໑໗໑. ຕຣຸຓປສນ຺ນມຫາມຕ຺ຕວຕ຺ຖຸ

໒໘໓. ອສ຺ໂສສຸໍ ໂຂ ມນຸສ຺ສາ ຠຄວຕາ ກິຣ ຍາຄຸ ອນຸຎ຺ຎາຕາ ມຘຸໂຄຬກຎ຺ຈາຕິ. ເຕ ກາລສ຺ເສວ, ໂຠຊ຺ຊຍາຄຸໍ ປຏິຍາເທນ຺ຕິ ມຘຸໂຄຬກຎ຺ຈ. ຠິກ຺ຂູ ກາລສ຺ເສວ ໂຠຊ຺ຊຍາຄຸຍາ ຘາຕາ ມຘຸໂຄຬເກນ ຈ ຠຕ຺ຕຄ຺ເຄ ນ ຈິຕ຺ຕຣູປໍ ປຣິຠຸຎ຺ຊນ຺ຕິ. ເຕນ ໂຂ ປນ ສມເຍນ ອຎ຺ຎຕເຣນ ຕຣຸຓປສນ຺ເນນ ມຫາມຕ຺ເຕນ ສ຺ວາຕນາຍ ພຸທ຺ຘປ຺ປມຸໂຂ ຠິກ຺ຂຸສງ຺ໂຆ ນິມນ຺ຕິໂຕ ໂຫຕິ. ອຖ ໂຂ ຕສ຺ສ ຕຣຸຓປສນ຺ນສ຺ສ ມຫາມຕ຺ຕສ຺ສ ເອຕທໂຫສິ – ‘‘ຍໍນູນາຫໍ ອຑ຺ຒເຕລສນ຺ນໍ ຠິກ຺ຂຸສຕານໍ ອຑ຺ຒເຕລສານິ ມໍສປາຕິສຕານິ ປຏິຍາເທຍ຺ຍໍ, ເອກເມກສ຺ສ ຠິກ຺ຂຸໂນ ເອກເມກໍ ມໍສປາຕິໍ ອຸປນາເມຍ຺ຍ’’ນ຺ຕິ. ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ຕສ຺ສາ ຣຕ຺ຕິຍາ ອຈ຺ຈເຍນ ປຓີຕໍ ຂາທນີຍໍ ໂຠຊນີຍໍ ປຏິຍາທາເປຕ຺ວາ ອຑ຺ຒເຕລສານິ ຈ ມໍສປາຕິສຕານິ, ຠຄວໂຕ ກາລໍ ອາໂຣຈາເປສິ – ‘‘ກາໂລ, ຠນ຺ເຕ, ນິຏ຺ຐິຕໍ ຠຕ຺ຕ’’ນ຺ຕິ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ຕສ຺ສ ຕຣຸຓປສນ຺ນສ຺ສ ມຫາມຕ຺ຕສ຺ສ ນິເວສນໍ ເຕນຸປສງ຺ກມິ, ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ, ສທ຺ຘິໍ ຠິກ຺ຂຸສງ຺ເຆນ. ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ຠຕ຺ຕຄ຺ເຄ ຠິກ຺ຂູ ປຣິວິສຕິ. ຠິກ຺ຂູ ເອວມາຫໍສຸ – ‘‘ໂຖກໍ, ອາວຸໂສ, ເທຫິ; ໂຖກໍ, ອາວຸໂສ, ເທຫີ’’ຕິ. ‘‘ມາ ໂຂ ຕຸມ຺ເຫ, ຠນ຺ເຕ, – ‘ອຍໍ ຕຣຸຓປສນ຺ໂນ ມຫາມຕ຺ໂຕ’ຕິ – ໂຖກໍ ໂຖກໍ ປຏິຄ຺ຄຓ຺ຫຖ. ພຫຸໍ ເມ ຂາທນີຍໍ ໂຠຊນີຍໍ ປຏິຍຕ຺ຕໍ, ອຑ຺ຒເຕລສານິ ຈ ມໍສປາຕິສຕານິ. ເອກເມກສ຺ສ ຠິກ຺ຂຸໂນ ເອກເມກໍ ມໍສປາຕິໍ ອຸປນາເມສ຺ສາມີຕິ. ປຏິຄ຺ຄຓ຺ຫຖ, ຠນ຺ເຕ, ຍາວທຕ຺ຖ’’ນ຺ຕິ. ‘‘ນ ໂຂ ມຍໍ, ອາວຸໂສ, ເອຕໍກາຣຓາ ໂຖກໍ ໂຖກໍ ປຏິຄ຺ຄຓ຺ຫາມ, ອປິ ຈ ມຍໍ ກາລສ຺ເສວ ໂຠຊ຺ຊຍາຄຸຍາ ຘາຕາ ມຘຸໂຄຬເກນ ຈ. ເຕນ ມຍໍ ໂຖກໍ ໂຖກໍ ປຏິຄ຺ຄຓ຺ຫາມາ’’ຕິ. ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ກຖຎ຺ຫິ ນາມ ຠທນ຺ຕາ ມຍາ ນິມນ຺ຕິຕາ ອຎ຺ຎສ຺ສ ໂຠຊ຺ຊຍາຄຸໍ ປຣິຠຸຎ຺ຊິສ຺ສນ຺ຕິ, ນ ຈາຫໍ ປຏິພໂລ ຍາວທຕ຺ຖໍ ທາຕຸ’’ນ຺ຕິ ກຸປິໂຕ ອນຕ຺ຕມໂນ ອາສາທນາເປກ຺ໂຂ ຠິກ຺ຂູນໍ ປຕ຺ເຕ ປູເຣນ຺ໂຕ ອຄມາສິ – ຠຸຎ຺ຊຖ ວາ ຫຣຖ ວາຕິ. ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ປຓີເຕນ ຂາທນີເຍນ ໂຠຊນີເຍນ ສຫຕ຺ຖາ ສນ຺ຕປ຺ເປຕ຺ວາ ສມ຺ປວາເຣຕ຺ວາ ຠຄວນ຺ຕໍ ຠຸຕ຺ຕາວິໍ ໂອນີຕປຕ຺ຕປາຓິໍ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ຕໍ ຕຣຸຓປສນ຺ນໍ ມຫາມຕ຺ຕໍ ຠຄວາ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ອຸຏ຺ຐາຍາສນາ ປກ຺ກາມິ.

ອຖ ໂຂ ຕສ຺ສ ຕຣຸຓປສນ຺ນສ຺ສ ມຫາມຕ຺ຕສ຺ສ ອຈິຣປກ຺ກນ຺ຕສ຺ສ ຠຄວໂຕ ອຫຸເທວ ກຸກ຺ກຸຈ຺ຈໍ, ອຫຸ ວິປ຺ປຏິສາໂຣ – ‘‘ອລາຠາ ວຕ ເມ, ນ ວຕ ເມ ລາຠາ; ທຸລ຺ລທ຺ຘໍ ວຕ ເມ, ນ ວຕ ເມ ສຸລທ຺ຘໍ; ໂຍຫໍ ກຸປິໂຕ ອນຕ຺ຕມໂນ ອາສາທນາເປກ຺ໂຂ ຠິກ຺ຂູນໍ ປຕ຺ເຕ ປູເຣນ຺ໂຕ ອຄມາສິໍ – ‘ຠຸຎ຺ຊຖ ວາ ຫຣຖ ວາ’ຕິ. ກິໍ ນຸ ໂຂ ມຍາ ພຫຸໍ ປສຸຕໍ ປຸຎ຺ຎໍ ວາ ອປຸຎ຺ຎໍ ວາ’’ຕິ? ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ຕຣຸຓປສນ຺ໂນ ມຫາມຕ຺ໂຕ ຠຄວນ຺ຕໍ ເອຕທໂວຈ – ‘‘ອິຘ ມຍ຺ຫໍ, ຠນ຺ເຕ, ອຈິຣປກ຺ກນ຺ຕສ຺ສ ຠຄວໂຕ ອຫຸເທວ ກຸກ຺ກຸຈ຺ຈໍ, ອຫຸ ວິປ຺ປຏິສາໂຣ ‘ອລາຠາ ວຕ ເມ, ນ ວຕ ເມ ລາຠາ; ທຸລ຺ລທ຺ຘໍ ວຕ ເມ, ນ ວຕ ເມ ສຸລທ຺ຘໍ; ໂຍຫໍ ກຸປິໂຕ ອນຕ຺ຕມໂນ ອາສາທນາເປກ຺ໂຂ ຠິກ຺ຂູນໍ ປຕ຺ເຕ ປູເຣນ຺ໂຕ ອຄມາສິໍ – ຠຸຎ຺ຊຖ ວາ ຫຣຖ ວາຕິ. ກິໍ ນຸ ໂຂ ມຍາ ພຫຸໍ ປສຸຕໍ, ປຸຎ຺ຎໍ ວາ ອປຸຎ຺ຎໍ ວາ’ຕິ. ກິໍ ນຸ ໂຂ ມຍາ, ຠນ຺ເຕ, ພຫຸໍ ປສຸຕໍ, ປຸຎ຺ຎໍ ວາ ອປຸຎ຺ຎໍ ວາ’’ຕິ? ‘‘ຍທຄ຺ເຄນ ຕຍາ, ອາວຸໂສ, ສ຺ວາຕນາຍ ພຸທ຺ຘປ຺ປມຸໂຂ ຠິກ຺ຂຸສງ຺ໂຆ ນິມນ຺ຕິໂຕ ຕທຄ຺ເຄນ ເຕ ພຫຸໍ ປຸຎ຺ຎໍ ປສຸຕໍ. ຍທຄ຺ເຄນ ເຕ ເອກເມເກນ ຠິກ຺ຂຸນາ ເອກເມກໍ ສິຕ຺ຖໍ ປຏິຄ຺ຄຫິຕໍ ຕທຄ຺ເຄນ ເຕ ພຫຸໍ ປຸຎ຺ຎໍ ປສຸຕໍ, ສຄ຺ຄາ ເຕ ອາຣທ຺ຘາ’’ຕິ. ອຖ ໂຂ ໂສ ຕຣຸຓປສນ຺ໂນ ມຫາມຕ຺ໂຕ – ‘‘ລາຠາ ກິຣ ເມ, ສຸລທ຺ຘໍ ກິຣ ເມ, ພຫຸໍ ກິຣ ມຍາ ປຸຎ຺ຎໍ ປສຸຕໍ, ສຄ຺ຄາ ກິຣ ເມ ອາຣທ຺ຘາ’’ຕິ – ຫຏ຺ໂຐ ອຸທຄ຺ໂຄ ອຸຏ຺ຐາຍາສນາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຠິກ຺ຂູ ປຏິປຸຈ຺ຉິ – ‘‘ສຈ຺ຈໍ ກິຣ, ຠິກ຺ຂເວ, ຠິກ຺ຂູ ອຎ຺ຎຕ຺ຣ ນິມນ຺ຕິຕາ ອຎ຺ຎສ຺ສ ໂຠຊ຺ຊຍາຄຸໍ ປຣິຠຸຎ຺ຊນ຺ຕີ’’ຕິ? ‘‘ສຈ຺ຈໍ, ຠຄວາ’’ຕິ. ວິຄຣຫິ ພຸທ຺ໂຘ ຠຄວາ…ເປ… ກຖຎ຺ຫິ ນາມ ເຕ, ຠິກ຺ຂເວ, ໂມຆປຸຣິສາ ອຎ຺ຎຕ຺ຣ ນິມນ຺ຕິຕາ ອຎ຺ຎສ຺ສ ໂຠຊ຺ຊຍາຄຸໍ ປຣິຠຸຎ຺ຊິສ຺ສນ຺ຕິ. ເນຕໍ, ຠິກ຺ຂເວ, ອປ຺ປສນ຺ນານໍ ວາ ປສາທາຍ…ເປ… ວິຄຣຫິຕ຺ວາ ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ – ‘‘ນ, ຠິກ຺ຂເວ, ອຎ຺ຎຕ຺ຣ ນິມນ຺ຕິເຕນ ອຎ຺ຎສ຺ສ ໂຠຊ຺ຊຍາຄຸ ປຣິຠຸຎ຺ຊິຕພ຺ພາ. ໂຍ ປຣິຠຸຎ຺ເຊຍ຺ຍ, ຍຖາຘມ຺ໂມ ກາເຣຕພ຺ໂພ’’ຕິ.

ຕຣຸຓປສນ຺ນມຫາມຕ຺ຕວຕ຺ຖຸ ນິຏ຺ຐິຕໍ.