໗໐. ມຫາກປ຺ປິນວຕ຺ຖຸ

໑໓໗. ເຕນ ໂຂ ປນ ສມເຍນ ອາຍສ຺ມາ ມຫາກປ຺ປິໂນ ຣາຊຄເຫ ວິຫຣຕິ ມທ຺ທກຸຈ຺ຉິມ຺ຫິ ມິຄທາເຍ. ອຖ ໂຂ ອາຍສ຺ມໂຕ ມຫາກປ຺ປິນສ຺ສ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ – ‘‘ຄຈ຺ເຉຍ຺ຍໍ ວາຫໍ ອຸໂປສຖໍ ນ ວາ ຄຈ຺ເຉຍ຺ຍໍ, ຄຈ຺ເຉຍ຺ຍໍ ວາຫໍ ສງ຺ຆກມ຺ມໍ ນ ວາ ຄຈ຺ເຉຍ຺ຍໍ, ອຖ ຂ຺ວາຫໍ ວິສຸທ຺ໂຘ ປຣມາຍ ວິສຸທ຺ຘິຍາ’’ຕິ? ອຖ ໂຂ ຠຄວາ ອາຍສ຺ມໂຕ ມຫາກປ຺ປິນສ຺ສ ເຈຕສາ ເຈໂຕປຣິວິຕກ຺ກມຎ຺ຎາຍ – ເສຍ຺ຍຖາປິ ນາມ ພລວາ ປຸຣິໂສ ສມິຎ຺ຊິຕໍ ວາ ພາຫໍ ປສາເຣຍ຺ຍ, ປສາຣິຕໍ ວາ ພາຫໍ ສມິຎ຺ເຊຍ຺ຍ, ເອວເມວ – ຄິຊ຺ຌກູເຏ ປພ຺ພເຕ ອນ຺ຕຣຫິໂຕ ມທ຺ທກຸຈ຺ຉິມ຺ຫິ ມິຄທາເຍ ອາຍສ຺ມໂຕ ມຫາກປ຺ປິນສ຺ສ ສມ຺ມຸເຂ ປາຕຸຣໂຫສິ. ນິສີທິ ຠຄວາ ປຎ຺ຎຕ຺ເຕ ອາສເນ. ອາຍສ຺ມາປິ ໂຂ ມຫາກປ຺ປິໂນ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ມຫາກປ຺ປິນໍ ຠຄວາ ເອຕທໂວຈ – ‘‘ນນຸ ເຕ, ກປ຺ປິນ, ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ – ຄຈ຺ເຉຍ຺ຍໍ ວາຫໍ ອຸໂປສຖໍ ນ ວາ ຄຈ຺ເຉຍ຺ຍໍ, ຄຈ຺ເຉຍ຺ຍໍ ວາຫໍ ສງ຺ຆກມ຺ມໍ ນ ວາ ຄຈ຺ເຉຍ຺ຍໍ, ອຖ ຂ຺ວາຫໍ ວິສຸທ຺ໂຘ ປຣມາຍ ວິສຸທ຺ຘິຍາ’’ຕິ? ‘‘ເອວໍ, ຠນ຺ເຕ’’. ‘‘ຕຸມ຺ເຫ ເຈ ພ຺ຣາຫ຺ມຓາ ອຸໂປສຖໍ ນ ສກ຺ກຣິສ຺ສຖ ນ ຄຣຸກຣິສ຺ສຖ [ນ ຄຣຸໍ ກຣິສ຺ສຖ (ກ.)] ນ ມາເນສ຺ສຖ ນ ປູເຊສ຺ສຖ, ອຖ ໂກ ຈຣຫິ ອຸໂປສຖໍ ສກ຺ກຣິສ຺ສຕິ ຄຣຸກຣິສ຺ສຕິ ມາເນສ຺ສຕິ ປູເຊສ຺ສຕິ? ຄຈ຺ຉ ຕ຺ວໍ, ພ຺ຣາຫ຺ມຓ, ອຸໂປສຖໍ, ມາ ໂນ ອຄມາສິ. ຄຈ຺ຉ ຕ຺ວໍ ສງ຺ຆກມ຺ມໍ, ມາ ໂນ ອຄມາສີ’’ຕິ. ‘‘ເອວໍ, ຠນ຺ເຕ’’ຕິ ໂຂ ອາຍສ຺ມາ ມຫາກປ຺ປິໂນ ຠຄວໂຕ ປຈ຺ຈສ຺ໂສສິ. ອຖ ໂຂ ຠຄວາ ອາຍສ຺ມນ຺ຕໍ ມຫາກປ຺ປິນໍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ – ເສຍ຺ຍຖາປິ ນາມ ພລວາ ປຸຣິໂສ ສມິຎ຺ຊິຕໍ ວາ ພາຫໍ ປສາເຣຍ຺ຍ, ປສາຣິຕໍ ວາ ພາຫໍ ສມິຎ຺ເຊຍ຺ຍ, ເອວເມວ – ມທ຺ທກຸຈ຺ຉິມ຺ຫິ ມິຄທາເຍ ອາຍສ຺ມໂຕ ມຫາກປ຺ປິນສ຺ສ ສມ຺ມຸເຂ ອນ຺ຕຣຫິໂຕ ຄິຊ຺ຌກູເຏ ປພ຺ພເຕ ປາຕຸຣໂຫສິ.