໑໕໔. ອຸຈ຺ຈາສຍນມຫາສຍນປຏິກ຺ເຂໂປ

໒໕໔. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ອຸຈ຺ຈາສຍນມຫາສຍນານິ ຘາເຣນ຺ຕິ, ເສຍ຺ຍຖິທໍ – ອາສນ຺ທິໍ, ປລ຺ລງ຺ກໍ, ໂຄນກໍ, ຈິຕ຺ຕກໍ, ປຏິກໍ, ປຏລິກໍ, ຕູລິກໍ, ວິກຕິກໍ, ອຸທ຺ຘໂລມິໍ [ອຸນ຺ທໂລມິໍ (ກ.), ອຸທ຺ທໂລມິໍ (ກ.)], ເອກນ຺ຕໂລມິໍ, ກຏ຺ຏິສ຺ສໍ, ໂກເສຍ຺ຍໍ, ກຸຕ຺ຕກໍ, ຫຕ຺ຖຕ຺ຖຣໍ, ອສ຺ສຕ຺ຖຣໍ, ຣຖຕ຺ຖຣໍ, ອຊິນປເວຓິໍ, ກທລິມິຄປວຣປຈ຺ຈຕ຺ຖຣຓໍ, ສອຸຕ຺ຕຣຈ຺ຉທໍ, ອຸຠໂຕໂລຫິຕກູປຘານນ຺ຕິ. ມນຸສ຺ສາ ວິຫາຣຈາຣິກໍ ອາຫິຓ຺ຑນ຺ຕາ ປສ຺ສິຕ຺ວາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ເສຍ຺ຍຖາປິ ຄິຫີ ກາມໂຠຄິໂນ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ນ, ຠິກ຺ຂເວ, ອຸຈ຺ຈາສຍນມຫາສຍນານິ ຘາເຣຕພ຺ພານິ, ເສຍ຺ຍຖິທໍ – ອາສນ຺ທິ, ປລ຺ລງ຺ໂກ, ໂຄນໂກ, ຈິຕ຺ຕໂກ, ປຏິກາ, ປຏລິກາ, ຕູລິກາ, ວິກຕິກາ, ອຸທ຺ຘໂລມິ, ເອກນ຺ຕໂລມິ, ກຏ຺ຏິສ຺ສໍ, ໂກເສຍ຺ຍໍ, ກຸຕ຺ຕກໍ, ຫຕ຺ຖຕ຺ຖຣໍ, ອສ຺ສຕ຺ຖຣໍ, ຣຖຕ຺ຖຣໍ, ອຊິນປເວຓິ, ກທລິມິຄປວຣປຈ຺ຈຕ຺ຖຣຓໍ, ສອຸຕ຺ຕຣຈ຺ຉທໍ, ອຸຠໂຕໂລຫິຕກູປຘານໍ. ໂຍ ຘາເຣຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ອຸຈ຺ຈາສຍນມຫາສຍນປຏິກ຺ເຂໂປ ນິຏ຺ຐິໂຕ.