໓. ຈຕ຺ຕາລີສກໍ

໑໖໐. ເຕນ ໂຂ ປນ ສມເຍນ ອຎ຺ຎຕໂຣ ຠິກ຺ຂຸ ປຣິວສນ຺ໂຕ ວິພ຺ຠມິ. ໂສ ປຸນ ປຈ຺ຈາຄນ຺ຕ຺ວາ ຠິກ຺ຂູ ອຸປສມ຺ປທໍ ຍາຈິ. ຠຄວໂຕ ເອຕມຕ຺ຖໍ ອາໂຣເຈສຸໍ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ ວິພ຺ຠມຕິ. ວິພ຺ຠນ຺ຕກສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ ສາມເຓໂຣ ໂຫຕິ. ສາມເຓຣສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ ອຸມ຺ມຕ຺ຕໂກ ໂຫຕິ. ອຸມ຺ມຕ຺ຕກສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ອນຸມ຺ມຕ຺ຕໂກ ໂຫຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ ຂິຕ຺ຕຈິຕ຺ໂຕ ໂຫຕິ. ຂິຕ຺ຕຈິຕ຺ຕສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ອຂິຕ຺ຕຈິຕ຺ໂຕ ໂຫຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຸຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ ເວທນາຏ຺ໂຏ ໂຫຕິ. ເວທນາຏ຺ຏສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ອເວທນາຏ຺ໂຏ ໂຫຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ, ອາປຕ຺ຕິຍາ ອທສ຺ສເນ, ອຸກ຺ຂິປິຍ຺ຍຕິ [ອຸກ຺ຂິປິຍຕິ (ສ຺ຍາ.), ອຸກ຺ຂິປີຍຕິ (ກ.)]. ອຸກ຺ຂິຕ຺ຕກສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ [ໂອສາຣິຍຕິ (ສ຺ຍາ.), ໂອສາຣີຍຕິ (ກ.)], ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ, ອາປຕ຺ຕິຍາ ອປ຺ປຏິກມ຺ເມ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ປຣິວສນ຺ໂຕ, ປາປິກາຍ ທິຏ຺ຐິຍາ, ອປ຺ປຏິນິສ຺ສຄ຺ເຄ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ປຣິວາໂສ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ, ອວເສໂສ ປຣິວສິຕພ຺ໂພ.

໑໖໑. ‘‘ອິຘ ປນ, ຠິກ຺ຂເວ, ຠິກ຺ຂຸ ມູລາຍປຏິກສ຺ສນາຣໂຫ ວິພ຺ຠມຕິ. ວິພ຺ຠນ຺ຕກສ຺ສ, ຠິກ຺ຂເວ, ມູລາຍປຏິກສ຺ສນາ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ. ໂສ ຠິກ຺ຂຸ ມູລາຍ ປຏິກສ຺ສິຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ມູລາຍປຏິກສ຺ສນາຣໂຫ ສາມເຓໂຣ ໂຫຕິ…ເປ… ອຸມ຺ມຕ຺ຕໂກ ໂຫຕິ…ເປ… ຂິຕ຺ຕຈິຕ຺ໂຕ ໂຫຕິ…ເປ… ເວທນາຏ຺ໂຏ ໂຫຕິ…ເປ… ອາປຕ຺ຕິຍາ ອທສ຺ສເນ ອຸກ຺ຂິປິຍ຺ຍຕິ…ເປ… ອາປຕ຺ຕິຍາ ອປ຺ປຏິກມ຺ເມ ອຸກ຺ຂິປິຍ຺ຍຕິ…ເປ… ປາປິກາຍ ທິຏ຺ຐິຍາ, ອປ຺ປຏິນິສ຺ສຄ຺ເຄ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ມູລາຍປຏິກສ຺ສນາ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ. ໂສ ຠິກ຺ຂຸ ມູລາຍ ປຏິກສ຺ສິຕພ຺ໂພ.

໑໖໒. ‘‘ອິຘ ປນ, ຠິກ຺ຂເວ, ຠິກ຺ຂຸ ມານຕ຺ຕາຣໂຫ ວິພ຺ຠມຕິ. ວິພ຺ຠນ຺ຕກສ຺ສ, ຠິກ຺ຂເວ, ມານຕ຺ຕທານໍ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ. ຕສ຺ສ ຠິກ຺ຂຸໂນ ມານຕ຺ຕໍ ທາຕພ຺ພໍ.

‘‘ອິຘ ປນ, ຠິກ຺ຂເວ, ຠິກ຺ຂຸ ມານຕ຺ຕາຣໂຫ ສາມເຓໂຣ ໂຫຕິ…ເປ… ອຸມ຺ມຕ຺ຕໂກ ໂຫຕິ…ເປ… ຂິຕ຺ຕຈິຕ຺ໂຕ ໂຫຕິ…ເປ… ເວທນາຏ຺ໂຏ ໂຫຕິ…ເປ… ອາປຕ຺ຕິຍາ ອທສ຺ສເນ, ອຸກ຺ຂິປິຍ຺ຍຕິ…ເປ… ອາປຕ຺ຕິຍາ ອປ຺ປຏິກມ຺ເມ, ອຸກ຺ຂິປິຍ຺ຍຕິ…ເປ… ປາປິກາຍ ທິຏ຺ຐິຍາ, ອປ຺ປຏິນິສ຺ສຄ຺ເຄ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ມານຕ຺ຕທານໍ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ. ຕສ຺ສ ຠິກ຺ຂຸໂນ ມານຕ຺ຕໍ ທາຕພ຺ພໍ.

໑໖໓. ‘‘ອິຘ ປນ, ຠິກ຺ຂເວ, ຠິກ຺ຂຸ ມານຕ຺ຕໍ ຈຣນ຺ໂຕ ວິພ຺ຠມຕິ. ວິພ຺ຠນ຺ຕກສ຺ສ, ຠິກ຺ຂເວ, ມານຕ຺ຕຈຣິຍາ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ; ຍໍ ມານຕ຺ຕໍ ທິນ຺ນໍ ສຸທິນ຺ນໍ, ຍໍ ມານຕ຺ຕໍ ຈິຓ຺ຓໍ ສຸຈິຓ຺ຓໍ, ອວເສສໍ ຈຣິຕພ຺ພໍ.

‘‘ອິຘ ປນ, ຠິກ຺ຂເວ, ຠິກ຺ຂຸ ມານຕ຺ຕໍ ຈຣນ຺ໂຕ ສາມເຓໂຣ ໂຫຕິ…ເປ… ອຸມ຺ມຕ຺ຕໂກ ໂຫຕິ…ເປ… ຂິຕ຺ຕຈິຕ຺ໂຕ ໂຫຕິ…ເປ… ເວທນາຏ຺ໂຏ ໂຫຕິ…ເປ… ອາປຕ຺ຕິຍາ ອທສ຺ສເນ, ອຸກ຺ຂິປິຍ຺ຍຕິ…ເປ… ອາປຕ຺ຕິຍາ ອປ຺ປຏິກມ຺ເມ, ອຸກ຺ຂິປິຍ຺ຍຕິ…ເປ… ປາປິກາຍ ທິຏ຺ຐິຍາ, ອປ຺ປຏິນິສ຺ສຄ຺ເຄ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ມານຕ຺ຕຈຣິຍາ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຸຣິວຸຕ຺ໂຖ ສຸປຣິວຸຕ຺ໂຖ; ຍໍ ມານຕ຺ຕໍ ທິນ຺ນໍ ສຸທິນ຺ນໍ, ຍໍ ມານຕ຺ຕໍ ຈິຓ຺ຓໍ ສຸຈິຓ຺ຓໍ, ອວເສສໍ ຈຣິຕພ຺ພໍ.

໑໖໔. ‘‘ອິຘ ປນ, ຠິກ຺ຂເວ, ຠິກ຺ຂຸ ອພ຺ຠານາຣໂຫ ວິພ຺ຠມຕິ. ວິພ຺ຠນ຺ຕກສ຺ສ, ຠິກ຺ຂເວ, ອພ຺ຠານໍ ນ ຣຸຫຕິ. ໂສ ເຈ ປຸນ ອຸປສມ຺ປຊ຺ຊຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ; ຍໍ ມານຕ຺ຕໍ ທິນ຺ນໍ ສຸທິນ຺ນໍ, ຍໍ ມານຕ຺ຕໍ ຈິຓ຺ຓໍ ສຸຈິຓ຺ຓໍ. ໂສ ຠິກ຺ຂຸ ອພ຺ເຠຕພ຺ໂພ.

‘‘ອິຘ ປນ, ຠິກ຺ຂເວ, ຠິກ຺ຂຸ ອພ຺ຠານາຣໂຫ ສາມເຓໂຣ ໂຫຕິ…ເປ… ອຸມ຺ມຕ຺ຕໂກ ໂຫຕິ…ເປ…

ຂິຕ຺ຕຈິຕ຺ໂຕ ໂຫຕິ…ເປ… ເວທນາຏ຺ໂຏ ໂຫຕິ…ເປ… ອາປຕ຺ຕິຍາ ອທສ຺ສເນ, ອຸກ຺ຂິປິຍ຺ຍຕິ…ເປ… ອາປຕ຺ຕິຍາ ອປ຺ປຏິກມ຺ເມ, ອຸກ຺ຂິປິຍ຺ຍຕິ…ເປ… ປາປິກາຍ ທິຏ຺ຐິຍາ, ອປ຺ປຏິນິສ຺ສຄ຺ເຄ, ອຸກ຺ຂິປິຍ຺ຍຕິ. ອຸກ຺ຂິຕ຺ຕກສ຺ສ, ຠິກ຺ຂເວ, ອພ຺ຠານໍ ນ ຣຸຫຕິ. ໂສ ເຈ ປຸນ ໂອສາຣິຍ຺ຍຕິ, ຕສ຺ສ ຕເທວ ປຸຣິມໍ ປຣິວາສທານໍ. ໂຍ ປຣິວາໂສ ທິນ຺ໂນ ສຸທິນ຺ໂນ, ໂຍ ປຣິວຸຕ຺ໂຖ ສຸປຣິວຸຕ຺ໂຖ; ຍໍ ມານຕ຺ຕໍ ທິນ຺ນໍ ສຸທິນ຺ນໍ, ຍໍ ມານຕ຺ຕໍ ຈິຓ຺ຓໍ ສຸຈິຓ຺ຓໍ. ໂສ ຠິກ຺ຂຸ ອພ຺ເຠຕພ຺ໂພ.

ຈຕ຺ຕາລີສກໍ ສມຕ຺ຕໍ.