໑໐໒. ນານາສໍວາສກາທີຫິ ອຸໂປສຖກຣຓໍ

໑໘໐. ອິຘ ປນ, ຠິກ຺ຂເວ, ອາຄນ຺ຕຸກາ ຠິກ຺ຂູ ປສ຺ສນ຺ຕິ ອາວາສິເກ ຠິກ຺ຂູ ນານາສໍວາສເກ. ເຕ ສມານສໍວາສກທິຏ຺ຐິໍ ປຏິລຠນ຺ຕິ; ສມານສໍວາສກທິຏ຺ຐິໍ ປຏິລຠິຕ຺ວາ ນ ປຸຈ຺ຉນ຺ຕິ; ອປຸຈ຺ຉິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອນາປຕ຺ຕິ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ນາຠິວິຕຣນ຺ຕິ; ອນຠິວິຕຣິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ນາຠິວິຕຣນ຺ຕິ; ອນຠິວິຕຣິຕ຺ວາ ປາເຏກ຺ກໍ ອຸໂປສຖໍ ກໂຣນ຺ຕິ. ອນາປຕ຺ຕິ.

ອິຘ ປນ, ຠິກ຺ຂເວ, ອາຄນ຺ຕຸກາ ຠິກ຺ຂູ ປສ຺ສນ຺ຕິ ອາວາສິເກ ຠິກ຺ຂູ ສມານສໍວາສເກ. ເຕ ນານາສໍວາສກທິຏ຺ຐິໍ ປຏິລຠນ຺ຕິ; ນານາສໍວາສກທິຏ຺ຐິໍ ປຏິລຠິຕ຺ວາ ນ ປຸຈ຺ຉນ຺ຕິ; ອປຸຈ຺ຉິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ອຠິວິຕຣນ຺ຕິ; ອຠິວິຕຣິຕ຺ວາ ປາເຏກ຺ກໍ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ອຠິວິຕຣນ຺ຕິ; ອຠິວິຕຣິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອນາປຕ຺ຕິ.

ອິຘ ປນ, ຠິກ຺ຂເວ, ອາວາສິກາ ຠິກ຺ຂູ ປສ຺ສນ຺ຕິ ອາຄນ຺ຕຸເກ ຠິກ຺ຂູ ນານາສໍວາສເກ. ເຕ ສມານສໍວາສກທິຏ຺ຐິໍ ປຏິລຠນ຺ຕິ; ສມານສໍວາສກທິຏ຺ຐິໍ ປຏິລຠິຕ຺ວາ ນ ປຸຈ຺ຉນ຺ຕິ; ອປຸຈ຺ຉິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອນາປຕ຺ຕິ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ນາຠິວິຕຣນ຺ຕິ; ອນຠິວິຕຣິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ນາຠິວິຕຣນ຺ຕິ; ອນຠິວິຕຣິຕ຺ວາ ປາເຏກ຺ກໍ ອຸໂປສຖໍ ກໂຣນ຺ຕິ. ອນາປຕ຺ຕິ.

ອິຘ ປນ, ຠິກ຺ຂເວ, ອາວາສິກາ ຠິກ຺ຂູ ປສ຺ສນ຺ຕິ ອາຄນ຺ຕຸເກ ຠິກ຺ຂູ ສມານສໍວາສເກ. ເຕ ນານາສໍວາສກທິຏ຺ຐິໍ ປຏິລຠນ຺ຕິ; ນານາສໍວາສກທິຏ຺ຐິໍ ປຏິລຠິຕ຺ວາ ນ ປຸຈ຺ຉນ຺ຕິ; ອປຸຈ຺ຉິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ອຠິວິຕຣນ຺ຕິ; ອຠິວິຕຣິຕ຺ວາ ປາເຏກ຺ກໍ ອຸໂປສຖໍ ກໂຣນ຺ຕິ. ອາປຕ຺ຕິ ທຸກ຺ກຏສ຺ສ. ເຕ ປຸຈ຺ຉນ຺ຕິ; ປຸຈ຺ຉິຕ຺ວາ ອຠິວິຕຣນ຺ຕິ; ອຠິວິຕຣິຕ຺ວາ ເອກໂຕ ອຸໂປສຖໍ ກໂຣນ຺ຕິ. ອນາປຕ຺ຕິ.

ນານາສໍວາສກາທີຫິ ອຸໂປສຖກຣຓໍ ນິຏ຺ຐິຕໍ.