໑໐. ປຸເຣຊາຕປຈ຺ຈຍນິທ຺ເທສວຓ຺ຓນາ

໑໐. ທສ຺ສິຕເມວ ນຍທສ຺ສນວເສນາຕິ ໂຍຊນາ. ຍທິ ທສ຺ສິຕເມວ, ກສ຺ມາ ວຸຕ຺ຕໍ ‘‘ສາວເສສວເສນ ເທສນາ ກຕາ’’ຕິ ອາຫ ‘‘ສຣູເປນ ອທສ຺ສິຕຕ຺ຕາ’’ຕິ. ‘‘ຍໍ ຍໍ ຘມ຺ມໍ ປຸເຣຊາຕໍ ອາຣພ຺ຠ ເຍ ເຍ ຘມ຺ມາ ອຸປ຺ປຊ຺ຊນ຺ຕິ ຈິຕ຺ຕເຈຕສິກາ ຘມ຺ມາ, ເຕ ເຕ ຘມ຺ມາ ເຕສໍ ເຕສໍ ຘມ຺ມານໍ ປຸເຣຊາຕປຈ຺ຈເຍນ ປຈ຺ຈໂຍ’’ຕິ ເອວໍ ສຣູເປນ ປາຬິຍໍ ອທສ຺ສິຕຕ຺ຕາ. ອິທ຺ຘິວິຘາຠິຎ຺ຎາຍ ຈາຕິ ຈ-ສທ຺ເທນ ຈຸຕູປປາຕຎາຓສ຺ສປິ ສງ຺ຄໂຫ ທຏ຺ຐພ຺ໂພ. ຕສ຺ສປິ ຫິ ຣູປຘມ຺ມາຣມ຺ມຓກາເລ ອຏ຺ຐາຣສສຸ ຍໍ ກິຎ຺ຈິ ອາຣມ຺ມຓປຸເຣຊາຕໍ ໂຫຕິ ປຈ຺ຈຸປ຺ປນ຺ນາຣມ຺ມຓຕ຺ຕາ. ‘‘ຈວມາເນ ອຸປປຊ຺ຊມາເນ’’ຕິ ຫິ ວຸຕ຺ຕໍ. ທິພ຺ພຈກ຺ຂຸທິພ຺ພໂສຕຎາເຓສຸ ຈ ວຕ຺ຕພ຺ພເມວ ນຕ຺ຖິ.

ອິຕຣສ຺ສປິ ອຠາວາຕິ ອາຣມ຺ມຓປຸເຣຊາຕສ຺ສປິ ອຠາວາ ອຄ຺ຄຫຓໍ ປຏິສນ຺ຘິຠາວິໂນຕິ ໂຍຊນາ. ສຕິປິ ກສ຺ສຈິ ປຏິສນ຺ຘິຠາວິໂນ ອາຣມ຺ມຓປຸເຣຊາເຕ ວິຠູຕໍ ປນ ກຕ຺ວາ ອາຣມ຺ມຓກຣຓາຠາວໂຕ ອວິຊ຺ຊມານສທິສນ຺ຕິ ກຕ຺ວາ ວຸຕ຺ຕໍ ‘‘ອິຕຣສ຺ສປິ ອຠາວາ’’ຕິ. ເຕເນວາຫ ‘‘ປຏິສນ຺ຘິຍາ ວິຍ ອປຣິພ຺ຍຕ຺ຕສ຺ສ ອາຣມ຺ມຓສ຺ສ ອາຣມ຺ມຓມຕ຺ຕຠາວໂຕ’’ຕິ. ສນ຺ຕີຣຓຠາວິໂນ ມໂນວິຎ຺ຎາຓຘາຕຸຍາປິ ເອກນ຺ເຕເນວ ປຸເຣຊາຕປຈ຺ຈໂຍ ຣູປາທີນິ ປຎ຺ຈາຣມ຺ມຓານີຕິ ໂຍຊນາ. ເອຕ຺ຖ ຈ ‘‘ມໂນຘາຕູນຎ຺ຈາ’’ຕິອາທິ ‘‘ຕທາຣມ຺ມຓຠາວິໂນ’’ຕິ ປທສ຺ສ ປຸຣໂຕ ວຕ຺ຕພ຺ໂພ, ອຸປ຺ປຏິປາຏິຍາ ລິຂິຕໍ.

ປຸເຣຊາຕປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.