໑໑໒. ປຫິເຕເຍວ ອນຸຊານນາ

໑໙໙. ອິຘ ປນ, ຠິກ຺ຂເວ, ຠິກ຺ຂຸສ຺ສ ຠາຕາ ຄິລາໂນ ໂຫຕິ. ໂສ ເຈ ຠາຕຸໂນ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລາໂນ, ອາຄຈ຺ຉຕຸ ເມ ຠາຕາ, ອິຈ຺ຉາມິ ຠາຕຸໂນ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ປຫິເຕ, ນ ຕ຺ເວວ ອປ຺ປຫິເຕ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ຠຄິນີ ຄິລານາ ໂຫຕິ. ສາ ເຈ ຠາຕຸໂນ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລານາ, ອາຄຈ຺ຉຕຸ ເມ ຠາຕາ, ອິຈ຺ຉາມິ ຠາຕຸໂນ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ປຫິເຕ, ນ ຕ຺ເວວ ອປ຺ປຫິເຕ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ຎາຕໂກ ຄິລາໂນ ໂຫຕິ. ໂສ ເຈ ຠິກ຺ຂຸສ຺ສ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລາໂນ, ອາຄຈ຺ຉຕຸ ຠທນ຺ໂຕ, ອິຈ຺ຉາມິ ຠທນ຺ຕສ຺ສ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ປຫິເຕ, ນ ຕ຺ເວວ ອປ຺ປຫິເຕ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸຄຕິໂກ ຄິລາໂນ ໂຫຕິ. ໂສ ເຈ ຠິກ຺ຂູນໍ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລາໂນ, ອາຄຈ຺ຉນ຺ຕຸ ຠທນ຺ຕາ, ອິຈ຺ຉາມິ ຠທນ຺ຕານໍ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ປຫິເຕ, ນ ຕ຺ເວວ ອປ຺ປຫິເຕ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ເຕນ ໂຂ ປນ ສມເຍນ ສງ຺ຆສ຺ສ ວິຫາໂຣ ອຸນ຺ທ຺ຣິຍຕິ. ອຎ຺ຎຕເຣນ ອຸປາສເກນ ອຣຎ຺ເຎ ຠຓ຺ຑໍ ເຉທາປິຕໍ ໂຫຕິ. ໂສ ຠິກ຺ຂູນໍ ສນ຺ຕິເກ ທູຕໍ ປາເຫສິ – ‘‘ສເຈ ຠທນ຺ຕາ ຕໍ ຠຓ຺ຑໍ ອາວຫາເປຍ຺ຍຸໍ, ທຊ຺ຊາຫໍ ຕໍ ຠຓ຺ຑ’’ນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ສງ຺ຆກຣຓີເຍນ ຄນ຺ຕຸໍ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພຕິ.

ປຫິເຕເຍວ ອນຸຊານນາ ນິຏ຺ຐິຕາ.

ວສ຺ສາວາສຠາຓວາໂຣ ນິຏ຺ຐິໂຕ.