໙໔. ສຠາຄາປຕ຺ຕິປຏິກມ຺ມວິຘິ

໑໗໑. ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ຕທຫຸໂປສເຖ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ ໂຫຕິ. ອຖ ໂຂ ເຕສໍ ຠິກ຺ຂູນໍ ເອຕທໂຫສິ – ‘‘ຠຄວຕາ ປຎ຺ຎຕ຺ຕໍ ‘ນ ສຠາຄາ ອາປຕ຺ຕິ ເທເສຕພ຺ພາ, ນ ສຠາຄາ ອາປຕ຺ຕິ ປຏິຄ຺ຄເຫຕພ຺ພາ’ຕິ. ອຍຎ຺ຈ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ. ກຖໍ ນຸ ໂຂ ອມ຺ເຫຫິ ປຏິປຊ຺ຊິຕພ຺ພ’’ນ຺ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸໂປສເຖ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ ໂຫຕິ. ເຕຫິ, ຠິກ຺ຂເວ, ຠິກ຺ຂູຫິ ເອໂກ ຠິກ຺ຂຸ ສາມນ຺ຕາ ອາວາສາ ສຊ຺ຊຸກໍ ປາເຫຕພ຺ໂພ – ຄຈ຺ຉາວຸໂສ, ຕໍ ອາປຕ຺ຕິໍ ປຏິກຣິຕ຺ວາ ອາຄຈ຺ຉ; ມຍໍ ເຕ ສນ຺ຕິເກ ອາປຕ຺ຕິໍ ປຏິກຣິສ຺ສາມາຕິ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ. ຍທາ ອຎ຺ຎໍ ຠິກ຺ຂຸໍ ສຸທ຺ຘໍ ອນາປຕ຺ຕິກໍ ປສ຺ສິສ຺ສຕິ, ຕທາ ຕສ຺ສ ສນ຺ຕິເກ ຕໍ ອາປຕ຺ຕິໍ ປຏິກຣິສ຺ສຕີ’’ຕິ ວຕ຺ວາ ອຸໂປສໂຖ ກາຕພ຺ໂພ, ປາຕິໂມກ຺ຂໍ ອຸທ຺ທິສິຕພ຺ພໍ, ນ ຕ຺ເວວ ຕປ຺ປຈ຺ຈຍາ ອຸໂປສຖສ຺ສ ອນ຺ຕຣາໂຍ ກາຕພ຺ໂພ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ຕທຫຸໂປສເຖ ສພ຺ໂພ ສງ຺ໂຆ ສຠາຄາຍ ອາປຕ຺ຕິຍາ ເວມຕິໂກ ໂຫຕິ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ສພ຺ໂພ ສງ຺ໂຆ ສຠາຄາຍ ອາປຕ຺ຕິຍາ ເວມຕິໂກ. ຍທາ ນິພ຺ເພມຕິໂກ ຠວິສ຺ສຕິ, ຕທາ ຕໍ ອາປຕ຺ຕິໍ ປຏິກຣິສ຺ສຕີ’’ຕິ ວຕ຺ວາ ອຸໂປສໂຖ ກາຕພ຺ໂພ, ປາຕິໂມກ຺ຂໍ ອຸທ຺ທິສິຕພ຺ພໍ; ນ ຕ຺ເວວ ຕປ຺ປຈ຺ຈຍາ ອຸໂປສຖສ຺ສ ອນ຺ຕຣາໂຍ ກາຕພ຺ໂພ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ວສ຺ສູປຄໂຕ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ ໂຫຕິ. ເຕຫິ, ຠິກ຺ຂເວ, ຠິກ຺ຂູຫິ ເອໂກ ຠິກ຺ຂຸ ສາມນ຺ຕາ ອາວາສາ ສຊ຺ຊຸກໍ ປາເຫຕພ຺ໂພ – ຄຈ຺ຉາວຸໂສ, ຕໍ ອາປຕ຺ຕິໍ ປຏິກຣິຕ຺ວາ ອາຄຈ຺ຉ; ມຍໍ ເຕ ສນ຺ຕິເກ ຕໍ ອາປຕ຺ຕິໍ ປຏິກຣິສ຺ສາມາຕິ. ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ເອໂກ ຠິກ຺ຂຸ ສຕ຺ຕາຫກາລິກໍ ປາເຫຕພ຺ໂພ – ຄຈ຺ຉາວຸໂສ, ຕໍ ອາປຕ຺ຕິໍ ປຏິກຣິຕ຺ວາ ອາຄຈ຺ຉ; ມຍໍ ເຕ ສນ຺ຕິເກ ຕໍ ອາປຕ຺ຕິໍ ປຏິກຣິສ຺ສາມາຕິ.

ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ ໂຫຕິ. ໂສ ນ ຊານາຕິ ຕສ຺ສາ ອາປຕ຺ຕິຍາ ນາມໂຄຕ຺ຕໍ. ຕຕ຺ຖ ອຎ຺ໂຎ ຠິກ຺ຂຸ ອາຄຈ຺ຉຕິ ພຫຸສ຺ສຸໂຕ ອາຄຕາຄໂມ ຘມ຺ມຘໂຣ ວິນຍຘໂຣ ມາຕິກາຘໂຣ ປຓ຺ຑິໂຕ ພ຺ຍຕ຺ໂຕ ເມຘາວີ ລຊ຺ຊີ ກຸກ຺ກຸຈ຺ຈໂກ ສິກ຺ຂາກາໂມ. ຕເມນໍ ອຎ຺ຎຕໂຣ ຠິກ຺ຂຸ ເຍນ ໂສ ຠິກ຺ຂຸ ເຕນຸປສງ຺ກມິ, ອຸປສງ຺ກມິຕ຺ວາ ຕໍ ຠິກ຺ຂຸໍ ເອຕທໂວຈ – ‘‘ໂຍ ນຸ ໂຂ, ອາວຸໂສ, ເອວຎ຺ເຈວຎ຺ຈ ກໂຣຕິ, ກິໍ ນາມ ໂສ ອາປຕ຺ຕິໍ ອາປຊ຺ຊຕີ’’ຕິ? ໂສ ເອວມາຫ – ‘‘ໂຍ ໂຂ, ອາວຸໂສ, ເອວຎ຺ເຈວຎ຺ຈ ກໂຣຕິ, ອິມໍ ນາມ ໂສ ອາປຕ຺ຕິໍ ອາປຊ຺ຊຕິ. ອິມໍ ນາມ ຕ຺ວໍ, ອາວຸໂສ, ອາປຕ຺ຕິໍ ອາປນ຺ໂນ; ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວມາຫ – ‘‘ນ ໂຂ ອຫໍ, ອາວຸໂສ, ເອໂກວ ອິມໍ ອາປຕ຺ຕິໍ ອາປນ຺ໂນ; ອຍໍ ສພ຺ໂພ ສງ຺ໂຆ ອິມໍ ອາປຕ຺ຕິໍ ອາປນ຺ໂນ’’ຕິ. ໂສ ເອວມາຫ – ‘‘ກິໍ ເຕ, ອາວຸໂສ, ກຣິສ຺ສຕິ ປໂຣ ອາປນ຺ໂນ ວາ ອນາປນ຺ໂນ ວາ. ອິງ຺ຆ, ຕ຺ວໍ, ອາວຸໂສ, ສກາຍ ອາປຕ຺ຕິຍາ ວຸຏ຺ຐາຫີ’’ຕິ. ອຖ ໂຂ ໂສ ຠິກ຺ຂຸ ຕສ຺ສ ຠິກ຺ຂຸໂນ ວຈເນນ ຕໍ ອາປຕ຺ຕິໍ ປຏິກຣິຕ຺ວາ ເຍນ ເຕ ຠິກ຺ຂູ ເຕນຸປສງ຺ກມິ, ອຸປສງ຺ກມິຕ຺ວາ ເຕ ຠິກ຺ຂູ ເອຕທໂວຈ – ‘‘ໂຍ ກິຣ, ອາວຸໂສ, ເອວຎ຺ເຈວຎ຺ຈ ກໂຣຕິ, ອິມໍ ນາມ ໂສ ອາປຕ຺ຕິໍ ອາປຊ຺ຊຕິ. ອິມໍ ນາມ ຕຸມ຺ເຫ, ອາວຸໂສ, ອາປຕ຺ຕິໍ ອາປນ຺ນາ; ປຏິກໂຣຖ ຕໍ ອາປຕ຺ຕິ’’ນ຺ຕິ. ອຖ ໂຂ ເຕ ຠິກ຺ຂູ ນ ອິຈ຺ຉິໍສຸ ຕສ຺ສ ຠິກ຺ຂຸໂນ ວຈເນນ ຕໍ ອາປຕ຺ຕິໍ ປຏິກາຕຸໍ. ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ອຎ຺ຎຕຣສ຺ມິໍ ອາວາເສ ສພ຺ໂພ ສງ຺ໂຆ ສຠາຄໍ ອາປຕ຺ຕິໍ ອາປນ຺ໂນ ໂຫຕິ. ໂສ ນ ຊານາຕິ ຕສ຺ສາ ອາປຕ຺ຕິຍາ ນາມໂຄຕ຺ຕໍ. ຕຕ຺ຖ ອຎ຺ໂຎ ຠິກ຺ຂຸ ອາຄຈ຺ຉຕິ ພຫຸສ຺ສຸໂຕ ອາຄຕາຄໂມ ຘມ຺ມຘໂຣ ວິນຍຘໂຣ ມາຕິກາຘໂຣ ປຓ຺ຑິໂຕ ພ຺ຍຕ຺ໂຕ ເມຘາວີ ລຊ຺ຊີ ກຸກ຺ກຸຈ຺ຈໂກ ສິກ຺ຂາກາໂມ. ຕເມນໍ ອຎ຺ຎຕໂຣ ຠິກ຺ຂຸ ເຍນ ໂສ ຠິກ຺ຂຸ ເຕນຸປສງ຺ກມິ, ອຸປສງ຺ກມິຕ຺ວາ ຕໍ ຠິກ຺ຂຸໍ ເອວໍ ວເທຕິ – ‘‘ໂຍ ນຸ ໂຂ, ອາວຸໂສ, ເອວຎ຺ເຈວຎ຺ຈ ກໂຣຕິ, ກິໍ ນາມ ໂສ ອາປຕ຺ຕິໍ ອາປຊ຺ຊຕີ’’ຕິ? ໂສ ເອວໍ ວເທຕິ – ‘‘ໂຍ ໂຂ, ອາວຸໂສ, ເອວຎ຺ເຈວຎ຺ຈ ກໂຣຕິ, ອິມໍ ນາມ ໂສ ອາປຕ຺ຕິໍ ອາປຊ຺ຊຕິ. ອິມໍ ນາມ ຕ຺ວໍ, ອາວຸໂສ, ອາປຕ຺ຕິໍ ອາປນ຺ໂນ; ປຏິກໂຣຫິ ຕໍ ອາປຕ຺ຕິ’’ນ຺ຕິ. ໂສ ເອວໍ ວເທຕິ – ‘‘ນ ໂຂ ອຫໍ, ອາວຸໂສ, ເອໂກວ ອິມໍ ອາປຕ຺ຕິໍ ອາປນ຺ໂນ. ອຍໍ ສພ຺ໂພ ສງ຺ໂຆ ອິມໍ ອາປຕ຺ຕິໍ ອາປນ຺ໂນ’’ຕິ. ໂສ ເອວໍ ວເທຕິ – ‘‘ກິໍ ເຕ, ອາວຸໂສ, ກຣິສ຺ສຕິ ປໂຣ ອາປນ຺ໂນ ວາ ອນາປນ຺ໂນ ວາ. ອິງ຺ຆ, ຕ຺ວໍ, ອາວຸໂສ, ສກາຍ ອາປຕ຺ຕິຍາ ວຸຏ຺ຐາຫີ’’ຕິ. ໂສ ເຈ, ຠິກ຺ຂເວ, ຠິກ຺ຂຸ ຕສ຺ສ ຠິກ຺ຂຸໂນ ວຈເນນ ຕໍ ອາປຕ຺ຕິໍ ປຏິກຣິຕ຺ວາ ເຍນ ເຕ ຠິກ຺ຂູ ເຕນຸປສງ຺ກມິ, ອຸປສງ຺ກມິຕ຺ວາ ເຕ ຠິກ຺ຂູ ເອວໍ ວເທຕິ – ‘‘ໂຍ ກິຣ, ອາວຸໂສ, ເອວຎ຺ເຈວຎ຺ຈ ກໂຣຕິ ອິມໍ ນາມ ໂສ ອາປຕ຺ຕິໍ ອາປຊ຺ຊຕິ, ອິມໍ ນາມ ຕຸມ຺ເຫ ອາວຸໂສ ອາປຕ຺ຕິໍ ອາປນ຺ນາ, ປຏິກໂຣຖ ຕໍ ອາປຕ຺ຕິ’’ນ຺ຕິ. ເຕ ເຈ, ຠິກ຺ຂເວ, ຠິກ຺ຂູ ຕສ຺ສ ຠິກ຺ຂຸໂນ ວຈເນນ ຕໍ ອາປຕ຺ຕິໍ ປຏິກເຣຍ຺ຍຸໍ, ອິຈ຺ເຈຕໍ ກຸສລໍ. ໂນ ເຈ ປຏິກເຣຍ຺ຍຸໍ, ນ ເຕ, ຠິກ຺ຂເວ, ຠິກ຺ຂູ ເຕນ ຠິກ຺ຂຸນາ ອກາມາ ວຈນີຍາຕິ.

ໂຈທນາວຕ຺ຖຸຠາຓວາໂຣ ນິຏ຺ຐິໂຕ ທຸຕິໂຍ.