໖໕. ຈຕ຺ຕາຣິ ອກຣຓີຍານິ

໑໒໙. ເຕນ ໂຂ ປນ ສມເຍນ ຠິກ຺ຂູ ອຎ຺ຎຕຣໍ ຠິກ຺ຂຸໍ ອຸປສມ຺ປາເທຕ຺ວາ ເອກກໍ ໂອຫາຍ ປກ຺ກມິໍສຸ. ໂສ ປຈ຺ຉາ ເອກໂກວ ອາຄຈ຺ຉນ຺ໂຕ ອນ຺ຕຣາມຄ຺ເຄ ປຸຣາຓທຸຕິຍິກາຍ ສມາຄຎ຺ຉິ. ສາ ເອວມາຫ – ‘‘ກິໍທານິ ປພ຺ພຊິໂຕສີ’’ຕິ? ‘‘ອາມ, ປພ຺ພຊິໂຕມ຺ຫີ’’ຕິ. ‘‘ທຸລ຺ລໂຠ ໂຂ ປພ຺ພຊິຕານໍ ເມຖຸໂນ ຘມ຺ໂມ; ເອຫິ, ເມຖຸນໍ ຘມ຺ມໍ ປຏິເສວາ’’ຕິ. ໂສ ຕສ຺ສາ ເມຖຸນໍ ຘມ຺ມໍ ປຏິເສວິຕ຺ວາ ຈິເຣນ ອຄມາສິ. ຠິກ຺ຂູ ເອວມາຫໍສຸ – ‘‘ກິສ຺ສ ຕ຺ວໍ, ອາວຸໂສ, ເອວໍ ຈິຣໍ ອກາສີ’’ຕິ? ອຖ ໂຂ ໂສ ຠິກ຺ຂຸ ຠິກ຺ຂູນໍ ເອຕມຕ຺ຖໍ ອາໂຣເຈສິ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອນຸຊານາມິ, ຠິກ຺ຂເວ, ອຸປສມ຺ປາເທຕ຺ວາ ທຸຕິຍໍ ທາຕຸໍ, ຈຕ຺ຕາຣິ ຈ ອກຣຓີຍານິ ອາຈິກ຺ຂິຕຸໍ –

‘‘ອຸປສມ຺ປນ຺ເນນ ຠິກ຺ຂຸນາ ເມຖຸໂນ ຘມ຺ໂມ ນ ປຏິເສວິຕພ຺ໂພ, ອນ຺ຕມໂສ ຕິຣຈ຺ຉານຄຕາຍປິ. ໂຍ ຠິກ຺ຂຸ ເມຖຸນໍ ຘມ຺ມໍ ປຏິເສວຕິ, ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ເສຍ຺ຍຖາປິ ນາມ ປຸຣິໂສ ສີສຈ຺ຉິນ຺ໂນ ອຠພ຺ໂພ ເຕນ ສຣີຣພນ຺ຘເນນ ຊີວິຕຸໍ, ເອວເມວ ຠິກ຺ຂຸ ເມຖຸນໍ ຘມ຺ມໍ ປຏິເສວິຕ຺ວາ ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ຕໍ ເຕ ຍາວຊີວໍ ອກຣຓີຍໍ.

‘‘ອຸປສມ຺ປນ຺ເນນ ຠິກ຺ຂຸນາ ອທິນ຺ນໍ ເຖຍ຺ຍສງ຺ຂາຕໍ ນ ອາທາຕພ຺ພໍ, ອນ຺ຕມໂສ ຕິຓສລາກໍ ອຸປາທາຍ. ໂຍ ຠິກ຺ຂຸ ປາທໍ ວາ ປາທາຣຫໍ ວາ ອຕິເຣກປາທໍ ວາ ອທິນ຺ນໍ ເຖຍ຺ຍສງ຺ຂາຕໍ ອາທິຍຕິ, ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ເສຍ຺ຍຖາປິ ນາມ ປຓ຺ຑຸປລາໂສ ພນ຺ຘນາ ປມຸຕ຺ໂຕ ອຠພ຺ໂພ ຫຣິຕຕ຺ຖາຍ, ເອວເມວ ຠິກ຺ຂຸ ປາທໍ ວາ ປາທາຣຫໍ ວາ ອຕິເຣກປາທໍ ວາ ອທິນ຺ນໍ ເຖຍ຺ຍສງ຺ຂາຕໍ ອາທິຍິຕ຺ວາ ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ຕໍ ເຕ ຍາວຊີວໍ ອກຣຓີຍໍ.

‘‘ອຸປສມ຺ປນ຺ເນນ ຠິກ຺ຂຸນາ ສຎ຺ຈິຈ຺ຈ ປາໂຓ ຊີວິຕາ ນ ໂວໂຣເປຕພ຺ໂພ, ອນ຺ຕມໂສ ກຸນ຺ຖກິປິລ຺ລິກໍ ອຸປາທາຍ. ໂຍ ຠິກ຺ຂຸ ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣເປຕິ, ອນ຺ຕມໂສ ຄພ຺ຠປາຕນໍ ອຸປາທາຍ, ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ເສຍ຺ຍຖາປິ ນາມ ປຸຖຸສິລາ ທ຺ເວຘາ ຠິນ຺ນາ ອປ຺ປຏິສນ຺ຘິກາ ໂຫຕິ, ເອວເມວ ຠິກ຺ຂຸ ສຎ຺ຈິຈ຺ຈ ມນຸສ຺ສວິຄ຺ຄຫໍ ຊີວິຕາ ໂວໂຣເປຕ຺ວາ ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ຕໍ ເຕ ຍາວຊີວໍ ອກຣຓີຍໍ.

‘‘ອຸປສມ຺ປນ຺ເນນ ຠິກ຺ຂຸນາ ອຸຕ຺ຕຣິມນຸສ຺ສຘມ຺ໂມ ນ ອຸລ຺ລປິຕພ຺ໂພ, ອນ຺ຕມໂສ ‘ສຸຎ຺ຎາຄາເຣ ອຠິຣມາມີ’ຕິ. ໂຍ ຠິກ຺ຂຸ ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປຕິ ຌານໍ ວາ ວິໂມກ຺ຂໍ ວາ ສມາຘິໍ ວາ ສມາປຕ຺ຕິໍ ວາ ມຄ຺ຄໍ ວາ ຜລໍ ວາ, ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ເສຍ຺ຍຖາປິ ນາມ ຕາໂລ ມຕ຺ຖກຈ຺ຉິນ຺ໂນ ອຠພ຺ໂພ ປຸນ ວິຣຸຬ຺ຫິຍາ, ເອວເມວ ຠິກ຺ຂຸ ປາປິຈ຺ໂຉ ອິຈ຺ຉາປກໂຕ ອສນ຺ຕໍ ອຠູຕໍ ອຸຕ຺ຕຣິມນຸສ຺ສຘມ຺ມໍ ອຸລ຺ລປິຕ຺ວາ ອສ຺ສມໂຓ ໂຫຕິ ອສກ຺ຍປຸຕ຺ຕິໂຍ. ຕໍ ເຕ ຍາວຊີວໍ ອກຣຓີຍ’’ນ຺ຕິ.

ຈຕ຺ຕາຣິ ອກຣຓີຍານິ ນິຏ຺ຐິຕານິ.