໑໑໑. ສຕ຺ຕນ຺ນໍ ອປ຺ປຫິເຕປິ ອນຸຊານນາ

໑໙໘. ເຕນ ໂຂ ປນ ສມເຍນ ອຎ຺ຎຕຣສ຺ສ ຠິກ຺ຂຸໂນ ມາຕາ ຄິລານາ ໂຫຕິ. ສາ ປຸຕ຺ຕສ຺ສ ສນ຺ຕິເກ ທູຕໍ ປາເຫສິ – ‘‘ອຫຎ຺ຫິ ຄິລານາ, ອາຄຈ຺ຉຕຸ ເມ ປຸຕ຺ໂຕ, ອິຈ຺ຉາມິ ປຸຕ຺ຕສ຺ສ ອາຄຕ’’ນ຺ຕິ. ອຖ ໂຂ ຕສ຺ສ ຠິກ຺ຂຸໂນ ເອຕທໂຫສິ – ‘‘ຠຄວຕາ ປຎ຺ຎຕ຺ຕໍ ສຕ຺ຕນ຺ນໍ ສຕ຺ຕາຫກຣຓີເຍນ ປຫິເຕ ຄນ຺ຕຸໍ, ນ ຕ຺ເວວ ອປ຺ປຫິເຕ; ປຎ຺ຈນ຺ນໍ ສຕ຺ຕາຫກຣຓີເຍນ ອປ຺ປຫິເຕປິ ຄນ຺ຕຸໍ, ປເຄວ ປຫິເຕຕິ. ອຍຎ຺ຈ ເມ ມາຕາ ຄິລານາ, ສາ ຈ ອນຸປາສິກາ, ກຖໍ ນຸ ໂຂ ມຍາ ປຏິປຊ຺ຊິຕພ຺ພ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ສຕ຺ຕນ຺ນໍ ສຕ຺ຕາຫກຣຓີເຍນ ອປ຺ປຫິເຕປິ ຄນ຺ຕຸໍ, ປເຄວ ປຫິເຕ. ຠິກ຺ຂຸສ຺ສ, ຠິກ຺ຂຸນິຍາ, ສິກ຺ຂມານາຍ, ສາມເຓຣສ຺ສ, ສາມເຓຣິຍາ, ມາຕຸຍາ ຈ ປິຕຸສ຺ສ ຈ – ອນຸຊານາມິ, ຠິກ຺ຂເວ, ອິເມສໍ ສຕ຺ຕນ຺ນໍ ສຕ຺ຕາຫກຣຓີເຍນ ອປ຺ປຫິເຕປິ ຄນ຺ຕຸໍ, ປເຄວ ປຫິເຕ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ມາຕາ ຄິລານາ ໂຫຕິ. ສາ ເຈ ປຸຕ຺ຕສ຺ສ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລານາ, ອາຄຈ຺ຉຕຸ ເມ ປຸຕ຺ໂຕ, ອິຈ຺ຉາມິ ປຸຕ຺ຕສ຺ສ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ອປ຺ປຫິເຕປິ, ປເຄວ ປຫິເຕ – ‘‘ຄິລານຠຕ຺ຕໍ ວາ ປຣິເຍສິສ຺ສາມິ, ຄິລານຸປຏ຺ຐາກຠຕ຺ຕໍ ວາ ປຣິເຍສິສ຺ສາມິ, ຄິລານເຠສຊ຺ຊໍ ວາ ປຣິເຍສິສ຺ສາມິ, ປຸຈ຺ຉິສ຺ສາມິ ວາ, ອຸປຏ຺ຐຫິສ຺ສາມິ ວາ’’ຕິ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ອິຘ ປນ, ຠິກ຺ຂເວ, ຠິກ຺ຂຸສ຺ສ ປິຕາ ຄິລາໂນ ໂຫຕິ. ໂສ ເຈ ປຸຕ຺ຕສ຺ສ ສນ຺ຕິເກ ທູຕໍ ປຫິເຓຍ຺ຍ – ‘‘ອຫຎ຺ຫິ ຄິລາໂນ, ອາຄຈ຺ຉຕຸ ເມ ປຸຕ຺ໂຕ, ອິຈ຺ຉາມິ ປຸຕ຺ຕສ຺ສ ອາຄຕ’’ນ຺ຕິ, ຄນ຺ຕພ຺ພໍ, ຠິກ຺ຂເວ, ສຕ຺ຕາຫກຣຓີເຍນ, ອປ຺ປຫິເຕປິ, ປເຄວ ປຫິເຕ – ‘‘ຄິລານຠຕ຺ຕໍ ວາ ປຣິເຍສິສ຺ສາມິ, ຄິລານຸປຏ຺ຐາກຠຕ຺ຕໍ ວາ ປຣິເຍສິສ຺ສາມິ, ຄິລານເຠສຊ຺ຊໍ ວາ ປຣິເຍສິສ຺ສາມິ, ປຸຈ຺ຉິສ຺ສາມິ ວາ, ອຸປຏ຺ຐຫິສ຺ສາມິ ວາ’’ຕິ. ສຕ຺ຕາຫໍ ສນ຺ນິວຕ຺ໂຕ ກາຕພ຺ໂພ.

ສຕ຺ຕນ຺ນໍ ອປ຺ປຫິເຕປິ ອນຸຊານນາ ນິຏ຺ຐິຕາ.