໗໖. ຄາມສີມາທິ

໑໔໗. ອສມ຺ມຕາຍ, ຠິກ຺ຂເວ, ສີມາຍ ອຏ຺ຐປິຕາຍ, ຍໍ ຄາມໍ ວາ ນິຄມໍ ວາ ອຸປນິສ຺ສາຍ ວິຫຣຕິ, ຍາ ຕສ຺ສ ວາ ຄາມສ຺ສ ຄາມສີມາ, ນິຄມສ຺ສ ວາ ນິຄມສີມາ, ອຍໍ ຕຕ຺ຖ ສມານສໍວາສາ ເອກຸໂປສຖາ. ອຄາມເກ ເຈ, ຠິກ຺ຂເວ, ອຣຎ຺ເຎ ສມນ຺ຕາ ສຕ຺ຕພ຺ຠນ຺ຕຣາ, ອຍໍ ຕຕ຺ຖ ສມານສໍວາສາ ເອກຸໂປສຖາ. ສພ຺ພາ, ຠິກ຺ຂເວ, ນທີ ອສີມາ; ສພ຺ໂພ ສມຸທ຺ໂທ ອສີໂມ; ສພ຺ໂພ ຊາຕສ຺ສໂຣ ອສີໂມ. ນທິຍາ ວາ, ຠິກ຺ຂເວ, ສມຸທ຺ເທ ວາ ຊາຕສ຺ສເຣ ວາ ຍໍ ມຊ຺ຌິມສ຺ສ ປຸຣິສສ຺ສ ສມນ຺ຕາ ອຸທກຸກ຺ເຂປາ, ອຍໍ ຕຕ຺ຖ ສມານສໍວາສາ ເອກຸໂປສຖາຕິ.

໑໔໘. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສີມາຍ ສີມໍ ສມ຺ຠິນ຺ທນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ເຍສໍ, ຠິກ຺ຂເວ, ສີມາ ປຐມໍ ສມ຺ມຕາ ເຕສໍ ຕໍ ກມ຺ມໍ ຘມ຺ມິກໍ ອກຸປ຺ປໍ ຐານາຣຫໍ. ເຍສໍ, ຠິກ຺ຂເວ, ສີມາ ປຈ຺ຉາ ສມ຺ມຕາ ເຕສໍ ຕໍ ກມ຺ມໍ ອຘມ຺ມິກໍ ກຸປ຺ປໍ ອຏ຺ຐານາຣຫໍ. ນ, ຠິກ຺ຂເວ, ສີມາຍ ສີມາ ສມ຺ຠິນ຺ທິຕພ຺ພາ. ໂຍ ສມ຺ຠິນ຺ເທຍ຺ຍ, ອາປຕ຺ຕິ ທຸກ຺ກຏສ຺ສາຕິ.

ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ສີມາຍ ສີມໍ ອຊ຺ໂຌຕ຺ຖຣນ຺ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ເຍສໍ, ຠິກ຺ຂເວ, ສີມາ ປຐມໍ ສມ຺ມຕາ ເຕສໍ ຕໍ ກມ຺ມໍ ຘມ຺ມິກໍ ອກຸປ຺ປໍ ຐານາຣຫໍ. ເຍສໍ, ຠິກ຺ຂເວ, ສີມາ ປຈ຺ຉາ ສມ຺ມຕາ ເຕສໍ ຕໍ ກມ຺ມໍ ອຘມ຺ມິກໍ ກຸປ຺ປໍ ອຏ຺ຐານາຣຫໍ. ນ, ຠິກ຺ຂເວ, ສີມາຍ ສີມາ ອຊ຺ໂຌຕ຺ຖຣິຕພ຺ພາ. ໂຍ ອຊ຺ໂຌຕ຺ຖເຣຍ຺ຍ, ອາປຕ຺ຕິ ທຸກ຺ກຏສ຺ສາຕິ. ອນຸຊານາມິ, ຠິກ຺ຂເວ, ສີມໍ ສມ຺ມນ຺ນນ຺ເຕນ ສີມນ຺ຕຣິກໍ ຐເປຕ຺ວາ ສີມໍ ສມ຺ມນ຺ນິຕຸນ຺ຕິ.