໑໑໓. ອນ຺ຕຣາເຍ ອນາປຕ຺ຕິວສ຺ສຈ຺ເຉທວາໂຣ

໒໐໐. ເຕນ ໂຂ ປນ ສມເຍນ ໂກສເລສຸ ຊນປເທ ອຎ຺ຎຕຣສ຺ມິໍ ອາວາເສ ວສ຺ສູປຄຕາ ຠິກ຺ຂູ ວາເຬຫິ ອຸພ຺ພາຬ຺ຫາ ໂຫນ຺ຕິ. ຄຓ຺ຫິໍສຸປິ ປຣິປາຕິໍສຸປິ. ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ວາເຬຫິ ອຸພ຺ພາຬ຺ຫາ ໂຫນ຺ຕິ. ຄຓ຺ຫນ຺ຕິປິ ປຣິປາເຕນ຺ຕິປິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ສຣີສເປຫິ ອຸພ຺ພາຬ຺ຫາ ໂຫນ຺ຕິ. ຑໍສນ຺ຕິປິ ປຣິປາເຕນ຺ຕິປິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ໂຈເຣຫິ ອຸພ຺ພາຬ຺ຫາ ໂຫນ຺ຕິ. ວິລຸມ຺ປນ຺ຕິປິ ອາໂກເຏນ຺ຕິປິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ປິສາເຈຫິ ອຸພ຺ພາຬ຺ຫາ ໂຫນ຺ຕິ. ອາວິສນ຺ຕິປິ ຫນນ຺ຕິປິ [ໂອຊມ຺ປິ ຫຣນ຺ຕິ (ສີ.), ຫຣນ຺ຕິປິ (ສ຺ຍາ.)]. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕານໍ ຠິກ຺ຂູນໍ ຄາໂມ ອຄ຺ຄິນາ ທຑ຺ໂຒ ໂຫຕິ. ຠິກ຺ຂູ ປິຓ຺ຑເກນ ກິລມນ຺ຕິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕານໍ ຠິກ຺ຂູນໍ ເສນາສນໍ ອຄ຺ຄິນາ ທຑ຺ຒໍ ໂຫຕິ. ຠິກ຺ຂູ ເສນາສເນນ ກິລມນ຺ຕິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕານໍ ຠິກ຺ຂູນໍ ຄາໂມ ອຸທເກນ ວູຬ຺ໂຫ ໂຫຕິ. ຠິກ຺ຂູ ປິຓ຺ຑເກນ ກິລມນ຺ຕິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕານໍ ຠິກ຺ຂູນໍ ເສນາສນໍ ອຸທເກນ ວູຬ຺ຫໍ ໂຫຕິ. ຠິກ຺ຂູ ເສນາສເນນ ກິລມນ຺ຕິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສາຕິ.

໒໐໑. ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ວສ຺ສູປຄຕານໍ ຠິກ຺ຂູນໍ ຄາໂມ ໂຈເຣຫິ ວຸຏ຺ຐາສິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ເຍນ ຄາໂມ ເຕນ ຄນ຺ຕຸນ຺ຕິ.

ຄາໂມ ທ຺ເວຘາ ຠິຊ຺ຊິຕ຺ຖ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ເຍນ ພຫຸຕຣາ ເຕນ ຄນ຺ຕຸນ຺ຕິ.

ພຫຸຕຣາ ອສ຺ສທ຺ຘາ ໂຫນ຺ຕິ ອປ຺ປສນ຺ນາ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ເຍນ ສທ຺ຘາ ປສນ຺ນາ ເຕນ ຄນ຺ຕຸນ຺ຕິ.

ເຕນ ໂຂ ປນ ສມເຍນ ໂກສເລສຸ ຊນປເທ ອຎ຺ຎຕຣສ຺ມິໍ ອາວາເສ ວສ຺ສູປຄຕາ ຠິກ຺ຂູ ນ ລຠິໍສຸ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ນ ລຠນ຺ຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ລຠນ຺ຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ, ນ ລຠນ຺ຕິ ສປ຺ປາຍານິ ໂຠຊນານິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ລຠນ຺ຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ, ລຠນ຺ຕິ ສປ຺ປາຍານິ ໂຠຊນານິ, ນ ລຠນ຺ຕິ ສປ຺ປາຍານິ ເຠສຊ຺ຊານິ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕາ ຠິກ຺ຂູ ລຠນ຺ຕິ ລູຂສ຺ສ ວາ ປຓີຕສ຺ສ ວາ ໂຠຊນສ຺ສ ຍາວທຕ຺ຖໍ ປາຣິປູຣິໍ, ລຠນ຺ຕິ ສປ຺ປາຍານິ ໂຠຊນານິ, ລຠນ຺ຕິ ສປ຺ປາຍານິ ເຠສຊ຺ຊານິ, ນ ລຠນ຺ຕິ ປຕິຣູປໍ ອຸປຏ຺ຐາກໍ. ເອເສວ ອນ຺ຕຣາໂຍຕິ ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕໍ ຠິກ຺ຂຸໍ ອິຕ຺ຖີ ນິມນ຺ເຕຕິ – ‘‘ເອຫິ, ຠນ຺ເຕ, ຫິຣຎ຺ຎໍ ວາ ເຕ ເທມິ, ສຸວຓ຺ຓໍ ວາ ເຕ ເທມິ, ເຂຕ຺ຕໍ ວາ ເຕ ເທມິ, ວຕ຺ຖຸໍ ວາ ເຕ ເທມິ, ຄາວຸໍ ວາ ເຕ ເທມິ, ຄາວິໍ ວາ ເຕ ເທມິ, ທາສໍ ວາ ເຕ ເທມິ, ທາສິໍ ວາ ເຕ ເທມິ, ຘີຕຣໍ ວາ ເຕ ເທມິ ຠຣິຍຕ຺ຖາຍ, ອຫໍ ວາ ເຕ ຠຣິຍາ ໂຫມິ, ອຎ຺ຎໍ ວາ ເຕ ຠຣິຍໍ ອາເນມີ’’ຕິ. ຕຕ຺ຣ ເຈ ຠິກ຺ຂຸໂນ ເອວໍ ໂຫຕິ, ‘ລຫຸປຣິວຕ຺ຕໍ ໂຂ ຈິຕ຺ຕໍ ວຸຕ຺ຕໍ ຠຄວຕາ, ສິຍາປິ ເມ ພ຺ຣຫ຺ມຈຣິຍສ຺ສ ອນ຺ຕຣາໂຍ’ຕິ, ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄຕໍ ຠິກ຺ຂຸໍ ເວສີ ນິມນ຺ເຕຕິ…ເປ… ຖຸລ຺ລກຸມາຣີ ນິມນ຺ເຕຕິ… ປຓ຺ຑໂກ ນິມນ຺ເຕຕິ… ຎາຕກາ ນິມນ຺ເຕນ຺ຕິ… ຣາຊາໂນ ນິມນ຺ເຕນ຺ຕິ… ໂຈຣາ ນິມນ຺ເຕນ຺ຕິ… ຘຸຕ຺ຕາ ນິມນ຺ເຕນ຺ຕິ – ‘‘ເອຫິ, ຠນ຺ເຕ, ຫິຣຎ຺ຎໍ ວາ ເຕ ເທມ, ສຸວຓ຺ຓໍ ວາ ເຕ ເທມ, ເຂຕ຺ຕໍ ວາ ເຕ ເທມ, ວຕ຺ຖຸໍ ວາ ເຕ ເທມ, ຄາວຸໍ ວາ ເຕ ເທມ, ຄາວິໍ ວາ ເຕ ເທມ, ທາສໍ ວາ ເຕ ເທມ, ທາສິໍ ວາ ເຕ ເທມ, ຘີຕຣໍ ວາ ເຕ ເທມ ຠຣິຍຕ຺ຖາຍ, ອຎ຺ຎໍ ວາ ເຕ ຠຣິຍໍ ອາເນມາ’’ຕິ. ຕຕ຺ຣ ເຈ ຠິກ຺ຂຸໂນ ເອວໍ ໂຫຕິ, ‘ລຫຸປຣິວຕ຺ຕໍ ໂຂ ຈິຕ຺ຕໍ ວຸຕ຺ຕໍ ຠຄວຕາ, ສິຍາປິ ເມ ພ຺ຣຫ຺ມຈຣິຍສ຺ສ ອນ຺ຕຣາໂຍ’ຕິ, ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອິຘ ປນ, ຠິກ຺ຂເວ, ວສ຺ສູປຄໂຕ ຠິກ຺ຂຸ ອສ຺ສາມິກໍ ນິຘິໍ ປສ຺ສຕິ. ຕຕ຺ຣ ເຈ ຠິກ຺ຂຸໂນ ເອວໍ ໂຫຕິ, ‘ລຫຸປຣິວຕ຺ຕໍ ໂຂ ຈິຕ຺ຕໍ ວຸຕ຺ຕໍ ຠຄວຕາ, ສິຍາປິ ເມ ພ຺ຣຫ຺ມຈຣິຍສ຺ສ ອນ຺ຕຣາໂຍ’ຕິ, ປກ຺ກມິຕພ຺ພໍ. ອນາປຕ຺ຕິ ວສ຺ສຈ຺ເຉທສ຺ສ.

ອນ຺ຕຣາເຍ ອນາປຕ຺ຕິວສ຺ສຈ຺ເຉທວາໂຣ ນິຏ຺ຐິໂຕ.