຂຎ຺ຈ ອຸຕ຺ຕມຎ຺ຈ ປວຣຎ຺ຈ. ນຍິທໍ ອຎ຺ໂຎ ໂກຈິ ປຈ຺ຈາຣຫຕິ ອຎ຺ຎຕ຺ຣ ເຕນ ຠຄວຕາ ອຣຫຕາ ສມ຺ມາສມ຺ພຸທ຺ເຘນ, ຣຎ຺ຎາ ວາ ມາຄເຘນ ເສນິເຍນ ພິມ຺ພິສາເຣນາ’’ຕິ.

ສິເວຍ຺ຍກທຸສ຺ສຍຸຄກຖາ ນິຏ຺ຐິຕາ.