໑໘. ມຄ຺ຄປຈ຺ຈຍນິທ຺ເທສວຓ຺ຓນາ

໑໘. ທຸວິຘມ຺ປິ ສງ຺ກປ຺ປນ຺ຕິ ສມ຺ມາສງ຺ກປ຺ໂປ ມິຈ຺ຉາສງ຺ກປ຺ໂປຕິ ຈ ເອວໍ ອນວຊ຺ຊສາວຊ຺ຊເຠເທນ ທຸວິຘມ຺ປິ. ວີຣິຍໍ ສມາຘິນ຺ຕິ ເອຕ຺ຖາປິ ເອເສວ ນໂຍ. ສງ຺ຄຓ຺ຫິຕ຺ວາ ວິຕກ຺ກາທິຠາວສາມຎ຺ເຎນ ສຫ ຄເຫຕ຺ວາ, ເອເກກເມວ ກຕ຺ວາ ຄເຫຕ຺ວາຕິ ອຕ຺ໂຖ. ເຕຫິ ມິຈ຺ຉາວາຈາກມ຺ມນ຺ຕາຊີເວຫິ. ອິຘາຕິ ອິມສ຺ມິໍ ມຄ຺ຄປຈ຺ຈຍນິທ຺ເທເສ ລພ຺ຠມານານິ ຈ ມຄ຺ຄປຈ຺ຈຍຠາວໂຕ, ຈ-ສທ຺ເທນ ອລພ຺ຠມານານິ ຈ ມຄ຺ຄປຈ຺ຈຍຕ຺ຕາຠາວາ. ຍທິ ເອວໍ ກສ຺ມາ ວຸຕ຺ຕານີຕິ ອາຫ ‘‘ມຄ຺ຄງ຺ຄວຈນສາມຎ຺ເຎນາ’’ຕິ. ເອວໍ ປຣິຍາຍນິທ຺ເທໂສ ອິຘ ກິມຕ຺ຖິໂຍຕິ ໂຈທນໍ ສນ຺ຘາຍາຫ ‘‘ເອວຎ຺ຫິ ສຸຕ຺ຕໂວຫາໂຣປິ ທສ຺ສິໂຕ ໂຫຕີ’’ຕິ. ເອວໍ ປນ ທສ຺ເສນ຺ເຕນາຕິ ປຣມຕ຺ຖໂຕ ອມຄ຺ຄງ຺ຄານິປິ ສຸຕ຺ເຕ ມຄ຺ຄງ຺ຄໂວຫາຣສິທ຺ຘິຍາ ອິຘ ມຄ຺ຄງ຺ເຄຫິ ສຫ ທສ຺ເສນ຺ເຕນ. ອຸທ຺ຘຣິຕ຺ວາຕິ ປທຸທ຺ຘາຣໍ ກຕ຺ວາ. ອິທານິ ມິຈ຺ຉາວາຈາທີຫິ ສທ຺ຘິໍ ທ຺ວາທສງ຺ຄານິ ນ ທສ຺ເສຕພ຺ພານິ, ກສ຺ມາຕິ ເຈຕິ ອາຫ ‘‘ນ ຫິ ປາຬິຍໍ…ເປ… ວຕ຺ຕພ຺ໂພ’’ຕິ. ຕປ຺ປຏິປກ຺ຂຠາວໂຕເຍວ ມິຈ຺ຉາມຄ຺ຄງ຺ຄານິ, ນ ມິຈ຺ຉາທິຏ຺ຐິອາທໂຍ ວິຍ ສຠາວໂຕຕິ ອຘິປ຺ປາໂຍ.

ປຣິຍາຍນິປ຺ປຣິຍາຍມຄ຺ຄງ຺ຄທສ຺ສນຕ຺ເຖປິ ອຕ຺ຖວຈເນ ເອວໍ ນ ວຕ຺ຕພ຺ພເມວາຕິ ທສ຺ເສນ຺ໂຕ ‘‘ປຣິຍາຍ…ເປ… ອຘິກຣຓານີ’’ຕິ ອາຫ. ຕສ຺ສຕ຺ໂຖ – ຍຖາ ‘‘ອຎ຺ຎຠາຄິຍສ຺ສ ອຘິກຣຓສ຺ສາ’’ຕິ ເອຕ຺ຖ ປາຬິຄຕອຘິກຣຓສທ຺ທປຕິຣູປໂກ ອຎ຺ໂຎ ອຘິກຣຓສທ຺ໂທ ປາຬິຄຕຕທຎ຺ຎສາຘາຣຓຕາຍ ອຸຠຍປທຕ຺ໂຖ ອຸທ຺ຘໂຏ ‘‘ອຘິກຣຓໍ ນາມ ຈຕ຺ຕາຣິ ອຘິກຣຓານີ’’ຕິ, ເອວມິຘາປິ ນິປ຺ປຣິຍາຍໍ ອິຕຣຎ຺ຈ ມຄ຺ຄງ຺ຄໍ ທສ຺ເສຕຸກາເມນ ປາຬິຄຕຕທຎ຺ຎສາຘາຣໂຓ ມຄ຺ຄງ຺ຄສທ຺ໂທ ອຸທ຺ຘຣິຕພ຺ໂພ ສິຍາ, ຕຖາ ນ ກຕນ຺ຕິ. ຕສ຺ມາຕິ ຍສ຺ມາ ປາຬິຄໂຕເຍວ ມຄ຺ຄງ຺ຄສທ຺ໂທ ອຸທ຺ຘໂຏ, ນ ຕທຎ຺ຎສາຘາຣໂຓ, ນ ຈ ອຕ຺ຖຸທ຺ຘາຣມຸເຂນ ອຘິປ຺ເປຕຕ຺ໂຖ ນິຍມິໂຕ, ຕສ຺ມາ. ເຕສູຕິ ອເຫຕຸກຈິຕ຺ຕຸປ຺ປາເທສຸ. ‘‘ສມ຺ມາທິຏ຺ຐິ…ເປ… ສມາຘໂຍ’’ຕິ ເອຕ຺ຖ ສງ຺ກປ຺ປວາຍາມສມາຘໂຍ ສມ຺ມາມິຈ຺ຉາສທ຺ເທຫິ ວິເສເສຕ຺ວາ ວຸຕ຺ຕາຕິ ອາຫ ‘‘ສມ຺ມາທິຏ຺ຐິອາທໂຍ ຍຖາວຸຕ຺ຕາ ສນ຺ຕີ’’ຕິ. ສງ຺ກປ຺ປວາຍາມສມາຘິປ຺ປຕ຺ຕາ ປນ ຕຕ຺ຖ ເກຈິ ສນ຺ຕິເຍວາຕິ. ອຖ ວາ ສມ຺ມາທິຏ຺ຐິອາທໂຍຕິ ວຸຕ຺ຕປ຺ປກາເຣ ສມ຺ມາທິຏ຺ຐິອາທິເກ ອນວເສເສ ສນ຺ຘາຍ ວຸຕ຺ຕໍ. ເຕນາຫ ‘‘ຍຖາວຸຕ຺ຕາ’’ຕິ. ອຸປ຺ປຕ຺ຕິຏ຺ຐານນິຍມນຕ຺ຖຕ຺ຕາ ນ ວິເສສນຕ຺ຖຕ຺ຕາຕິ ອຘິປ຺ປາໂຍ.

ມຄ຺ຄປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.