໖໖. ອາປຕ຺ຕິຍາ ອທສ຺ສເນ ອຸກ຺ຂິຕ຺ຕກວຕ຺ຖູນິ

໑໓໐. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ວິພ຺ຠມິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈິ. ຠຄວໂຕ ເອຕມຕ຺ຖໍ ອາໂຣເຈສຸໍ.

ອິຘ ປນ, ຠິກ຺ຂເວ, ຠິກ຺ຂຸ ອາປຕ຺ຕິຍາ ອທສ຺ສເນ ອຸກ຺ຂິຕ຺ຕໂກ ວິພ຺ຠມຕິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈຕິ. ໂສ ເອວມສ຺ສ ວຈນີໂຍ – ‘‘ປສ຺ສິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປສ຺ສິສ຺ສາມີຕິ, ປພ຺ພາເຊຕພ຺ໂພ. ສຈາຫໍ ນ ປສ຺ສິສ຺ສາມີຕິ, ນ ປພ຺ພາເຊຕພ຺ໂພ. ປພ຺ພາເຊຕ຺ວາ ວຕ຺ຕພ຺ໂພ – ‘‘ປສ຺ສິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປສ຺ສິສ຺ສາມີຕິ, ອຸປສມ຺ປາເທຕພ຺ໂພ. ສຈາຫໍ ນ ປສ຺ສິສ຺ສາມີຕິ, ນ ອຸປສມ຺ປາເທຕພ຺ໂພ. ອຸປສມ຺ປາເທຕ຺ວາ ວຕ຺ຕພ຺ໂພ – ‘‘ປສ຺ສິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປສ຺ສິສ຺ສາມີຕິ, ໂອສາເຣຕພ຺ໂພ. ສຈາຫໍ ນ ປສ຺ສິສ຺ສາມີຕິ, ນ ໂອສາເຣຕພ຺ໂພ. ໂອສາເຣຕ຺ວາ ວຕ຺ຕພ຺ໂພ – ‘‘ປສ຺ສສິ [ປສ຺ສາຫິ (ສີ.)] ຕໍ ອາປຕ຺ຕິ’’ນ຺ຕິ? ສເຈ ປສ຺ສຕິ, ອິຈ຺ເຈຕໍ ກຸສລໍ. ໂນ ເຈ ປສ຺ສຕິ, ລພ຺ຠມານາຍ ສາມຄ຺ຄິຍາ ປຸນ ອຸກ຺ຂິປິຕພ຺ໂພ. ອລພ຺ຠມານາຍ ສາມຄ຺ຄິຍາ ອນາປຕ຺ຕິ ສມ຺ໂຠເຄ ສໍວາເສ.

ອິຘ ປນ, ຠິກ຺ຂເວ, ຠິກ຺ຂຸ ອາປຕ຺ຕິຍາ ອປ຺ປຏິກມ຺ເມ ອຸກ຺ຂິຕ຺ຕໂກ ວິພ຺ຠມຕິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈຕິ. ໂສ ເອວມສ຺ສ ວຈນີໂຍ – ‘‘ປຏິກຣິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປຏິກຣິສ຺ສາມີຕິ, ປພ຺ພາເຊຕພ຺ໂພ. ສຈາຫໍ ນ ປຏິກຣິສ຺ສາມີຕິ, ນ ປພ຺ພາເຊຕພ຺ໂພ. ປພ຺ພາເຊຕ຺ວາ ວຕ຺ຕພ຺ໂພ – ‘‘ປຏິກຣິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປຏິກຣິສ຺ສາມີຕິ, ອຸປສມ຺ປາເທຕພ຺ໂພ. ສຈາຫໍ ນ ປຏິກຣິສ຺ສາມີຕິ, ນ ອຸປສມ຺ປາເທຕພ຺ໂພ. ອຸປສມ຺ປາເທຕ຺ວາ ວຕ຺ຕພ຺ໂພ – ‘‘ປຏິກຣິສ຺ສສິ ຕໍ ອາປຕ຺ຕິ’’ນ຺ຕິ? ສຈາຫໍ ປຏິກຣິສ຺ສາມີຕິ, ໂອສາເຣຕພ຺ໂພ. ສຈາຫໍ ນ ປຏິກຣິສ຺ສາມີຕິ, ນ ໂອສາເຣຕພ຺ໂພ. ໂອສາເຣຕ຺ວາ ວຕ຺ຕພ຺ໂພ – ‘‘ປຏິກໂຣຫິ ຕໍ ອາປຕ຺ຕິ’’ນ຺ຕິ. ສເຈ ປຏິກໂຣຕິ, ອິຈ຺ເຈຕໍ ກຸສລໍ. ໂນ ເຈ ປຏິກໂຣຕິ ລພ຺ຠມານາຍ ສາມຄ຺ຄິຍາ ປຸນ ອຸກ຺ຂິປິຕພ຺ໂພ. ອລພ຺ຠມານາຍ ສາມຄ຺ຄິຍາ ອນາປຕ຺ຕິ ສມ຺ໂຠເຄ ສໍວາເສ.

ອິຘ ປນ, ຠິກ຺ຂເວ, ຠິກ຺ຂຸ ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ ວິພ຺ຠມຕິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈຕິ. ໂສ ເອວມສ຺ສ ວຈນີໂຍ – ‘‘ປຏິນິສ຺ສຊ຺ຊິສ຺ສສິ ຕໍ ປາປິກໍ ທິຏ຺ຐິ’’ນ຺ຕິ? ສຈາຫໍ ປຏິນິສ຺ສຊ຺ຊິສ຺ສາມີຕິ, ປພ຺ພາເຊຕພ຺ໂພ. ສຈາຫໍ ນ ປຏິນິສ຺ສຊ຺ຊິສ຺ສາມີຕິ, ນ ປພ຺ພາເຊຕພ຺ໂພ. ປພ຺ພາເຊຕ຺ວາ ວຕ຺ຕພ຺ໂພ – ‘‘ປຏິນິສ຺ສຊ຺ຊິສ຺ສສິ ຕໍ ປາປິກໍ ທິຏ຺ຐິ’’ນ຺ຕິ? ສຈາຫໍ ປຏິນິສ຺ສຊ຺ຊິສ຺ສາມີຕິ, ອຸປສມ຺ປາເທຕພ຺ໂພ. ສຈາຫໍ ນ ປຏິນິສ຺ສຊ຺ຊິສ຺ສາມີຕິ, ນ ອຸປສມ຺ປາເທຕພ຺ໂພ. ອຸປສມ຺ປາເທຕ຺ວາ ວຕ຺ຕພ຺ໂພ – ‘‘ປຏິນິສ຺ສຊ຺ຊິສ຺ສສິ ຕໍ ປາປິກໍ ທິຏ຺ຐິ’’ນ຺ຕິ? ສຈາຫໍ ປຏິນິສ຺ສຊ຺ຊິສ຺ສາມີຕິ, ໂອສາເຣຕພ຺ໂພ. ສຈາຫໍ ນ ປຏິນິສ຺ສຊ຺ຊິສ຺ສາມີຕິ, ນ ໂອສາເຣຕພ຺ໂພ. ໂອສາເຣຕ຺ວາ ວຕ຺ຕພ຺ໂພ – ‘‘ປຏິນິສ຺ສຊ຺ເຊຫິ ຕໍ ປາປິກໍ ທິຏ຺ຐິ’’ນ຺ຕິ. ສເຈ ປຏິນິສ຺ສຊ຺ຊຕິ, ອິຈ຺ເຈຕໍ ກຸສລໍ. ໂນ ເຈ ປຏິນິສ຺ສຊ຺ຊຕິ, ລພ຺ຠມານາຍ ສາມຄ຺ຄິຍາ ປຸນ ອຸກ຺ຂິປິຕພ຺ໂພ. ອລພ຺ຠມານາຍ ສາມຄ຺ຄິຍາ ອນາປຕ຺ຕິ ສມ຺ໂຠເຄ ສໍວາເສຕິ.

ມຫາຂນ຺ຘໂກ ປຐໂມ.