໙໐. ອຸມ຺ມຕ຺ຕກສມ຺ມຸຕິ

໑໖໗. ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ສນ຺ນິປຕຖ, ຠິກ຺ຂເວ, ອຕ຺ຖິ ສງ຺ຆສ຺ສ ກຣຓີຍ’’ນ຺ຕິ. ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ອຕ຺ຖິ, ຠນ຺ເຕ, ຄຄ຺ໂຄ ນາມ ຠິກ຺ຂຸ ອຸມ຺ມຕ຺ຕໂກ, ໂສ ອນາຄໂຕ’’ຕິ.

‘‘ທ຺ເວເມ, ຠິກ຺ຂເວ, ອຸມ຺ມຕ຺ຕກາ – ອຕ຺ຖິ, ຠິກ຺ຂເວ, ຠິກ຺ຂຸ ອຸມ຺ມຕ຺ຕໂກ ສຣຕິປິ ອຸໂປສຖໍ ນປິ ສຣຕິ, ສຣຕິປິ ສງ຺ຆກມ຺ມໍ ນປິ ສຣຕິ, ອຕ຺ຖິ ເນວ ສຣຕິ; ອາຄຈ຺ຉຕິປິ ອຸໂປສຖໍ ນປິ ອາຄຈ຺ຉຕິ, ອາຄຈ຺ຉຕິປິ ສງ຺ຆກມ຺ມໍ ນປິ ອາຄຈ຺ຉຕິ, ອຕ຺ຖິ ເນວ ອາຄຈ຺ຉຕິ. ຕຕ຺ຣ, ຠິກ຺ຂເວ, ຍ຺ວາຍໍ ອຸມ຺ມຕ຺ຕໂກ ສຣຕິປິ ອຸໂປສຖໍ ນປິ ສຣຕິ, ສຣຕິປິ ສງ຺ຆກມ຺ມໍ ນປິ ສຣຕິ, ອາຄຈ຺ຉຕິປິ ອຸໂປສຖໍ ນປິ ອາຄຈ຺ຉຕິ, ອາຄຈ຺ຉຕິປິ ສງ຺ຆກມ຺ມໍ ນປິ ອາຄຈ຺ຉຕິ, ອນຸຊານາມິ, ຠິກ຺ຂເວ, ເອວຣູປສ຺ສ ອຸມ຺ມຕ຺ຕກສ຺ສ ອຸມ຺ມຕ຺ຕກສມ຺ມຸຕ຺ຕິໍ ທາຕຸໍ. ເອວຎ຺ຈ ປນ, ຠິກ຺ຂເວ, ທາຕພ຺ພາ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ຄຄ຺ໂຄ ຠິກ຺ຂຸ ອຸມ຺ມຕ຺ຕໂກ – ສຣຕິປິ ອຸໂປສຖໍ ນປິ ສຣຕິ, ສຣຕິປິ ສງ຺ຆກມ຺ມໍ ນປິ ສຣຕິ, ອາຄຈ຺ຉຕິປິ ອຸໂປສຖໍ ນປິ ອາຄຈ຺ຉຕິ, ອາຄຈ຺ຉຕິປິ ສງ຺ຆກມ຺ມໍ ນປິ ອາຄຈ຺ຉຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ຄຄ຺ຄສ຺ສ ຠິກ຺ຂຸໂນ ອຸມ຺ມຕ຺ຕກສ຺ສ ອຸມ຺ມຕ຺ຕກສມ຺ມຸຕິໍ ທເທຍ຺ຍ. ສເຣຍ຺ຍ ວາ ຄຄ຺ໂຄ ຠິກ຺ຂຸ ອຸໂປສຖໍ ນ ວາ ສເຣຍ຺ຍ, ສເຣຍ຺ຍ ວາ ສງ຺ຆກມ຺ມໍ ນ ວາ ສເຣຍ຺ຍ, ອາຄຈ຺ເຉຍ຺ຍ ວາ ອຸໂປສຖໍ ນ ວາ ອາຄຈ຺ເຉຍ຺ຍ, ອາຄຈ຺ເຉຍ຺ຍ ວາ ສງ຺ຆກມ຺ມໍ ນ ວາ ອາຄຈ຺ເຉຍ຺ຍ, ສງ຺ໂຆ ສຫ ວາ ຄຄ຺ເຄນ ວິນາ ວາ ຄຄ຺ເຄນ ອຸໂປສຖໍ ກເຣຍ຺ຍ, ສງ຺ຆກມ຺ມໍ ກເຣຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ຄຄ຺ໂຄ ຠິກ຺ຂຸ ອຸມ຺ມຕ຺ຕໂກ – ສຣຕິປິ ອຸໂປສຖໍ ນປິ ສຣຕິ, ສຣຕິປິ ສງ຺ຆກມ຺ມໍ ນປິ ສຣຕິ, ອາຄຈ຺ຉຕິປິ ອຸໂປສຖໍ ນປິ ອາຄຈ຺ຉຕິ, ອາຄຈ຺ຉຕິປິ ສງ຺ຆກມ຺ມໍ ນປິ ອາຄຈ຺ຉຕິ. ສງ຺ໂຆ ຄຄ຺ຄສ຺ສ ຠິກ຺ຂຸໂນ ອຸມ຺ມຕ຺ຕກສ຺ສ ອຸມ຺ມຕ຺ຕກສມ຺ມຸຕິໍ ເທຕິ. ສເຣຍ຺ຍ ວາ ຄຄ຺ໂຄ ຠິກ຺ຂຸ ອຸໂປສຖໍ ນ ວາ ສເຣຍ຺ຍ, ສເຣຍ຺ຍ ວາ ສງ຺ຆກມ຺ມໍ ນ ວາ ສເຣຍ຺ຍໍ, ອາຄຈ຺ເຉຍ຺ຍ ວາ ອຸໂປສຖໍ ນ ວາ ອາຄຈ຺ເຉຍ຺ຍ, ອາຄຈ຺ເຉຍ຺ຍ ວາ ສງ຺ຆກມ຺ມໍ ນ ວາ ອາຄຈ຺ເຉຍ຺ຍ, ສງ຺ໂຆ ສຫ ວາ ຄຄ຺ເຄນ, ວິນາ ວາ ຄຄ຺ເຄນ ອຸໂປສຖໍ ກຣິສ຺ສຕິ, ສງ຺ຆກມ຺ມໍ ກຣິສ຺ສຕິ. ຍສ຺ສາຍສ຺ມໂຕ ຂມຕິ ຄຄ຺ຄສ຺ສ ຠິກ຺ຂຸໂນ ອຸມ຺ມຕ຺ຕກສ຺ສ ອຸມ຺ມຕ຺ຕກສມ຺ມຸຕິຍາ ທານໍ – ສເຣຍ຺ຍ ວາ ຄຄ຺ໂຄ ຠິກ຺ຂຸ ອຸໂປສຖໍ ນ ວາ ສເຣຍ຺ຍ, ສເຣຍ຺ຍ ວາ ສງ຺ຆກມ຺ມໍ ນ ວາ ສເຣຍ຺ຍ, ອາຄຈ຺ເຉຍ຺ຍ ວາ ອຸໂປສຖໍ ນ ວາ ອາຄຈ຺ເຉຍ຺ຍ, ອາຄຈ຺ເຉຍ຺ຍ ວາ ສງ຺ຆກມ຺ມໍ ນ ວາ ອາຄຈ຺ເຉຍ຺ຍ, ສງ຺ໂຆ ສຫ ວາ ຄຄ຺ເຄນ, ວິນາ ວາ ຄຄ຺ເຄນ ອຸໂປສຖໍ ກຣິສ຺ສຕິ, ສງ຺ຆກມ຺ມໍ ກຣິສ຺ສຕິ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ.

‘‘ທິນ຺ນາ ສງ຺ເຆນ ຄຄ຺ຄສ຺ສ ຠິກ຺ຂຸໂນ ອຸມ຺ມຕ຺ຕກສ຺ສ ອຸມ຺ມຕ຺ຕກສມ຺ມຸຕິ. ສເຣຍ຺ຍ ວາ ຄຄ຺ໂຄ ຠິກ຺ຂຸ ອຸໂປສຖໍ ນ ວາ ສເຣຍ຺ຍ, ສເຣຍ຺ຍ ວາ ສງ຺ຆກມ຺ມໍ ນ ວາ ສເຣຍ຺ຍ, ອາຄຈ຺ເຉຍ຺ຍ ວາ ອຸໂປສຖໍ ນ ວາ ອາຄຈ຺ເຉຍ຺ຍ, ອາຄຈ຺ເຉຍ຺ຍ ວາ ສງ຺ຆກມ຺ມໍ ນ ວາ ອາຄຈ຺ເຉຍ຺ຍ, ສງ຺ໂຆ ສຫ ວາ ຄຄ຺ເຄນ ວິນາ ວາ ຄຄ຺ເຄນ ອຸໂປສຖໍ ກຣິສ຺ສຕິ, ສງ຺ຆກມ຺ມໍ ກຣິສ຺ສຕິ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.