໒໕. ອຎ຺ຎຕິຕ຺ຖິຍປຸພ຺ພກຖາ

໘໖. ເຕນ ໂຂ ປນ ສມເຍນ ໂຍ ໂສ ອຎ຺ຎຕິຕ຺ຖິຍປຸພ຺ໂພ [ໂຍ ໂສ ປສຸຣປຣິພ຺ພາຊໂກ ອຎ຺ຎຕິຕ຺ຖິຍປຸພ຺ໂພ (ກ.)] ປຊ຺ຌາເຍນ ສຫຘມ຺ມິກໍ ວຸຈ຺ຈມາໂນ ອຸປຊ຺ຌາຍສ຺ສ ວາທໍ ອາໂຣເປຕ຺ວາ ຕໍເຍວ ຕິຕ຺ຖາຍຕນໍ ສງ຺ກມິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈິ. ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ໂຍ ໂສ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອຸປຊ຺ຌາເຍນ ສຫຘມ຺ມິກໍ ວຸຈ຺ຈມາໂນ ອຸປຊ຺ຌາຍສ຺ສ ວາທໍ ອາໂຣເປຕ຺ວາ ຕໍເຍວ ຕິຕ຺ຖາຍຕນໍ ສງ຺ກນ຺ໂຕ, ໂສ ອາຄໂຕ ນ ອຸປສມ຺ປາເທຕພ຺ໂພ. ໂຍ ໂສ, ຠິກ຺ຂເວ, ອຎ຺ໂຎປິ ອຎ຺ຎຕິຕ຺ຖິຍປຸພ຺ໂພ ອິມສ຺ມິໍ ຘມ຺ມວິນເຍ ອາກງ຺ຂຕິ ປພ຺ພຊ຺ຊໍ, ອາກງ຺ຂຕິ ອຸປສມ຺ປທໍ, ຕສ຺ສ ຈຕ຺ຕາໂຣ ມາເສ ປຣິວາໂສ ທາຕພ຺ໂພ. ເອວຎ຺ຈ ປນ, ຠິກ຺ຂເວ, ທາຕພ຺ໂພ – ປຐມໍ ເກສມສ຺ສຸໍ ໂອຫາຣາເປຕ຺ວາ ກາສາຍານິ ວຕ຺ຖານິ ອຈ຺ຉາທາເປຕ຺ວາ ເອກໍສໍ ອຸຕ຺ຕຣາສງ຺ຄໍ ກາຣາເປຕ຺ວາ ຠິກ຺ຂູນໍ ປາເທ ວນ຺ທາເປຕ຺ວາ ອຸກ຺ກຸຏິກໍ ນິສີທາເປຕ຺ວາ ອຎ຺ຊລິໍ ປຄ຺ຄຓ຺ຫາເປຕ຺ວາ ເອວໍ ວເທຫີຕິ ວຕ຺ຕພ຺ໂພ – ‘‘ພຸທ຺ຘໍ ສຣຓໍ ຄຈ຺ຉາມິ, ຘມ຺ມໍ ສຣຓໍ ຄຈ຺ຉາມິ, ສງ຺ຆໍ ສຣຓໍ ຄຈ຺ຉາມິ; ທຸຕິຍມ຺ປິ ພຸທ຺ຘໍ ສຣຓໍ ຄຈ຺ຉາມິ, ທຸຕິຍມ຺ປິ ຘມ຺ມໍ ສຣຓໍ ຄຈ຺ຉາມິ, ທຸຕິຍມ຺ປິ ສງ຺ຆໍ ສຣຓໍ ຄຈ຺ຉາມິ; ຕຕິຍມ຺ປິ ພຸທ຺ຘໍ ສຣຓໍ ຄຈ຺ຉາມິ, ຕຕິຍມ຺ປິ ຘມ຺ມໍ ສຣຓໍ ຄຈ຺ຉາມິ, ຕຕິຍມ຺ປິ ສງ຺ຆໍ ສຣຓໍ ຄຈ຺ຉາມີ’’ຕິ.

ເຕນ, ຠິກ຺ຂເວ, ອຎ຺ຎຕິຕ຺ຖິຍປຸພ຺ເພນ ສງ຺ຆໍ ອຸປສງ຺ກມິຕ຺ວາ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ຠິກ຺ຂູນໍ ປາເທ ວນ຺ທິຕ຺ວາ ອຸກ຺ກຸຏິກໍ ນິສີທິຕ຺ວາ ອຎ຺ຊລິໍ ປຄ຺ຄເຫຕ຺ວາ ເອວມສ຺ສ ວຈນີໂຍ – ‘‘ອຫໍ, ຠນ຺ເຕ, ອຎ຺ຎຕິຕ຺ຖິຍປຸພ຺ໂພ ອິມສ຺ມິໍ ຘມ຺ມວິນເຍ ອາກງ຺ຂາມິ ອຸປສມ຺ປທໍ. ໂສຫໍ, ຠນ຺ເຕ, ສງ຺ຆໍ ຈຕ຺ຕາໂຣ ມາເສ ປຣິວາສໍ ຍາຈາມີ’’ຕິ. ທຸຕິຍມ຺ປິ ຍາຈິຕພ຺ໂພ. ຕຕິຍມ຺ປິ ຍາຈິຕພ຺ໂພ. ພ຺ຍຕ຺ເຕນ ຠິກ຺ຂຸນາ ປຏິພເລນ ສງ຺ໂຆ ຎາເປຕພ຺ໂພ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ອິຕ຺ຖນ຺ນາໂມ ອຎ຺ຎຕິຕ຺ຖິຍປຸພ຺ໂພ ອິມສ຺ມິໍ ຘມ຺ມວິນເຍ ອາກງ຺ຂຕິ ອຸປສມ຺ປທໍ. ໂສ ສງ຺ຆໍ ຈຕ຺ຕາໂຣ ມາເສ ປຣິວາສໍ ຍາຈຕິ. ຍທິ ສງ຺ຆສ຺ສ ປຕ຺ຕກລ຺ລໍ ສງ຺ໂຆ ອິຕ຺ຖນ຺ນາມສ຺ສ ອຎ຺ຎຕິຕ຺ຖິຍປຸພ຺ພສ຺ສ ຈຕ຺ຕາໂຣ ມາເສ ປຣິວາສໍ ທເທຍ຺ຍ. ເອສາ ຎຕ຺ຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອຍໍ ອິຕ຺ຖນ຺ນາໂມ ອຎ຺ຎຕິຕ຺ຖິຍປຸພ຺ໂພ ອິມສ຺ມິໍ ຘມ຺ມວິນເຍ ອາກງ຺ຂຕິ ອຸປສມ຺ປທໍ. ໂສ ສງ຺ຆໍ ຈຕ຺ຕາໂຣ ມາເສ ປຣິວາສໍ ຍາຈຕິ. ສງ຺ໂຆ ອິຕ຺ຖນ຺ນາມສ຺ສ ອຎ຺ຎຕິຕ຺ຖິຍປຸພ຺ພສ຺ສ ຈຕ຺ຕາໂຣ ມາເສ ປຣິວາສໍ ເທຕິ. ຍສ຺ສາຍສ຺ມໂຕ ຂມຕິ ອິຕ຺ຖນ຺ນາມສ຺ສ ອຎ຺ຎຕິຕ຺ຖິຍປຸພ຺ພສ຺ສ ຈຕ຺ຕາໂຣ ມາເສ ປຣິວາສສ຺ສ ທານໍ, ໂສ ຕຸຓ຺ຫສ຺ສ; ຍສ຺ສ ນກ຺ຂມຕິ, ໂສ ຠາເສຍ຺ຍ.

‘‘ທິນ຺ໂນ ສງ຺ເຆນ ອິຕ຺ຖນ຺ນາມສ຺ສ ອຎ຺ຎຕິຕ຺ຖິຍປຸພ຺ພສ຺ສ ຈຕ຺ຕາໂຣ ມາເສ ປຣິວາໂສ. ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ.

໘໗. ‘‘ເອວໍ ໂຂ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ, ເອວໍ ອນາຣາຘໂກ. ກຖຎ຺ຈ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ? ອິຘ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອຕິກາເລນ ຄາມໍ ປວິສຕິ, ອຕິທິວາ ປຏິກ຺ກມຕິ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ເວສິຍາໂຄຈໂຣ ວາ ໂຫຕິ, ວິຘວາໂຄຈໂຣ ວາ ໂຫຕິ, ຖຸລ຺ລກຸມາຣິກາໂຄຈໂຣ ວາ ໂຫຕິ, ປຓ຺ຑກໂຄຈໂຣ ວາ ໂຫຕິ, ຠິກ຺ຂຸນິໂຄຈໂຣ ວາ ໂຫຕິ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ຍານິ ຕານິ ສພ຺ຣຫ຺ມຈາຣີນໍ ອຸຈ຺ຈາວຈານິ ກຣຓີຍານິ, ຕຕ຺ຖ ນ ທກ຺ໂຂ ໂຫຕິ, ນ ອນລໂສ, ນ ຕຕ຺ຣຸປາຍາຍ ວີມໍສາຍ ສມນ຺ນາຄໂຕ, ນ ອລໍ ກາຕຸໍ, ນ ອລໍ ສໍວິຘາຕຸໍ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ນ ຕິພ຺ພຈ຺ຉນ຺ໂທ ໂຫຕິ ອຸທ຺ເທເສ, ປຣິປຸຈ຺ຉາຍ, ອຘິສີເລ, ອຘິຈິຕ຺ເຕ, ອຘິປຎ຺ຎາຍ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ຍສ຺ສ ຕິຕ຺ຖາຍຕນາ ສງ຺ກນ຺ໂຕ ໂຫຕິ, ຕສ຺ສ ສຕ຺ຖຸໂນ ຕສ຺ສ ທິຏ຺ຐິຍາ ຕສ຺ສ ຂນ຺ຕິຍາ ຕສ຺ສ ຣຸຈິຍາ ຕສ຺ສ ອາທາຍສ຺ສ ອວຓ຺ເຓ ຠຎ຺ຎມາເນ ກຸປິໂຕ ໂຫຕິ ອນຕ຺ຕມໂນ ອນຠິຣທ຺ໂຘ, ພຸທ຺ຘສ຺ສ ວາ ຘມ຺ມສ຺ສ ວາ ສງ຺ຆສ຺ສ ວາ ອວຓ຺ເຓ ຠຎ຺ຎມາເນ ອຕ຺ຕມໂນ ໂຫຕິ ອຸທຄ຺ໂຄ ອຠິຣທ຺ໂຘ. ຍສ຺ສ ວາ ປນ ຕິຕ຺ຖາຍຕນາ ສງ຺ກນ຺ໂຕ ໂຫຕິ, ຕສ຺ສ ສຕ຺ຖຸໂນ ຕສ຺ສ ທິຏ຺ຐິຍາ ຕສ຺ສ ຂນ຺ຕິຍາ ຕສ຺ສ ຣຸຈິຍາ ຕສ຺ສ ອາທາຍສ຺ສ ວຓ຺ເຓ ຠຎ຺ຎມາເນ ອຕ຺ຕມໂນ ໂຫຕິ ອຸທຄ຺ໂຄ ອຠິຣທ຺ໂຘ, ພຸທ຺ຘສ຺ສ ວາ ຘມ຺ມສ຺ສ ວາ ສງ຺ຆສ຺ສ ວາ ວຓ຺ເຓ ຠຎ຺ຎມາເນ ກຸປິໂຕ ໂຫຕິ ອນຕ຺ຕມໂນ ອນຠິຣທ຺ໂຘ. ອິທໍ, ຠິກ຺ຂເວ, ສງ຺ຆາຕນິກໍ ອຎ຺ຎຕິຕ຺ຖິຍປຸພ຺ພສ຺ສ ອນາຣາຘນີຍສ຺ມິໍ. ເອວມ຺ປິ ໂຂ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອນາຣາຘໂກ ໂຫຕິ. ເອວໍ ອນາຣາຘໂກ ໂຂ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຄໂຕ ນ ອຸປສມ຺ປາເທຕພ຺ໂພ.

‘‘ກຖຎ຺ຈ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ? ອິຘ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ນາຕິກາເລນ ຄາມໍ ປວິສຕິ ນາຕິທິວາ ປຏິກ຺ກມຕິ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ນ ເວສິຍາໂຄຈໂຣ ໂຫຕິ, ນ ວິຘວາໂຄຈໂຣ ໂຫຕິ, ນ ຖຸລ຺ລກຸມາຣິກາໂຄຈໂຣ ໂຫຕິ, ນ ປຓ຺ຑກໂຄຈໂຣ ໂຫຕິ, ນ ຠິກ຺ຂຸນິໂຄຈໂຣ ໂຫຕິ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ຍານິ ຕານິ ສພ຺ຣຫ຺ມຈາຣີນໍ ອຸຈ຺ຈາວຈານິ ກຣຓີຍານິ, ຕຕ຺ຖ ທກ຺ໂຂ ໂຫຕິ, ອນລໂສ, ຕຕ຺ຣຸປາຍາຍ ວີມໍສາຍ ສມນ຺ນາຄໂຕ, ອລໍ ກາຕຸໍ, ອລໍ ສໍວິຘາຕຸໍ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ຕິພ຺ພຈ຺ຉນ຺ໂທ ໂຫຕິ ອຸທ຺ເທເສ, ປຣິປຸຈ຺ຉາຍ, ອຘິສີເລ, ອຘິຈິຕ຺ເຕ, ອຘິປຎ຺ຎາຍ. ເອວມ຺ປິ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ.

‘‘ປຸນ ຈປຣໍ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ຍສ຺ສ ຕິຕ຺ຖາຍຕນາ ສງ຺ກນ຺ໂຕ ໂຫຕິ, ຕສ຺ສ ສຕ຺ຖຸໂນ ຕສ຺ສ ທິຏ຺ຐິຍາ ຕສ຺ສ ຂນ຺ຕິຍາ ຕສ຺ສ ຣຸຈິຍາ ຕສ຺ສ ອາທາຍສ຺ສ ອວຓ຺ເຓ ຠຎ຺ຎມາເນ ອຕ຺ຕມໂນ ໂຫຕິ ອຸທຄ຺ໂຄ ອຠິຣທ຺ໂຘ, ພຸທ຺ຘສ຺ສ ວາ ຘມ຺ມສ຺ສ ວາ ສງ຺ຆສ຺ສ ວາ ອວຓ຺ເຓ ຠຎ຺ຎມາເນ ກຸປິໂຕ ໂຫຕິ ອນຕ຺ຕມໂນ ອນຠິຣທ຺ໂຘ. ຍສ຺ສ ວາ ປນ ຕິຕ຺ຖາຍຕນາ ສງ຺ກນ຺ໂຕ ໂຫຕິ, ຕສ຺ສ ສຕ຺ຖຸໂນ ຕສ຺ສ ທິຏ຺ຐິຍາ ຕສ຺ສ ຂນ຺ຕິຍາ ຕສ຺ສ ຣຸຈິຍາ ຕສ຺ສ ອາທາຍສ຺ສ ວຓ຺ເຓ ຠຎ຺ຎມາເນ ກຸປິໂຕ ໂຫຕິ ອນຕ຺ຕມໂນ ອນຠິຣທ຺ໂຘ, ພຸທ຺ຘສ຺ສ ວາ ຘມ຺ມສ຺ສ ວາ ສງ຺ຆສ຺ສ ວາ ວຓ຺ເຓ ຠຎ຺ຎມາເນ ອຕ຺ຕມໂນ ໂຫຕິ ອຸທຄ຺ໂຄ ອຠິຣທ຺ໂຘ. ອິທໍ, ຠິກ຺ຂເວ, ສງ຺ຆາຕນິກໍ ອຎ຺ຎຕິຕ຺ຖິຍປຸພ຺ພສ຺ສ ອາຣາຘນີຍສ຺ມິໍ. ເອວມ຺ປິ ໂຂ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຣາຘໂກ ໂຫຕິ. ເອວໍ ອາຣາຘໂກ ໂຂ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ອາຄໂຕ ອຸປສມ຺ປາເທຕພ຺ໂພ.

‘‘ສເຈ, ຠິກ຺ຂເວ, ອຎ຺ຎຕິຕ຺ຖິຍປຸພ຺ໂພ ນຄ຺ໂຄ ອາຄຈ຺ຉຕິ, ອຸປຊ຺ຌາຍມູລກໍ ຈີວຣໍ ປຣິເຍສິຕພ຺ພໍ. ສເຈ ອຈ຺ຉິນ຺ນເກໂສ ອາຄຈ຺ຉຕິ, ສງ຺ໂຆ ອປໂລເກຕພ຺ໂພ ຠຓ຺ຑຸກມ຺ມາຍ. ເຍ ເຕ, ຠິກ຺ຂເວ, ອຄ຺ຄິກາ ຊຏິລກາ, ເຕ ອາຄຕາ ອຸປສມ຺ປາເທຕພ຺ພາ, ນ ເຕສໍ ປຣິວາໂສ ທາຕພ຺ໂພ. ຕໍ ກິສ຺ສ ເຫຕຸ? ກມ຺ມວາທິໂນ ເອເຕ, ຠິກ຺ຂເວ, ກິຣິຍວາທິໂນ. ສເຈ, ຠິກ຺ຂເວ, ຊາຕິຍາ ສາກິໂຍ ອຎ຺ຎຕິຕ຺ຖິຍປຸພ຺ໂພ ອາຄຈ຺ຉຕິ, ໂສ ອາຄໂຕ ອຸປສມ຺ປາເທຕພ຺ໂພ, ນ ຕສ຺ສ ປຣິວາໂສ ທາຕພ຺ໂພ. ອິມາຫໍ, ຠິກ຺ຂເວ, ຎາຕີນໍ ອາເວຓິກໍ ປຣິຫາຣໍ ທມ຺ມີ’’ຕິ.

ອຎ຺ຎຕິຕ຺ຖິຍປຸພ຺ພກຖາ ນິຏ຺ຐິຕາ.

ສຕ຺ຕມຠາຓວາໂຣ.