໑໕໖. ຄິຫິວິກຕານຸຎ຺ຎາຕາທິ

໒໕໖. ເຕນ ໂຂ ປນ ສມເຍນ ມນຸສ຺ສານໍ ມຎ຺ຈມ຺ປິ ປີຐມ຺ປິ ຈມ຺ໂມນທ຺ຘານິ ໂຫນ຺ຕິ, ຈມ຺ມວິນທ຺ຘານິ. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຠິນິສີທນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຄິຫິວິກຕໍ ອຠິນິສີທິຕຸໍ, ນ ຕ຺ເວວ ອຠິນິປຊ຺ຊິຕຸນ຺ຕິ.

ເຕນ ໂຂ ປນ ສມເຍນ ວິຫາຣາ ຈມ຺ມວທ຺ເຘຫິ ໂອຄຸມ຺ຜິຍນ຺ຕິ [ໂອຄຸມ຺ຠິຍນ຺ຕິ (ກ.)]. ຠິກ຺ຂູ ກຸກ຺ກຸຈ຺ຈາຍນ຺ຕາ ນາຠິນິສີທນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ພນ຺ຘນມຕ຺ຕໍ ອຠິນິສີທິຕຸນ຺ຕິ.

ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສອຸປາຫນາ ຄາມໍ ປວິສນ຺ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ເສຍ຺ຍຖາປິ ຄິຫີ ກາມໂຠຄິໂນ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ສອຸປາຫເນນ ຄາໂມ ປວິສິຕພ຺ໂພ. ໂຍ ປວິເສຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ຄິລາໂນ ໂຫຕິ, ນ ສກ຺ໂກຕິ ວິນາ ອຸປາຫເນນ ຄາມໍ ປວິສິຕຸໍ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຄິລາເນນ ຠິກ຺ຂຸນາ ສອຸປາຫເນນ ຄາມໍ ປວິສິຕຸນ຺ຕິ.

ຄິຫິວິກຕານຸຎ຺ຎາຕາທິ ນິຏ຺ຐິຕາ.