໗໓. ອຸໂປສຖປ຺ປມຸຂານຸຊານນາ

໑໔໒. ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ອຕິຂຸທ຺ທກໍ ອຸໂປສຖາຄາຣໍ ສມ຺ມຕໍ ໂຫຕິ, ຕທຫຸໂປສເຖ ມຫາຠິກ຺ຂຸສງ຺ໂຆ ສນ຺ນິປຕິໂຕ ໂຫຕິ. ຠິກ຺ຂູ ອສມ຺ມຕາຍ ຠູມິຍາ ນິສິນ຺ນາ ປາຕິໂມກ຺ຂໍ ອສ຺ໂສສຸໍ. ອຖ ໂຂ ເຕສໍ ຠິກ຺ຂູນໍ ເອຕທໂຫສິ ‘‘ຠຄວຕາ ປຎ຺ຎຕ຺ຕໍ ‘ອຸໂປສຖາຄາຣໍ ສມ຺ມນ຺ນິຕ຺ວາ ອຸໂປສໂຖ ກາຕພ຺ໂພ’ຕິ, ມຍຎ຺ຈມ຺ຫາ ອສມ຺ມຕາຍ ຠູມິຍາ ນິສິນ຺ໂນ ປາຕິໂມກ຺ຂໍ ອສ຺ສຸມ຺ຫາ, ກໂຕ ນຸ ໂຂ ອມ຺ຫາກໍ ອຸໂປສໂຖ, ອກໂຕ ນຸ ໂຂ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ສມ຺ມຕາຍ ວາ, ຠິກ຺ຂເວ, ຠູມິຍາ ນິສິນ຺ນາ ອສມ຺ມຕາຍ ວາ ຍໂຕ ປາຕິໂມກ຺ຂໍ ສຸຓາຕິ, ກໂຕວສ຺ສ ອຸໂປສໂຖ. ເຕນ ຫິ, ຠິກ຺ຂເວ, ສງ຺ໂຆ ຍາວ ມຫນ຺ຕໍ ອຸໂປສຖປ຺ປມຸຂໍ [ອຸໂປສຖມຸຂໍ (ສ຺ຍາ.)] ອາກງ຺ຂຕິ, ຕາວ ມຫນ຺ຕໍ ອຸໂປສຖປ຺ປມຸຂໍ ສມ຺ມນ຺ນຕຸ. ເອວຎ຺ຈ ປນ, ຠິກ຺ຂເວ, ສມ຺ມນ຺ນິຕພ຺ພໍ. ປຐມໍ ນິມິຕ຺ຕາ ກິຕ຺ເຕຕພ຺ພາ. ນິມິຕ຺ເຕ ກິຕ຺ເຕຕ຺ວາ ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ຍາວຕາ ສມນ຺ຕາ ນິມິຕ຺ຕາ ກິຕ຺ຕິຕາ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ເອເຕຫິ ນິມິຕ຺ເຕຫິ ອຸໂປສຖປ຺ປມຸຂໍ ສມ຺ມນ຺ເນຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ຍາວຕາ ສມນ຺ຕາ ນິມິຕ຺ຕາ ກິຕ຺ຕິຕາ. ສງ຺ໂຆ ເອເຕຫິ ນິມິຕ຺ເຕຫິ ອຸໂປສຖປ຺ປມຸຂໍ ສມ຺ມນ຺ນຕິ. ຍສ຺ສາຍສ຺ມໂຕ ຂມຕິ ເອເຕຫິ ນິມິຕ຺ເຕຫິ ອຸໂປສຖປ຺ປມຸຂສ຺ສ ສມ຺ມຸຕິ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ. ສມ຺ມຕໍ ສງ຺ເຆນ ເອເຕຫິ ນິມິຕ຺ເຕຫິ ອຸໂປສຖປ຺ປມຸຂໍ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

ເຕນ ໂຂ ປນ ສມເຍນ ອຎ຺ຎຕຣສ຺ມິໍ ອາວາເສ ຕທຫຸໂປສເຖ ນວກາ ຠິກ຺ຂູ ປຐມຕຣໍ ສນ຺ນິປຕິຕ຺ວາ – ‘‘ນ ຕາວ ເຖຣາ ອາຄຈ຺ຉນ຺ຕີ’’ຕິ – ປກ຺ກມິໍສຸ. ອຸໂປສໂຖ ວິກາເລ ອໂຫສິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ຕທຫຸໂປສເຖ ເຖເຣຫິ ຠິກ຺ຂູຫິ ປຐມຕຣໍ ສນ຺ນິປຕິຕຸນ຺ຕິ.

ເຕນ ໂຂ ປນ ສມເຍນ ຣາຊຄເຫ ສມ຺ພຫຸລາ ອາວາສາ ສມານສີມາ ໂຫນ຺ຕິ. ຕຕ຺ຖ ຠິກ຺ຂູ ວິວທນ຺ຕິ – ‘‘ອມ຺ຫາກໍ ອາວາເສ ອຸໂປສໂຖ ກຣີຍຕຸ, ອມ຺ຫາກໍ ອາວາເສ ອຸໂປສໂຖ ກຣີຍຕູ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ອິຘ ປນ, ຠິກ຺ຂເວ, ສມ຺ພຫຸລາ ອາວາສາ ສມານສີມາ ໂຫນ຺ຕິ. ຕຕ຺ຖ ຠິກ຺ຂູ ວິວທນ຺ຕິ – ‘‘ອມ຺ຫາກໍ ອາວາເສ ອຸໂປສໂຖ ກຣີຍຕຸ, ອມ຺ຫາກໍ ອາວາເສ ອຸໂປສໂຖ ກຣີຍຕູ’’ຕິ. ເຕຫິ, ຠິກ຺ຂເວ, ຠິກ຺ຂູຫິ ສພ຺ເພເຫວ ເອກຊ຺ຌໍ ສນ຺ນິປຕິຕ຺ວາ ອຸໂປສໂຖ ກາຕພ຺ໂພ. ຍຕ຺ຖ ວາ ປນ ເຖໂຣ ຠິກ຺ຂຸ ວິຫຣຕິ, ຕຕ຺ຖ ສນ຺ນິປຕິຕ຺ວາ ອຸໂປສໂຖ ກາຕພ຺ໂພ, ນ ຕ຺ເວວ ວຄ຺ເຄນ ສງ຺ເຆນ ອຸໂປສໂຖ ກາຕພ຺ໂພ. ໂຍ ກເຣຍ຺ຍ, ອາປຕ຺ຕິ ທຸກ຺ກຏສ຺ສາຕິ.