໘໔. ປກ຺ຂຄຓນາທິອຸຄ຺ຄຫຓານຸຊານນາ

໑໕໖. ອຖ ໂຂ ຠຄວາ ໂຈທນາວຕ຺ຖຸສ຺ມິໍ ຍຖາຠິຣນ຺ຕໍ ວິຫຣິຕ຺ວາ ປຸນເທວ ຣາຊຄຫໍ ປຈ຺ຈາຄຎ຺ຉິ.

ເຕນ ໂຂ ປນ ສມເຍນ ມນຸສ຺ສາ ຠິກ຺ຂູ ປິຓ຺ຑາຍ ຈຣນ຺ເຕ ປຸຈ຺ຉນ຺ຕິ – ‘‘ກຕິມີ, ຠນ຺ເຕ, ປກ຺ຂສ຺ສາ’’ຕິ? ຠິກ຺ຂູ ເອວມາຫໍສຸ – ‘‘ນ ໂຂ ມຍໍ, ອາວຸໂສ, ຊານາມາ’’ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ປກ຺ຂຄຓນມຕ຺ຕມມ຺ປິເມ ສມຓາ ສກ຺ຍປຸຕ຺ຕິຍາ ນ ຊານນ຺ຕິ, ກິໍ ປນິເມ ອຎ຺ຎໍ ກິຎ຺ຈິ ກລ຺ຍາຓໍ ຊານິສ຺ສນ຺ຕີ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ປກ຺ຂຄຓນໍ ອຸຄ຺ຄເຫຕຸນ຺ຕິ. ອຖ ໂຂ ຠິກ຺ຂູນໍ ເອຕທໂຫສິ – ‘‘ເກນ ນຸ ໂຂ ປກ຺ຂຄຓນາ ອຸຄ຺ຄເຫຕພ຺ພາ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ສພ຺ເພເຫວ ປກ຺ຂຄຓນໍ ອຸຄ຺ຄເຫຕຸນ຺ຕິ.

໑໕໗. ເຕນ ໂຂ ປນ ສມເຍນ ມນຸສ຺ສາ ຠິກ຺ຂູ ປິຓ຺ຑາຍ ຈຣນ຺ເຕ ປຸຈ຺ຉນ຺ຕິ – ‘‘ກີວຕິກາ, ຠນ຺ເຕ, ຠິກ຺ຂູ’’ຕິ? ຠິກ຺ຂູ ເອວມາຫໍສຸ – ‘‘ນ ໂຂ ມຍໍ, ອາວຸໂສ, ຊານາມາ’’ຕິ. ມນຸສ຺ສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ອຎ຺ຎມຎ຺ຎມ຺ປິເມ ສມຓາ ສກ຺ຍປຸຕ຺ຕິຍາ ນ ຊານນ຺ຕິ, ກິໍ ປນິເມ ອຎ຺ຎໍ ກິຎ຺ຈິ ກລ຺ຍາຓໍ ຊານິສ຺ສນ຺ຕີ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຠິກ຺ຂູ ຄເຓຕຸນ຺ຕິ.

ອຖ ໂຂ ຠິກ຺ຂູນໍ ເອຕທໂຫສິ – ‘‘ກທາ ນຸ ໂຂ ຠິກ຺ຂູ ຄເຓຕພ຺ພາ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຕທຫຸໂປສເຖ ນາມຄ຺ເຄນ [ນາມມຕ຺ເຕນ (ສ຺ຍາ.), ຄຓມຄ຺ເຄນ (ກ.)] ຄເຓຕຸໍ, ສລາກໍ ວາ ຄາເຫຕຸນ຺ຕິ.

໑໕໘. ເຕນ ໂຂ ປນ ສມເຍນ ຠິກ຺ຂູ ອຊານນ຺ຕາ ອຊ຺ຊຸໂປສໂຖຕິ ທູຣໍ ຄາມໍ ປິຓ຺ຑາຍ ຈຣນ຺ຕິ. ເຕ ອຸທ຺ທິສ຺ສມາເນປິ ປາຕິໂມກ຺ເຂ ອາຄຈ຺ຉນ຺ຕິ, ອຸທ຺ທິຏ຺ຐມຕ຺ເຕປິ ອາຄຈ຺ຉນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ອາໂຣເຈຕຸໍ ‘ອຊ຺ຊຸໂປສໂຖ’ຕິ.

ອຖ ໂຂ ຠິກ຺ຂູນໍ ເອຕທໂຫສິ – ‘‘ເກນ ນຸ ໂຂ ອາໂຣເຈຕພ຺ໂພ’’ຕິ? ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ເຖເຣນ ຠິກ຺ຂຸນາ ກາລວໂຕ ອາໂຣເຈຕຸນ຺ຕິ.

ເຕນ ໂຂ ປນ ສມເຍນ ອຎ຺ຎຕໂຣ ເຖໂຣ ກາລວໂຕ ນສ຺ສຣຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຠຕ຺ຕກາເລປິ ອາໂຣເຈຕຸນ຺ຕິ.

ຠຕ຺ຕກາເລປິ ນສ຺ສຣຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຍໍ ກາລໍ ສຣຕິ, ຕໍ ກາລໍ ອາໂຣເຈຕຸນ຺ຕິ.